1 Korіnflіlerä 12 - Enі Baalantı

Duhun baaşışları

¹ Kardaşlar, istämeerim, habersiz kalasınız Duhun baaşışlarından.

² Bilersiniz, açan siz taa tayfändınız, yolu şaşırıp, baş iildärdiniz dilsiz idollara.

³ Onuştan isteerim, annayasınız, ani kimsey, kim Allahın Duhunnan lafeder, yok nasıl betvalasın İisusu, hem kimsey deyämäz Ona «Saabi İisus», salt Ayoz Duh.

⁴ Var çok türlü baaşışlar, ama hepsi bir Duhtan.

⁵ Var çok türlü izmetlär, ama salt bir Saabi.

⁶ Var çok türlü işlemeklär, ama Allah bir, Kim herkezdä hepsini yapêr.

⁷ Herkezä veriler baaşış, angısından Ayoz Duh açılêr, ki fayda getirsin.

⁸ Birisinä Duhlan veriler, aarifçesinä lafetsin, başkasına veriler, bilgili lafetsin hep o Duhlan.

⁹ Hep o Duhtan birisinä veriler inan, başkasına hep o Duhtan beceriklik hastaları alıştırmaa.

¹⁰ Taa başkasına veriler kuvet, ki yapsın kudretli işlär, başkasına – prorokluk etsin, başkasına – duhları tanısın, başkasına hertürlü dillär veriler, başkasına beceriklik, dilleri çevirsin.

¹¹ Hepsi bunnarı yapêr bir Duh, Angısı herkezinä payeder, nicä Kendi isteer.

Güüdenin birlii

¹² Nicä güüdä bir, ama ekleri çok, da çok eklerdän bir güüdä kurulu, hep ölä Hristozda da.

¹³ Hepsimiz vaatiz olduk bir Duhlan, ki bir güüdä olalım, olsun iudey, olsun urum, olsun çırak, olsun serbest, hepsimiz bir Duhtan sulanmışız.

¹⁴ Zerä güüdä diil bir ektän, ama toplu çok ektän.

¹⁵ Eer ayak deyärseydi: «Çünkü diilim el, diilim güüdedän», ne, bu beterä olmaz mı güüdedän?

¹⁶ Eer kulak deyärseydi: «Çünkü diilim göz, diilim güüdedän», ne, bu beterä olmaz mı güüdedän?

¹⁷ Eer bütün güüdä olaydı sade göz, ne olaceydı işitmäklän? Eer bütün güüdä olaydı salt kulak, ne olaceydı koku duygusunnan?

¹⁸ Ama Allah erleştirdi herbir eki güüdedä ölä, nicä Kendi istedi.

¹⁹ Eer hepsi bir ek olaydı, ozaman ne olaceydı güüdeylän?

²⁰ Dooru, ani ek çok, ama güüdä bir.

²¹ Göz yok nasıl desin elä: «Sän diil lääzımsın bana». Hep ölä baş yok nasıl desin ayaklara: «Yok lääzımnıım sizin için».

²² Buna karşı, güüdenin ekleri, ani görüner taa yufka, mutlak bizä lääzım.

²³ Hem güüdenin eklerinä, angılarını taa ayıp sayêrız, taa çok ikram vereriz, da eklerimizä, ani diil gözäl, maasuz kahır güderiz.

²⁴ Gözäl eklerin yok lääzımnıkları donaklık için. Ama Allah ölä güüdeyi yaptı, ki taa çok hatır verilsin o eklerä, angıları taa az ikramda,

²⁵ ki güüdedä ayırıklık olmasın, ama eklär birtürlü zaamet gütsünnär biri-birileri için.

²⁶ Eer zeetlenärseydi bir ek, hepsi eklär onunnan barabar zeetlenerlär. Eer bir ek ikramnanarsaydı, hepsi eklär onunnan barabar sevinerlär.

²⁷ Siz Hristozun güüdesi, hem ayırı-ayırı bu güüdenin ekleriysiniz.

²⁸ Allah erleştirdi klisedä ilkin apostolları, ikinci – prorokları, üçüncü – üüredicileri, sora onnarı, kim kudretli işlär yapêr; sora onnarı, kimin baaşışı var hastaları alıştırmaa; onnarı, kim yardım eder; onnarı, kim kullanêr; onnarı, kim lafeder hertürlü dillerdä.

²⁹ Ne, hepsi mi apostol? Hepsi mi prorok? Hepsi mi üüredici? Hepsi mi yapabiler kudretli işlär?

³⁰ Hepsi mi hastaları alıştırabiler? Hepsi mi lafedäbiler başka dillerdä? Hepsi mi dilleri çeviräbiler?

³¹ Çalışın taa üstün baaşışları kabletmää. Da bän gösterecäm sizä en ii yolu.