1 Korіnflіlerä 11 - Enі Baalantı

¹ Bendän örnek alın, nicä bän Hristozdan örnek alêrım.

Sıra klisedä

² Metederim sizi, kardaşlar, ani her taraftan aklınıza getirersiniz beni hem ani koruyêrsınız üüretmekleri ölä, nicä üürettim sizi.

³ Ama isteerim biläsiniz, ani herbir adamın başı – Hristos, karının başı – kocası, ama Hristozun başı – Allah.

⁴ Herbir adam, kim dua eder yada prorokluk eder uzun saçlan, kendi başını ikramsızlêêr.

⁵ Hem herbir karı, kim dua eder yada prorokluk eder açık başlan, ikramsızlêêr kendi başını. Bölä bir karı traş olmuş karı gibi olur.

⁶ Eer karı istämärseydi örtünmää, ozaman kırkınsın. Ama eer utanırsaydı kırkınsın yada traş olsun, ozaman örtünsün.

⁷ Adam diil lääzım örtsün başını, çünkü adam – Allahın benzemesi hem metinniidir. Ama karı – adamın metinnii.

⁸ Zerä adam alınmadı karıdan, ama karı alındı adamdan.

⁹ Adam yaradılmadı karı için, ama karı yaradıldı adam için.

¹⁰ Onuştan, angillerin hatırı için, karı kendi başını lääzım tertipli tutsun.

¹¹ Ölä ki, Saabidä ne karı adamsız, ne adam karısız.

¹² Çünkü, nicä karı adamdan yaradıldı, adam da karıdan duuêr, bunnar hepsi Allahtandır.

¹³ Kararlayın siz kendiniz: yakışıklı mı, bir karı dua etsin Allaha açık başlan?

¹⁴ Acaba sizi sıra kendisi üüretmeer mi, ani utançtır bir adam uzun saç taşısın.

¹⁵ Ama karı için uzun saç bir üünmäktir, zerä saç verili karıya örtü erinä.

¹⁶ Eer birkimsey istärseydi çekişmää, bilsin, ani ne bizdä, ne dä Allahın kliselerindä yok bölä alışmak.

Komka

¹⁷ Bunnarı söleyeräk, metetmeerim sizi, zerä toplanmaklarınız diil ii, ama zarar getirer.

¹⁸ İlk, ne işiderim, ani klisä toplanmaklarında uyuşmazlık olêr aranızda. Bunu biraz inanêrım.

¹⁹ Zerä lääzım olsun bölümnär sizin aranızda, ki üzä çıksın, kim aranızdan beenilmiş.

²⁰ Açan toplanêrsınız bireri, bu diil, ki iyäsiniz Saabinin sofrasından.

²¹ Zerä herkezi çalışêr öbürlerindän ileri isin kendi imeesini. Ölä ki, birisi kalêr aaç, ama öbürü sarfoş olêr.

²² Ne, yok mu nicä evdä iyäsiniz hem içäsiniz? Neçin aşaalandırêrsınız Allahın klisesini da utandırêrsınız onnarı, kimdä yok bişey? Ne deyim sizä? Metedeyim mi sizi? Bu üzerä yok neylän metedeyim!

²³ Ne sizi üürettim, onu Saabidän kablettim, ani Saabi İisus o gecä, açan satılmış oldu, aldı bir ekmek,

²⁴ şükür edip Allaha, kırdı onu da dedi: «/Alın, iyin,/ bu – Benim güüdäm, ani /falanêr/ sizin için. Bunu yapasınız Benim anılmam için».

²⁵ Hep ölä, imektän sora, aldı çölmää da dedi: «Bu çölmek – eni baalantı, ani kuvedä girer Benim kanımnan. Bunu herzaman yapasınız, kaç kerä içeceniz, Benim anılmam için».

²⁶ Zerä kaç kerä iyeceniz bu ekmektän hem içeceniz bu çölmektän, Saabinin ölümünü anasınız, O gelincä.

²⁷ Onuştan, kim yakışıksız iyer bu ekmektän hem içer Saabinin çölmeendän, Saabinin güüdesinä hem kanına karşı kabaatlı kalêr.

²⁸ Herkezi aaraştırsın kendi-kendini da ölä isin bu ekmektän hem içsin bu çölmektän.

²⁹ Zerä kim iyer hem içer, tanımayarak, ani bu Saabinin güüdesidir, bu imäklän hem içmäklän başına ceza getirer.

³⁰ Onuştan sizin aranızda var çok yufka hem hasta, kimisi dä geçindi.

³¹ Eer kendi-kendimizi aaraştırarsaydık, Allah bizi cezalamaz.

³² Saabi bizi, daava edip, cezaylan üüreder, ki sonda dünneylän bilä kabaatlı olmayalım.

³³ Onuştan, kardaşlar, açan sofraya toplanêrsınız, biri-birinizi bekleyin.

³⁴ Eer birkimsey aaçsaydı, evdä isin, ki açan toplanêrsınız, Allahtan daavalı olmayasınız. Kalan işleri sıraya koyacam, açan gelecäm.