1 Korіnflіlerä 10 - Enі Baalantı

İzrail bizä örnek

¹ Kardaşlar, istämeerim, habersiz kalasınız, ani hepsi bobalarımız bulut altında bulundular, da hepsi deniz içindän geçtilär.

² Hepsi bulutta hem denizdä vaatiz oldular, ki baalaşsınnar Moiseylän.

³ Hepsi idi bir imektän, verili Ayoz Duhtan.

⁴ Hepsi içti bir sudan, verili Ayoz Duhtan, zerä içtilär bir duhça Kanaradan, ani ardlarından gelärdi, o Kanara – Hristos.

⁵ Hep okadar taa çoyunu onnardan Allah beenmedi, çünkü çolda kaybeldilär.

⁶ Onnarlan bunnar hepsi oldu, ki bizä örnek olsunnar, ki istämeyelim kötülük yapmaa, onnar gibi.

⁷ Baş iiltmeyin idollara, onnardan kimi gibi, nicä yazılı: «İnsan oturdu imää hem içmää, sora, kalkıp, oynayıp, sefalanmaa başladı».

⁸ Orospulaa düşmeyelim, nicä onnardan kimi düştü, da bir gündä irmi üç bini erä serildi.

⁹ Denämeyelim Saabiyi, nicä onnardan kimisi denedi da yılannardan öldürüldülär.

¹⁰ Mırıldamayın, nicä onnardan kimi mırıldadı da telef oldular ölüm angilindän.

¹¹ Bunnar onnarlan oldu, ki bizä örnek olsun, bizim için yazıldı, ki akıl üürenelim biz, kim etişti bitki vakıtlara.

¹² Butakım, kim sanêr, ani ayakça durêr, baksın düşmesin.

¹³ Sizä geldi denemeklär, hep ölä, nicä herkezinä geler. Allah inanç da kolvermäz, ki kuvedinizdän zeedä denenmiş olasınız. O denemäk vakıdı hazırlayacek sizä bir çıkış yolu, ki dayanabiläsiniz.

İdollar hem komka

¹⁴ Onuştan, sevgili kardaşlarım, sakının idollara baş iiltmektän.

¹⁵ Lafederim, nicä akıllı insannara, siz kendiniz düşünün, ne söleerim.

¹⁶ İisözlenmiş çölmek, angısını iisözleeriz, diil mi paydaşlık Hristozun kanından? Ekmek, angısını kırêrız, diil mi paydaşlık Hristozun güüdesindän?

¹⁷ Çünkü bir ekmek, biz dä çokluk bir güüdeyiz, zerä hepsimiz paydaşız bir ekmektän.

¹⁸ Bakın onnara, kim tencesinä İzrail senselesindän. Onnar, kim kurbannardan pay alêr, paydaş olmêêr mı kurbannıktan da?

¹⁹ Ne isteerim sölemää? Kurbanın, idola baaşlanmış, saygılıı var mı? Yada idolun var mı saygılıı?

²⁰ Olmaz! Bunu deerim: çünkü tayfännar kurbannarını baaşlêêr fena duhlara, ama diil Allaha. Bän istämeerim, ki siz paydaş olasınız fena duhlarlan.

²¹ Yok nasıl içäsiniz hem Saabinin çölmeendän, hem fena duhların çölmeendän. Yok nasıl paydaş olasınız hem Saabinin sofrasından, hem dä fena duhların sofrasından.

²² Neçin isteeriz Saabiyi gücendirmää? Ne, biz Saabidän taa kaaviyiz mi?

Hepsini yapın Allahın metinnii için

²³ «Hepsini düşer yapayım», – deersiniz, ama hepsi faydalı olmaz. «Hepsini düşer yapayım», – deersiniz, ama hepsi duhça kaavilemäz.

²⁴ Kimsey bakmasın sade kendi faydasını, ama herkezi baksın başkasının da faydasını.

²⁵ İyin herbir yaanıdan, ani panayırda satılêr, hiç soruşturmayarak, ki üzünüz pak olsun.

²⁶ Zerä «bütün er hem ne er üstündä – hepsi Saabinindir».

²⁷ Eer inansızlardan biri sizi sofraya teklif edärseydi, da siz gitmää kayıl olursaydınız, iyin, ne önünüzä koyaceklar, hiç soruşturmayarak, ki üzünüz pak olsun.

²⁸ Ama eer birkimsey deyärseydi: «Bu yaanı idola baaşlanmış», ozaman imeyin söleyenin hatırı için, ki üzünüz pak olsun /Zerä er hem ne var er üstündä – hepsi Saabinindir/.

²⁹ Lafederim, diil ani sizin üzünüz pak olsun, ama onun üzü pak olsun. Zerä neçin benim serbestliim sıkılansın başkasının üzü için?

³⁰ Eer bän, şükür edip, iyärseydim, nedän beni maanalasınnar imäk için, angısı için şükür ederim?

³¹ Ölä ki, hepsi, ne iyersiniz hem içersiniz, hem hepsi, ne yapêrsınız, hepsini yapın Allahın metinnii için.

³² Olmayın köstek ne iudeylerä, ne urumnara, ne dä Allahın klisesinä.

³³ Bän bakêrım her taraftan beendireyim kendimi herkezinä, zerä bakmêêrım kendi faydamı, ama çokluun faydasını, ki onnar kurtulsunnar.