Yaptıklar 6 - Ени Бааланты

Еди киши сечилер апостоллара йардымӂы

¹ О гӱннердӓ, ачан ӱӱрениӂилӓр зееделенӓрди, урумӂа лафедӓн иудейлӓр башладылар мырылданмаа чыфытча лафедӓн иудейлерӓ каршы, зерӓ оннарын дуллары есаба алынмарды хергӱнкӱ йардым пайлашмасында.

² Озаман оники апостол топладылар хепси ӱӱрениӂилери да дедилӓр: «Диил йакышыклы, ки биз бракалым Аллахын сӧзӱнӱ да зааметленелим софраларда.

³ Онуштан, кардашлар, айырын араныздан еди адам, кимин ичин ии лафедилер, ким долу Айоз Духлан хем аарифликлӓн, ки оннары койалым бу лӓӓзымны ишӓ.

⁴ Ама биз кендимизи дуайа хем Аллахын сӧзӱнӱн насаадына вереӂез».

⁵ Бу теклифи беенди бӱтӱн топлулук. Айырдылар Стефаны, бир адамы, ким долуйду Айоз Духлан хем аарифликлӓн, Филипи, Прохору, Никанору, Тимону, Парменаны хем Антиохийадан Николайы, ангысы ӧнӂӓ иудей динини каблетмишти.

⁶ Оннары чыкардылар апостолларын ӧнӱнӓ, да буннар, койуп еллерини оннарын ӱстӱнӓ, дуа еттилӓр.

⁷ Аллахын сӧзӱ чок дааларды, ӱӱрениӂилӓр дӓ гиттикчӓ зееделенӓрди Иерусалим касабасында, попазлардан да чойу инана гӧрӓ йашарды.

Стефаны туттулар

⁸ Стефан, долу Аллахын иивергисиннӓн хем куветлӓн, йапарды шашмаклы ишлӓр хем бӱӱк нышаннар инсан арасында.

⁹ Ама кимиси синагогадан, ангысына денер Азатлыларын Синагогасы, хем кимиси иудейлердӓн Киринедӓн, Александрийадан, Киликийадан хем Асийадан башладылар Стефаннан чекишмӓӓ,

¹⁰ ама аарифлӓӓ хем Айоз Духа, ангысыннан Стефан лафедӓрди, каршы дурамадылар.

¹¹ Озаман саклыдан ӱӱреттилӓр кими адамнары, десиннӓр: «Биз ишиттик, ниӂӓ о кӧтӱлӓрди Моисейи хем Аллахы».

¹² Сора дебрештирдилӓр инсаны, аксакаллары хем билгичлери. Ӱӱштӱлӓр онун ӱстӱнӓ, тутуп, гӧтӱрдӱлӓр Синедриона.

¹³ Чыкардылар йаланӂы шаатлар, ангылары дедилӓр: «Бу адам дургунмээр лафетмӓӓ бу айоз ерӓ хем Закона каршы.

¹⁴ Биз ишиттик ону лафедӓркӓн, ани Назаретли Иисус йыкаӂэк бу ери да дииштиреӂек бизим адетлери, ани курулу Моисейдӓн».

¹⁵ Хепси, ким отурурду Синедрионда, ачан бактылар Стефана, онун ӱзӱ гӧрӱндӱ бир ангил ӱзӱ гиби.