Yaptıklar 3 - Ени Бааланты

Петри алыштырэр сакат адамы

¹ Бир гӱн Петри хем Иоан, дуа саадында, докузунӂу саатта, Айоз бинайа гидӓрдилӓр.

² Орайы бир адам, дуумадан сакат, гӧтӱрӱрдӱлӓр. Айоз бинанын Гӧзӓл Токатларында ерлештирӓрдилӓр, ки пара диленсин оннардан, ким гирер Айоз бинанын аулу ичинӓ.

³ Бу адам, гӧрӱп Петрийи хем Иоаны, ангылары Айоз бинанын аулу ичинӓ гирмӓӓ бакэрлар, диленди иилик етсиннӓр она бишей.

⁴ Петри хем Иоан, бакып уз она, дедилӓр: «Бак бизӓ».

⁵ О гӧзлерини оннара дикти, умутланарак каблетсин бишей оннардан.

⁶ Озаман Петри деди: «Гӱмӱшӱм хем алтыным йок, ама нейим вар, ону верерим: Назаретли Иисус Христозун адына деерим сана: калк да гез!»

⁷ Сора, тутуп ону саа елиндӓн, калдырды. Чабук каавиленди табаннары хем балдырлары.

⁸ О, фырлайып, айаа калкты да гезмӓӓ башлады. Барабар оннарлан гирди Айоз бина ичинӓ. Гезип атларды хем Аллахы метиннӓрди.

⁹ Хепси инсан гӧрдӱ ону гезӓркӓн хем Аллахы метиннӓркӓн.

¹⁰ Таныдылар, ани одур о сакат адам, ани отурурду Гӧзӓл Токатларда да диленӓрди. Хепси шаштылар хем даптур гелдилӓр, гӧрӱп не олду.

¹¹ Адам Петридӓн хем Иоандан тутунаркан Соломонун колонадасы денӓн ердӓ, хепси инсан, шаш-беш калып, качыштылар оннара доору.

Петринин Айоз бинадакы насаады

¹² Петри, буну гӧрӱп, инсана лафедип деди: «Израиллилӓр, нечин шашэрсыныз буна? Нечин узун-узун бакэрсыныз бизӓ, сансын биз кенди куведимизлӓн йада диннилиимизлӓн буну йаптык, ки бу адам гезсин.

¹³ Авраамын, Исаакын хем Иаковун Аллахы, бизим бобаларын Аллахы метиннеди Кенди Оолуну, Иисусу, Ангысындан сиз, сатып, атылдыныз Пилатын ӧнӱндӓ, ангысы артык карарламышты Иисусу салверсин.

¹⁴ Сиз атылдыныз Ондан, Ким Айоз хем Кабаатсыз, да истединиз бир ӧлдӱрӱӂӱйӱ сизӓ салверсин.

¹⁵ Йашамак Ӧндерӂисини ӧлдӱрдӱнӱз, ама Аллах Ону ӧлӱдӓн дирилтти. Биз буна шаадыз.

¹⁶ Инаннан Онун адына бу адам каавилештирилди, ангысыны гӧрерсиниз хем таныйэрсыныз. Инан Иисуса бу адама саалык верди, ниӂӓ хепсиниз гӧрерсиниз.

¹⁷ Шинди, кардашлар, билерим, ки буну йаптыныз билмемезликтӓ, ниӂӓ дӓ сизин заабитлӓр.

¹⁸ Аллах таманнады хепсини, не ӧнӂӓ сӧледийди пророкларынын аазындан, ани Онун Христозу зеетленеӂек.

¹⁹ Онун ичин пишман олун гӱнахларыныздан да Аллаха дӧнӱн, ки силинсин гӱнахларыныз,

²⁰ Аллахтан ениленмӓк вакытлары гелсин, да О йолласын Христозу, Ангысыны баштан сизӓ сыралады – Иисусу,

²¹ Ангысыны гӧклӓр лӓӓзым каблетсин о замана кадар, незаман хепси енидӓн сырайа койулаӂэк, ниӂӓ Аллах евелдӓн Кенди айоз пророкларынын аазындан лафетти.

²² Моисей деди /бизим бобалара/: „Сааби Аллахыныз калдыраӂэк сизин кардашлар арасындан бир пророк беним гиби. Ону сеслейин да хепсини, не дейеӂек сизӓ, йапын.

²³ Херкези, ким сеслӓмейеӂек ону, телеф олаӂэк инсанын арасындан“.

²⁴ Бутакым Самуил хем хепси пророклар, ани ондан сора лафеттилӓр, бу вакыт ичин хаберледилӓр.

²⁵ Сиз – пророкларын хем баалантынын ооллары, ангысыны Аллах сизин бобаларлан йапты, ачан деди Авраама: „Хепси миллетлӓр ер ӱстӱндӓ иисӧзленмиш олаӂэк сенин сенселендӓн“.

²⁶ Аллах, калдырып Кенди Оолуну, Иисусу, илкин сизӓ йоллады, ки сизи иисӧзлесин чевирерӓк хепсини кӧтӱлӱклериниздӓн».