Yaptıklar 2 - Ени Бааланты

Айоз Духун инмеси

¹ Еллинӂи гӱнӱ йортусунда хепси бирердӓ топлуйдулар.

² Ап-ансыздан гӧктӓн ишидилди бир сес, ниӂӓ бӱӱк бир лӱзгӓр уултусу, ани долдурду бӱтӱн еви, нередӓ оннар булунардылар.

³ Оннара гӧрӱндӱ атеш диллӓр гиби, ани бӧлӱнӱп херкезинӓ кондулар.

⁴ Хепси Айоз Духлан долуп, лафетмӓӓ башладылар башка диллердӓ, ниӂӓ Дух верирди, лафетсиннӓр.

⁵ Иерусалимдӓ булунардылар иудейлӓр, динни адамнар, топлу гӧк алтындан хертӱрлӱ миллетлердӓн.

⁶ Ачан ишидилди бу уулту, чок инсан орада олду бир карышыклык, зерӓ херкези ишидӓрди апостоллары лафедерӓк онун кенди дилиндӓ.

⁷ Хепси шашып даптур гелдилӓр да дейӓрдилӓр бири-биринӓ: «Йа бакын, буннар, ким лафедер, диил ми хепси Галилейадан?

⁸ Насыл хербиримиз ишидериз оннары лафедерӓк бизим кенди ана дилимиздӓ?

⁹ Биз – парфийалылар, мидийалылар, еламнылар, инсаннар, ани йашээрлар Месопотамийада, Иудейада, Каппадокийада, Понтта хем Асийада,

¹⁰ Фригийада, Памфилийада, Мысырда, Ливийа ерлериндӓ, ани Киринӓ тарафында, Ромадан мусаафирлӓр, иудейлӓр хем прозелитлӓр,

¹¹ критлилӓр хем араплар, ишидериз оннары лафедерӓк бизим кенди дилимиздӓ Аллахын бӱӱк ишлери ичин!»

¹² Хепси шашардылар, билмӓрдилӓр не инансыннар. Оннар сорарды бири-биринӓ: «Недир бу?»

¹³ Ама башкалары, гӱлмӓӓ аларак, дейӓрдилӓр: «Оннар таазӓ шараптан сарфош олмушлар!»

Петринин Еллинӂи гӱнӱ насааты

¹⁴ Петри калкты калан онбир апостоллан барабар да, алып лафы, бӱӱк сеслӓн деди: «Иудей адамнары хем хепси, ким йашээр Иерусалим касабасында, сеслейин беним лафларымы да билиниз!

¹⁵ Оннар диил сарфош, ниӂӓ сиз санэрсыныз, зерӓ шинди салт ӱчӱнӂу саат сабаадан.

¹⁶ Ама бу олду о, не сӧлендийди пророк Иоилдӓн:

¹⁷ „Сон гӱннердӓ, деер Аллах, дӧкеӂӓм Беним Духумдан хербир инсан ӱстӱнӓ. Сизин оолларыныз хем кызларыныз пророклук едеӂеклӓр. Генчлериниз гӧрӱнмӓк гӧреӂеклӓр, ихтӓрларыныз дӱш гӧреӂеклӓр!

¹⁸ О гӱннердӓ Беним чыракларымын ӱстӱнӓ, адамнарын хем карыларын ӱстӱнӓ, дӧкеӂӓм Беним Духумдан, да оннар пророклук едеӂеклӓр.

¹⁹ Гӧстереӂӓм шашмаклы ишлӓр йукарда, гӧклердӓ, хем нышаннар ашаада, ердӓ: кан, атеш хем булут гиби тӱтӱн.

²⁰ Гӱн каранныкланаӂэк, ай кан ренгинӓ дӧнеӂек Саабинин бӱӱк хем шафклы гӱнӱн ӧнӱ сора.

²¹ Озаман ким Аллахын адыны чаараӂэк, куртулмуш олаӂэк“.

²² Израил адамнары, сеслейин бу лафлары! Назаретли Иисус бир Адамды, Ангысынын кимниини Аллах ачык гӧстерди сизӓ кудретли йаптыкларлан, шашмаклы ишлӓрлӓн хем нышаннарлан, ангыларыны Аллах йапты сизин аранызда Онуннан, ниӂӓ кендиниз билерсиниз.

²³ Бу Адам верилди сизин елинизӓ ӧнӂӓ Аллахын курулмушуна хем билмесинӓ гӧрӓ. Ону сиз енсерлединиз ставроза хем ӧлдӱрдӱнӱз законсузларын еллериннӓн.

²⁴ Ама Аллах, ӧлӱмӱн аӂыларына сон верип, Ону дирилтти. Ӧлӱм есирлӓӓ аламады Ону.

²⁵ Зерӓ Давид Онун ичин деер: „Гӧрдӱм херзаман Саабийи беним ӧнӱмдӓ, зерӓ О беним саа тарафымда, ки бӓн салланмайым.

²⁶ Онун ичин ӱрӓӓм севинер хем дилим шенненер, гӱӱдӓм умутлан динненер.

²⁷ Зерӓ Сӓн бракмайаӂан ӂанымы ӧлӱлӓр ериндӓ, изин вермейеӂӓн, Сенин Айозун гӱӱдеси чӱрӱсӱн.

²⁸ Ачтын бана, таныйым йашамак йолуну. Сӓн севиндиреӂӓн бени Кенди ӧнӱндӓ“.

²⁹ Кардашлар, Давид атамыз ичин, сизӓ ачык сӧлеерим, ани о ӧлдӱ хем гӧмӱлдӱ, мезары да биздӓ бӱӱнкӱ гӱнӓ кадар.

³⁰ Чӱнкӱ Давид пророкту, о билӓрди, не Аллах еминнӓн адамышты, ани онун ардындан геленнердӓн бирисини калдыраӂэк чорбаӂылык скемнесинӓ.

³¹ О гелеӂек вакытлары гӧрерӓк, Христозун дирилмеси ичин лафетти, ани Онун ӂаны ӧлӱлӓр ериндӓ бракылмайаӂэк хем гӱӱдеси чӱрӱмейеӂек.

³² Бу Иисусу Аллах ӧлӱдӓн дирилтти, биз хепсимиз буна шаадыз.

³³ О Аллахын саа тарафына калдырылды, каблетти аданмыш Айоз Духу да Ону шинди дӧктӱ, ниӂӓ гӧрерсиниз хем ишидерсиниз.

³⁴ Давид калкмады гӧкӓ, ама кенди деди: „Сааби деди беним Чорбаӂыма: Отур саа тарафымда,

³⁵ Бӓн койунӂа Сенин душманнарыны айакларын алтына“.

³⁶ Бӱтӱн Израил халкы ии билсин, ани Аллах йапты Иисусу Чорбаӂы хем Христос. Одур, Кими ставроза гердиниз».

Илк христианнар

³⁷ Оннар бу лафлары ишидип, ӱреклери сапланмыш калды, да дедилӓр Петрийӓ хем ӧбӱр апостоллара: «Кардашлар, не йапалым?»

³⁸ «Дӧнӱн гӱнахларыныздан Аллаха, да херкезиниз ваатиз олсун Иисус Христозун адына гӱнахларынызын баашланмасы ичин, сора кабледеӂениз Айоз Духун баашышыны, – деди Петри. –

³⁹ Бу адамак сизин ичин, сизин ушакларыныз ичин хем хепси узакта оланнар ичин, херкез ичин, кими бизим Сааби Аллахымыз чаараӂэк».

⁴⁰ Хем чок таа башка лафларлан шаатлык етти оннара хем йалварды, дейерӓк: «Куртарыныз кендинизи бу сапык бой инсандан».

⁴¹ Хепси, ким каблетти онун насаадыны, ваатиз олдулар, да о гӱн клисейӓ еклешти бир ӱч бин киши.

Инанӂыларын йашамасы

⁴² Оннар херзаман чалышардылар апостолларын ӱӱренмеклериндӓ бир кардаш пайдашлыында. Барабар екмек ийӓрдилӓр хем дуа едӓрдилӓр.

⁴³ Херкезини бир корку сармышты. Апостолларын елиннӓн йапыларды чок шашмаклы ишлӓр хем нышаннар.

⁴⁴ Хепси инанӂылар бирердӓ топлуйдулар. Хепсини ортакламыштылар.

⁴⁵ Сатардылар кенди малларыны хем мӱлклерини, сора парасыны пайедӓрдилӓр херкезинӓ, некадар лӓӓзым.

⁴⁶ Хер гӱн хепси барабар топланардылар Айоз бинайа хем евлердӓ екмек пайедӓрдилӓр да севинмӓклӓн хем пак ӱреклӓн ийӓрдилӓр.

⁴⁷ Аллахы метиннӓрдилӓр хем хепси инсандан беенилмиштилӓр. Сааби хер гӱн еклӓрди ени куртуланнары оннарын сайысына.