Yaptıklar 16 - Ени Бааланты

Тимофей

¹ Сонда Павли етишти Дервийа хем Листра касабаларына. Орада варды бир ӱӱрениӂи, ады Тимофей. Онун анасы бир инанӂы кары иудейлердӓн, ама бобасы урумнарданды.

² Кардашлар Листра хем Иконийа касабаларындан Тимофейи мететтилӓр.

³ Павли, чӱнкӱ истӓрди ону алсын кендисиннӓн, йаптырды она кесиклик, иудейлерин бетеринӓ, ангылары йашардылар орада, зерӓ хепси билӓрди, ани онун бобасы урум.

⁴ Гечерӓк касабалардан, оннар ӱӱреттилӓр кардашлары кайыл олсуннар карара, не алмыштылар апостоллар хем пресвитерлӓр Иерусалимдӓ.

⁵ Бутакым клиселӓр каавиленӓрдилӓр инанда, да гӱн гӱндӓн зееделенӓрди сайысы.

Павлинин гӧрӱмӱ Македонийа ичин

⁶ Айоз Дух бракмады оннары, насаат етсиннӓр Аллахын сӧзӱнӱ Асийада, онуштан гечтилӓр Фригийа хем Галатийа ерлериндӓн.

⁷ Етиштийнӓн Мисийа сынырына, истедилӓр гитмӓӓ Вифинийайа, ама Иисусун Духу изин вермеди.

⁸ Гечтилӓр Мисийадан да гиттилӓр Троада касабасына.

⁹ Павли геӂӓ гӧрдӱ бир гӧрӱм. Бир адам Македонийадан, ӧнӱндӓ дуруп, йалварарды: «Геч Македонийайа да йардым ет бизӓ».

¹⁰ Павлинин гӧрӱмӱндӓн сора биз хемен бактык гиделим Македонийайа, зерӓ аннадык, ани Аллах чаарэр бизи, ки орада аннадалым Ии Хабери.

Лидийа Ии Хабери инанэр

¹¹ Йолланып Троада касабасындан, биз ӱздӱк гемийлӓн уз Самофракийа адасына, икинӂи гӱнӱ етиштик Неаполис касабасына.

¹² Ордан гиттик Филип касабасына, ангысы Рома колонийасы Македонийанын илк бӧлӱмӱндӓ. Бу касабада дурдук биркач гӱн.

¹³ Ӂумертеси гӱнӱ чыктык касаба токатларындан дышары бир акарсу бойуна, нередӓ дӱшӱндӱк, бир дуа ери вар. Отуруп орада, башладык лафетмӓӓ карыларлан, ани гелдилӓр.

¹⁴ Аллахтан коркан бир кары, ады Лидийа, кып-кырмызы без сатыӂысыйды Фийатира касабасындан, сеслӓрди бизи. Сааби ачты онун ӱреени, ки есап алсын Павлинин лафларыны.

¹⁵ О хем евдекилери ваатиз олдуктан сора йалварып деди бизӓ: «Еер бени инанӂы Саабийӓ кабледирсениз, гелин евимӓ да калын бендӓ». Да чевирди бизи.

Павли хем Сила капанда

¹⁶ Бир сыра олду, ачан гидӓрдик дуа еринӓ, каршы чыкты бизӓ бир изметкӓр-кыз, ангысында варды фалӂылык духу. О фалӂылыыннан бӱӱк казанч гетирӓрди чорбаӂыларына.

¹⁷ Такышып Павлинин хем бизим ардымыза, бу изметкӓр-кыз баарарды: «Бу инсаннар Пек ӱӱсек Аллахын чыраклары, ангылары хаберлеерлӓр сизӓ куртулмак йолуну».

¹⁸ Буну чок сыра йапты. Павли, быкып, ӱфкеленди, дӧндӱ да деди фена духа: «Иисус Христозун адыннан деерим, чык ондан!» Фена дух чыкты о кыпымда.

¹⁹ Чорбаӂылары, гӧрӱп, ани кайбелди казанчтан умутлары, туттулар Павлийи хем Силайы да сӱрӱдӱлӓр меркез мейдана, касабанын заабитлеринӓ,

²⁰ Верип оннарын елинӓ, дедилӓр: «Бу адамнар, иудейлӓр, дебрештирерлӓр инсаны бизим касабада.

²¹ Оннар ӱӱредерлӓр адетлери, не биз, ромалылар, дӱшмеер кабледелим хем дӓ таманнайалым».

²² Инсан калкты Павлийӓ хем Силайа каршы. Заабитлӓр, йырттырып оннарын рубаларыны, сымарладылар дӱӱсӱннӓр оннары фышканнан.

²³ Пек кӧтӱ дӱӱйӱп, аттылар сора оннары капана. Сымарладылар зындан бекчисинӓ, ки баксын, ии корусун оннары.

²⁴ Кабледип бу емири, бекчи капады оннары зынданын ичйандакы бӧлмесинӓ да айакларыны букааларлан китледи.

²⁵ Йакын геӂӓ йарысы Павли хем Сила дуа едӓрдилӓр хем Аллахы метедӓрдилӓр, капанӂылар да оннары сеслӓрдилӓр.

²⁶ Ап-ансыздан олду ӧлӓ бир бӱӱк ер тепремеси, ани зындан салланды темелӓдӓн. Бирдӓн хепси капулар ачылды, хепси букаалар чӧзӱлдӱ.

²⁷ Зындан бекчиси уйанды, гӧрӱп зынданын капуларыны ачык, чыкарды кылыӂыны кенди-кендини ӧлдӱрсӱн, чӱнкӱ санды, ани капанӂылар качты.

²⁸ Павли пек баарды: «Йапма кендинӓ зарар, зерӓ биз хепсимиз бурадайыз!»

²⁹ Бекчи истеди шафк, качарак гирди ичйанына, да титирейерӓк дӱштӱ Павлинин хем Силанын айакларына.

³⁰ Чыкарып оннары дышары, деди: «Чорбаӂыларым, не дӱшер йапайым, ки куртулайым?»

³¹ Оннар дедилӓр: «Инан Сааби Иисус Христоза да куртулаӂан сӓн хем бӱтӱн сенин евин».

³² Насаат еттилӓр Саабинин сӧзӱнӱ она хем хепсинӓ, ким онун евиндӓйди.

³³ О геӂӓ бекчи алып-йыкады оннарын йараларыны, да осаат ваатиз олду кендиси хем хепси онун евдекилери.

³⁴ Павлийи хем Силайы кенди евинӓ буйур етти, софра оннара койду да севинди бӱтӱн евиннӓн, ани Аллаха инанды.

Павли хем Сила колверилер

³⁵ Ачан айдыннанды, заабитлӓр йолладылар изметчилерини, ани фышкан ташыйарды, десиннӓр: «Салвер о адамнары».

³⁶ Зындан бекчиси сӧледи буну Павлийӓ да деди: «Заабитлӓр хабер йолладылар, ки колверейим сизи. Онуштан чыкын шинди да гидин услулукта».

³⁷ Ама Павли деди оннара: «Бизи, Рома ватандашларыны, даавасыз хепсинин ӧнӱндӓ дӱӱдӱлӓр фышканнан, сора кападылар зындана, ама шинди бакэрлар, саклы салверсиннӓр ми? Олмаз бӧлӓ, ко кендилери гелип-чыкарсыннар бизи».

³⁸ Изметчилӓр сӧледилӓр бу лафлары заабитлерӓ. Заабитлӓр корктулар, ишидип, ани оннар Рома ватандашларыймыш.

³⁹ Гелдилӓр, афетмӓк истедилӓр, чыкардылар капандан да, йалварып оннара, дедилӓр гитсиннӓр касабадан.

⁴⁰ Павли хем Сила, чыкып зындандан, гиттилӓр Лидийанын евинӓ. Орада гӧрӱштӱлӓр кардашларлан, гиргиннеттилӓр оннары, сора йола гиттилӓр.