Yaptıklar 12 - Ени Бааланты

Петри куртулэр капандан

¹ О вакыт падишах Ирод туттурду клиседӓн кимисини, неетленип оннара кӧтӱлӱк йапсын.

² О кылычлан ӧлдӱрттӱ Иакову, Иоанын кардашыны.

³ Гӧрӱп, ани иудейлӓр беенерлӓр буну, ондан сора Хамурсуз йортунун гӱннериндӓ туттурду Петрийи дӓ.

⁴ Арестат еттирдиктӓн сора капана капатты. Койду дӧрт бӧлӱк аскер, беклесиннӓр ону. Бӧлӱклердӓ варды дӧрдӓр аскер. Неетленӓрди Паскеллӓ йортусундан сора чыкармаа ону инсанын ӧнӱнӓ даава ичин.

⁵ Петри булунурду бекчилик алтында, капанда. Ама клисӓ хашлак дуа едӓрди онун ичин Аллаха.

⁶ О геӂӓ, незаман ертеси гӱнӱ Ирод лӓӓзымды чыкарсын ону даавайа, Петри уйуйарды ики аскер арасында баалы ики синӂирлӓн, бекчилӓр дӓ беклӓрдилӓр капанын капусунда.

⁷ Ансыздан Аллахтан бир ангил пейдаланды, да бир шафк айдыннатты одайы капанда. Ангил дӱрттӱ Петрийи бир йанына да, уйандырып ону, деди: «Чабук калк!». Синӂирлӓр бирдӓн дӱштӱлӓр онун еллериндӓн.

⁸ Ангил деди она: «Кушан хем гии айак капларыны!». О ӧлӓ дӓ йапты. Сора ангил деди: «Гии ӱст рубаны да гел беним ардыма!»

⁹ Петри дышары чыкты, гидип онун ардына, аннамайарак, ани, не йапэр ангил, бу хакына аслы. О санарды, ани гӧрӱнмӓк гӧрер.

¹⁰ Ачан гечтилӓр илк хем икинӂи бекчилии, етиштилӓр демир токатлара, ани чыкэр касаба ичинӓ. Токатлар кендилииндӓн ачылдылар ӧннериндӓ. Оннар чыктылар да гечтилӓр бир сокак. Сора ангил бирдӓн йок олду онун йанындан.

¹¹ Ачан Петри гелди кендинӓ, деди: «Шинди бӓн хакына гӧрерим, ани Сааби йоллады ангилини да куртарды бени Иродун елиндӓн хем хепси белалардан, не беклӓрди иудей инсаны, ки олсун бенимнӓн».

¹² Аннайып, не олду, о гитти Марийанын евинӓ, ангысы Иоанын – Марк дениленин – анасыйды, кимдӓ чойу топланмыштылар да дуа едӓрдилӓр.

¹³ Ачан Петри урду дышанкы токатлара, чыкты бир изметчийка, ады Рода, ки баксын, ким урэр.

¹⁴ Ачан таныды Петринин сесини, севинмеликтӓн ачмады токады, ама качарак гитти да сӧледи, ани Петри дурэр токатларда.

¹⁵ Оннар дедилӓр она: «Сӓн дели мийсин?» Ама о бакарды аннатсын, ани сӧледиклери аслы, онуштан оннар дедилӓр: «Бу олмалы онун ангили».

¹⁶ Бу вакыт Петри хеп урарды токатлара. Ачан ачтылар, гӧрӱп ону, даптур гелдилӓр.

¹⁷ Петри йапты елиннӓн нышан, ки суссуннар. Сора аннатты, ниӂӓ Сааби чыкарды ону зындандан, да деди: «Сӧлейиниз Иакова хем кардашлара бу олушлар ичин». Сора кендиси чыкты да гитти башка ерӓ.

¹⁸ Ачан айдыннанды, аскерлерин арасында бир бӱӱк качынмак олду, бакардылар аннасыннар, не олду Петрийлӓн.

¹⁹ Ирод ааратты ону херердӓ да, ачан буламады, бекчилери соруша чекти да сымарлады, ӧлдӱрӱлсӱннӓр. Сора кенди гитти Иудейадан Кесарийа касабасына да орада калды.

Ирод ӧлер бир чиркин ӧлӱмнӓн

²⁰ Ирод пек ӱфкелийди Тир хем Сидон касабасындан инсана. Оннар, аннашып, гелдилӓр Иродлан гӧрӱшмӓӓ. Кенди тарафына чевирдилӓр Власты, ани бакарды падишахын бинасыны. Истедилӓр барышмак йапмаа, зерӓ оннарын мемлекети бесленӓрди падишахын мемлекетиндӓн.

²¹ Бир койулмуш гӱндӓ Ирод гииди падишах рубаларыны да, отуруп падишах скемнесиндӓ, башлады лафетмӓӓ инсанын ӧнӱндӓ.

²² Инсан баарарды: «Бу сес диил адамын, ама Аллахын!»

²³ Саабидӓн бир ангил хемен бирдӓн чарпты ону, зерӓ о йапмышты, ки метиннесиннӓр ону, ама диил Аллахы. Ону куртлар иди, да о ӧлдӱ.

²⁴ Ама Аллахын сӧзӱ хер тарафа дааларды хем илерлӓрди.

²⁵ Варнава хем Саул, изметлерини таманнадыктан сора, дӧндӱлӓр Иерусалимдӓн геери, алып кендилериннӓн Иоаны, ангысына денилер Марк.