Yaptıklar 11 - Ени Бааланты

Петринин дооруланмасы Иерусалимдӓ

¹ Апостоллар хем Иудейанын хер тарафындан кардашлар ишиттилӓр, ани йабанӂылар да каблеттилӓр Аллахын сӧзӱнӱ.

² Да ачан Петри Иерусалимӓ дӧндӱ, кесиклик тарафлылары таказаладылар ону

³ да дедилӓр: «Сӓн гитмишин кесиксиз оланнарын евинӓ да имӓк имишин оннарлан барабар».

⁴ Петри, баштан башлайарак, оннара хепсини сыравардыр сӧледи да деди:

⁵ «Булунурдум Иоппийа касабасында. Дуа вакыды гӧзлерим дӧндӱ да гӧрдӱм бир гӧрӱнмӓк. Гӧктӓн инӓрди несӓ, ани бензӓрди бӱӱк бир чаршафа, ани саркыдыларды дӧрт кӧшесиндӓн. Гелди беним йаныма кадар.

⁶ Гӧзлерими чаршафа дикип, ислӓӓ бактым. Гӧрдӱм дӧрт баӂаклылары, ӂанаварлары, сӱрӱненнери хем гӧк кушларыны.

⁷ Да ишиттим бир сес, ани деди бана: „Петри, калк, кес да и!“

⁸ Ама бӓн ӂувап еттим: „Олмаз, Сааби, хич бир вакыт бишей мындар хем диил пак гирмеди аазыма“.

⁹ Ама сес гӧктӓн икинӂи сыра деди бана: „Не Аллах паклады, ону сайма мындар“.

¹⁰ Бӧлӓ олду ӱч сыра. Сора хепси енидӓн алынды гӧкӓ.

¹¹ Таман о вакыт ӱч адам, йолланылан Кесарийадан бана, дургундулар евин ӧнӱндӓ, нередейдик биз.

¹² Айоз Дух бана деди гидейим оннарлан, хич шӱпеленмейерӓк. Бу алты кардаш гелдилӓр бенимнӓн, билӓ гирдик о адамын евинӓ.

¹³ О сӧледи бизӓ, ниӂӓ гӧрмӱш ангили, ангысы онун евиндӓ пейдаланмыш да демиш она: „Йолла Иоппийа касабасына да теклиф ет Симону, ангысына денилер Петри.

¹⁴ О сӧлейеӂек сана сӧзлери, нейлӓн сӓн куртулаӂан хем хепси сенин евин“.

¹⁵ Ачан башладым лафетмӓӓ, оннарын ӱстӱнӓ инди Айоз Дух, ниӂӓ дӓ баштан инди бизим ӱстӱмӱзӓ.

¹⁶ Озаман аклыма гетирдим Саабинин сӧзлерини: „Иоан ваатиз етти суйлан, ама сиз ваатиз олаӂэныз Айоз Духлан“.

¹⁷ Чӱнкӱ Аллах верди оннара хеп ӧлӓ баашышы, ниӂӓ дӓ бизӓ, ким инанды Сааби Иисус Христоза, бӓн кимим, ки Аллаха каршы дурайым?»

¹⁸ Сеслейип бу лафлары, оннар усландылар да метиннедилӓр Аллахы, дейип: «Гӧрӱнер, ани тайфӓннара да Аллах верди колайлык, дӧнсӱннӓр Она гӱнахларындан да йашамак еденсиннӓр».

Варнава хем Саул Антиохийа касабасында

¹⁹ Оннар, ани даалыштыйдылар кооламак вакыдында, Стефанын ӧлдӱрӱлмесиндӓн сора, гиттилӓр ердӓн ерӓ Финикийа, Кипру хем Антиохийайа кадар, хаберлейерӓк Аллахын сӧзӱнӱ салт иудейлерӓ.

²⁰ Ама оннардан кими адамнар варды Кипрудан хем Киринедӓн, ангылары гиттилӓр Антиохийа касабасына да лафеттилӓр урумнарлан, аннадарак ии хабери Сааби Иисус ичин.

²¹ Саабинин ели оннарланды. Чок инсан инандылар да дӧндӱлӓр Саабийӓ.

²² Оннар ичин хабер етишти Иерусалим клисесинӓ. Орадан йолладылар Варнавайы Антиохийа касабасына.

²³ Ачан о, гелип орайы, гӧрдӱ Аллахын иивергисини, севинди да ӱреклендирди хепсини, карар алып, верилсиннӓр Саабийӓ.

²⁴ Зерӓ Варнава ии бир адамды, долу Айоз Духлан хем инаннан. Да чок инсан еклешти Саабийӓ.

²⁵ Сора Варнава гитти Тарс касабасына, ки аарасын Саулу.

²⁶ Булуп ону, гетирди Антиохийа касабасына. Бӱтӱн йыл оннар, клисейлӓн топланып, чок инсан ӱӱреттилӓр. Ен илкин Антиохийада ӱӱрениӂилерӓ «христиан» ады верилди.

Агав пророклук едер аачлык ичин

²⁷ Бу вакыт Иерусалимдӓн Антиохийайа гелдилӓр пророклар.

²⁸ Оннардан бириси, ады Агав, калкып хаберледи Айоз Духлан, ани олаӂэк бӱӱк аачлык бӱтӱн дӱннедӓ, ниӂӓ да сора олду император Клавдийин вакыдында.

²⁹ Озаман ӱӱрениӂилӓр карарлады херкези, кувединӓ гӧрӓ, йолласын йардым кардашлара, ангылары йашардылар Иудейада.

³⁰ Ӧлӓ да йаптылар. Варнаванын хем Саулун елиннӓн йолладылар бир йардым пресвитерлерӓ.