Romalılara 7 - Ени Бааланты

Закондан азат

¹ Не, билмеерсиниз ми, кардашлар – лафедерим оннара, ким билер Айоз Закону – Законун вар куведи адамын ӱстӱнӓ окадар вакыт, некадар адам йашээр.

² Сӧзгелиши: Закона гӧрӓ евли кары баалы коӂасыннан, некадар вакыт коӂасы йашээр, ама еер коӂасы ӧлӱрсейди, кары бошанэр стеонозлук законундан.

³ Ама окадар вакыт, некадар коӂасы йашээр, еер башка бир адамнан йашарсайды, ороспу сайылэр. Ама еер коӂасы ӧлӱрсейди, кары Закондан бошанэр, да озаман, еер башка адама евленӓрсейди, ороспулук йапмээр.

⁴ Хеп ӧлӓ сиз дӓ, кардашлар, чӱнкӱ пай алэрсыныз Христозун гӱӱдесиндӓн, ӧлдӱнӱз Закон ичин, ки бааланасыныз башкасына – Она, Ким ӧлӱдӓн дирилди. Бу олду, ки файдалы олалым Аллахын изметиндӓ.

⁵ Зерӓ, йашаркан тенимизӓ гӧрӓ, гӱнахкер хавезлери, Закондан дебрештирилмиш, ишлӓрдилӓр бизим гӱӱдемизин еклериндӓ, да йаптыкларымызын мейвасы ӧлӱмдӱ.

⁶ Ама шинди, ӧлӱп, бошандык о закондан, ангысыннан баалыйдык, ки измет еделим Аллаха Духун енилииннӓн, диил букванын ескилииннӓн.

Закон ачыклээр гӱнахы

⁷ Не дейеӂез? Айоз Закон гӱнахкер ми? Олмаз! Буна каршы, о Закон олмасайды, биз гӱнахы танымайаӂэйдык. Сӧзгелиши, бӓн билмейеӂейдим, недир тамахлык, еер Закон демейейди: «Тамахланмайасын».

⁸ Ама гӱнах, файдаланарак сымарламаклан, бендӓ ӱзӓ чыкарды хертӱрлӱ тамахлык. Зерӓ нередӓ йок Закон, орада гӱнах ӧлӱ.

⁹ Бӓн вакыдын бириндӓ дирийдим, ачан билмӓрдим Закону. Ама ачан пейдаланды сымарламак, гӱнах дирилди, бӓн дӓ ӧлдӱм.

¹⁰ Сымарламак, ани лӓӓзымды йашамак версин, бени ӧлӱмӓ гӧтӱрдӱ.

¹¹ Зерӓ гӱнах, сымарламаклан файдаланарак, алдатты бени да бунуннан ӧлдӱрдӱ.

¹² Ӧлӓ ки, хич лафсыз, Закон – айоз, сымарламак да айоз, доору хем ии.

¹³ Озаман ии бишей, чыкэр, бана ӧлӱм гетирди? Олмаз! Ама гӱнах, файдаланарак ии бишейлӓн, бана ӧлӱм гетирӓрди, ки сымарламаклан ачылсын гӱнах некадар гӱнахлы.

Гӱнахлан дӱӱшмӓк

¹⁴ Хакына билериз, ани Закон духча бишей, ама бӓн тендӓн бир инсаным, сатылы гӱнаха чырак гиби.

¹⁵ Билмеерим, не йапэрым, зерӓ йапмээрым, не истеерим, ама йапэрым ону, недӓн азетмеерим.

¹⁶ Не йапэрым, бунуннан кайыл диилсейдим, бундан гӧрӱнер, ки кабледерим, ани Закон ии.

¹⁷ Бундан танынэр, ани артык буну йапмээрым бӓн, ама гӱнах йапэр, ани бендӓ йашээр.

¹⁸ Билерим, ани бендӓ, доорусу, беним тенимдӓ, йок иилик. Бендӓ вар ии истемеклӓр, ама йок кувет, йапайым не ии.

¹⁹ Зерӓ иилик, ани истеерим йапмаа, йапмээрым, ама кӧтӱлӱк, ани истӓмеерим йапмаа, ону йапэрым.

²⁰ Чӱнкӱ йапэрым, не истӓмеерим, буну йапан артык диил бӓн, ама гӱнах, ани бендӓ йашээр.

²¹ Ӧлӓ ки, кендимдӓ булэрым бир закон, ани истӓркӓн иилик йапмаа, кӧтӱлӱк бендӓ хазыр дурэр.

²² Ичйанкы адамдан хошлук алэрым Аллахын Законундан.

²³ Ама гӧрерим беним гӱӱдемин еклериндӓ бир башка закон, ани дӱӱшер закона каршы, ангысыны кабледерим фикиримнӓн, хем бени есир едер гӱнах законуннан, ани ишлеер беним гӱӱдемдӓ.

²⁴ Заваллыйым бӓн! Ким куртарабилир бени бу гӱӱдедӓн, ани ӧлӱмӓ гӧтӱрер?

²⁵ Шӱкӱр едерим Аллаха, Саабимиз Иисус Христос куртарэр бени. Ӧлӓ ки, бӓн кендим фикиримнӓн измет едерим Аллахын Законуна, ама тенимнӓн измет едерим гӱнах законуна.