Romalılara 5 - Ени Бааланты

Инанын файдасы

¹ Шинди инаннан доору сайылмыш, биз Аллахлан услулук едендик. Буну йапты Саабимиз Иисус Христос,

² ани бизӓ йол ачты, еденелим бу иивергийи, ангысыннан йашээрыз хем ӱӱнериз умутлан, пай алалым Аллахын метиннииндӓ.

³ Диил саде бунуннан, ама зеетлӓрлӓн дӓ ӱӱнериз, билерӓк, ани зеетлӓр дайанмак верер,

⁴ дайанмак дененмейи дӱзер, хем дененмӓк умут верер.

⁵ Умут да утандырмээр, зерӓ Аллахын севгилии бизим ӱреклеримизӓ дӧкӱлдӱ Айоз Духлан, Ангысы бизӓ верилди.

⁶ Зерӓ биз куветсизкӓн, Христос уйгун вакытта аллахсызлар ичин ӧлдӱ.

⁷ Зор булунур, ки бириси ӧлсӱн бир доору адам ичин, беки дӓ бир ии адам ичин биркимсей кыйышар ӧлмӓӓ.

⁸ Ама Аллах бунуннан бизӓ Кенди севгилиини гӧстерди, ани биз гӱнахкеркӓн, Христос бизим ичин ӧлдӱ.

⁹ Некадар таа чок шинди, незаман Онун каныннан доору сайылдык, Аллахын ӱфкесиндӓн Онун йардымыннан куртулаӂэз.

¹⁰ Зерӓ биз, ани Аллахын душманнарыйдык, Онуннан барыштык, чӱнкӱ Онун Оолу ӧлдӱ бизим ичин. Ӧлейсӓ, биз, барышмыш оларак, некадар таа колай куртулаӂэз Онун йашамасыннан.

¹¹ Диил саде бу, ама биз Аллахлан да ӱӱнериз, чӱнкӱ Саабимиз Иисус Христос шинди бизи Аллахлан барыштырды.

Ӧлӱм хем йашамак

¹² Ниӂӓ бир адамнан гӱнах бу дӱннейӓ гирди, гӱнахлан да ӧлӱм гирди, бутӱрлӱ ӧлӱм хепси инсана гечти, зерӓ хепси гӱнаха дӱштӱ.

¹³ Айоз Закондан ӧнӂӓ дӓ гӱнах варды дӱннедӓ, ама гӱнах есаба койулмээр, ачан йок закон.

¹⁴ Хеп окадар гӱнах заплады хепси инсаны Адамдан Моисейӓ кадар. Заплады оннары, ангылары гӱнаха гирмедилӓр Адам гиби, ангысы ӧрнек олду гелеӂек вакытлар ичин.

¹⁵ Ама Аллахын баашышы диил ниӂӓ Адамын гӱнахы. Зерӓ ниӂӓ бир адамын гӱнахы бетеринӓ чойу ӧлдӱ, окадар таа чок Аллахын иивергиси хем баашышы бир Адамын – Иисус Христозун – иивергисиннӓн ташкынныктан чойуна верилер.

¹⁶ Бу баашыш бенземӓз она, не олду бир адамын гӱнахындан сора. Зерӓ бир адам, гӱнах йаптыктан сора кабаатлы булунду. Ама баашыш, ани чок гӱнахлардан сора верилир, инсаны доору сайэр.

¹⁷ Ниӂӓ бир адамын гӱнахыннан ӧлӱм падишах гиби заплык алды бир адам бетеринӓ, окадар таа чок оннар, ким алэр Аллахын бол иивергисини хем доорулук баашышыны, бир Адамнан – Иисус Христозлан – йашамак булаӂэклар хем падишахлык едеӂеклӓр.

¹⁸ Ӧлӓ ки, ниӂӓ бир адамын гӱнахыннан хепси кабаатлы сайылды, хеп ӧлӓ бир Адамын доору йаптыыннан хепси доорулук хем йашамак булур.

¹⁹ Зерӓ, ниӂӓ бир адамын сеслемезлииннӓн чойу кабаатлы сайылды, хеп ӧлӓ бир адамын сеслемесиннӓн чойу доору сайылаӂэк.

²⁰ Айоз Закон сора верилди, ки кабаатлар зееделенсин, ама нередӓ гӱнах чоклашты, орада Аллахын иивергиси таа чок зееделенди,

²¹ ки ниӂӓ гӱнах ӧлӱмдӓн заплык алды, хеп ӧлӓ Аллахын иивергиси да инсаны доору саймасындан заплык алсын хем дивеч йашамак гетирсин Саабимиз Иисус Христозун араӂылыыннан.