Romalılara 4 - Ени Бааланты

Авраамын инаны бизӓ ӧрнек

¹ Не дейеӂез бизим гӱӱдейӂесинӓ дедемизин Авраамын дуруму ичин?

² Еер Авраам доору сайылайды кенди ишлериннӓн, озаман вардыр нейлӓн ӱӱнсӱн инсанын, ама диил Аллахын ӧнӱндӓ.

³ Зерӓ Айоз Йазы не деер? «Авраам инанды Аллахы, да бу она доорулук сайылды».

⁴ Ким ишлеер, ӧдеени саймаз баашыш, ама сайэр хак.

⁵ Ким кенди ишлеринӓ умутланмээр, ама инанэр Она, Ким аллахсызы доору сайэр, инаннан она доорулук сайылэр.

⁶ Давид дӓ мутлу сайэр ону, кими Аллах, бакмайарак йаптыкларына, доору сайэр. О деди:

⁷ «Одур мутлу, кимин законсузлуу афедилди хем гӱнахлары ӧртӱлдӱ!

⁸ Не мутлудур о адам, кимин гӱнахларыны Аллах есаба коймайаӂэк!»

⁹ Бу мутлулук саде кесикли оланнар ичин ми оса кесиксиз оланнар ичин дӓ ми? Биз деериз: «Авраам кенди инаныннан доору сайылды».

¹⁰ Незаман доору сайылды? Кесикликтӓн ӧнӂӓ ми оса кесикликтӓн сора мы? Диил кесикликтӓн сора, ама кесикликтӓн ӧнӂӓ.

¹¹ Кесиклик нышаныны каблетти ниӂӓ доорулук мӱхӱрӱ. Доорулуу инаннан еденди, таа кесикли олмадыйнан. Ӧлӓ ки, о олду хепси кесиксиз инанӂыларын бобасы, ки оннар да доору сайылсыннар дейни.

¹² Хем кесикли оланнарын да бобасы олду, ким диил саде кесикли, ама бобамызын Авраамын излериндӓн гидерлӓр, ангысы инанарды, таа кесикли олмадаан.

Инаннан адамак еденилер

¹³ Зерӓ Законнан верилмеди адамак Авраама хем онун ушакларына, ки дӱннейи елӓ алсыннар, ама доорулуклан, ани еденилер инаннан.

¹⁴ Еер мирасчылык олайды салт оннара, ким Закону тутэр, озаман инан бошуна калаӂэйды, адамак да файдасыз олаӂэйды.

¹⁵ Зерӓ Закон Аллахын ӱфкесини гетирер, ама нередӓ йок закон, орада йок закон басмасы да.

¹⁶ Онуштан адамак инана гӧрӓ еденилир, ки Аллахын иивергисиндӓн тутунсун да бутӱрлӱ каавиленсин Авраамын хепси ушакларына, диил саде оннара, ким Закону тутэр, ама хепсинӓ дӓ, ким инанэр Авраам гиби, ангысы хепсимизин бобасы.

¹⁷ Ниӂӓ вар йазылы: «Сени, боба оласын чок миллетлерӓ, йаптым». О Аллахын ӧнӱндӓ, Кими инанды, хепсимизӓ боба олду. Аллах Одур, Ким дирилдер ӧлӱлери хем варлаа чаарэр оннары, не йок.

¹⁸ Умут йоккан, Авраам умутланды хем инанды. Бутӱрлӱ олду чок миллетлерин бобасы, ниӂӓ Аллах она адамышты: «Сенин сенселӓн окадар чок олаӂэк, йылдызлар гиби».

¹⁹ Чӱнкӱ онун инаны йуфкаланмады, о бакмады ӧлӱ гиби гӱӱдесинӓ, ани йакын ӱз йашындайды, хем Сарранын ушаксызлыына.

²⁰ О Аллахын адамасында икилӓмеди хем инансыз олмады, ама инаны каавиленди да Аллахы метиннеди.

²¹ Бӱтӱн ӱректӓн инанды, ани Аллах не адады, хепсини таманнайабилир.

²² Онуштан о инаныннан доору сайылды.

²³ Диил салт Авраам ичин йазылы, ани «она доорулук сайылды»,

²⁴ ама бизим ичин дӓ, ани доору сайылаӂэз, зерӓ инанэрыз Она, Ким дирилтти Саабимизи Иисусу ӧлӱдӓн.

²⁵ Иисус бизим гӱнахларымыз ичин ӧлӱмӓ верилди хем бизим доору сайылмамыз ичин дирилдилди.