Romalılara 15 - Ени Бааланты

Каавилӓр сабурлу олсуннар зайыфларлан

¹ Биз, ани каавийиз инанда, дӱшер ташыйалым куветсизлерин зайыфлыкларыны да бакмайалым салт кенди хошлуумуза.

² Хербиримиз лӓӓзым беендирсин кендини йакын оланына иилик ичин, ки духча каавилендирсин ону.

³ Зерӓ Христос да бакмады Кендисини Кендинӓ беендирсин, ама ниӂӓ йазылы: «Сени кӧтӱлейеннерин кӧтӱлӱӱ Беним ӱстӱмӓ дӱштӱ».

⁴ Хепси, не ӧнӂӓ йазылыйды, йазылды бизим ӱӱренмемиз ичин, ки дайанмаклан хем хавезленмӓклӓн Айоз Йазылардан умудумузу коруйалым.

⁵ Аллах, Ким дайанмак хем хавезлик верер, баашласын сизӓ, ки бири-биринизлӓн бир дӱшӱнмектӓ оласыныз Иисус Христозун ӧрнеенӓ гӧрӓ.

⁶ Ӧлӓ ки, бирликтӓ, бир ааздан метиннейӓсиниз Аллахы – Саабимизин Иисус Христозун Бобасыны.

⁷ Онуштан бири-биринизи кабледин, ниӂӓ сизи дӓ Христос каблетти, Аллахын метиннии ичин.

⁸ Зерӓ деерим, ани Христос изметчи кесиклилӓр ичин олду, ки Аллахын инанчлыыны гӧстерсин, адамаклары каавилесин, ани бобаларымыза аданмышты,

⁹ ки башка миллетлӓр метиннесиннӓр Аллахы Онун аӂыйанныы ичин, ниӂӓ йазылы: «Онун ичин шӱкӱр едеӂӓм Сана миллетлерин арасында хем тӱркӱ Сенин адына чалаӂам».

¹⁰ Хеп ӧлӓ йазылы: «Миллетлӓр, севинин Онун инсаныннан барабар».

¹¹ Сора енидӓн денер: «Аллахы хепси миллетлӓр метиннесин, хем хепси халклар шаннасын».

¹² Хеп ӧлӓ Исайа деер: «Иессейин кӧкӱндӓн бир филиз чыкаӂэк, Ангысы ӱӱселеӂек, чорбаӂы миллетлерӓ олсун, миллетлӓр дӓ Она умутланаӂэклар».

¹³ Аллах, Ким умут бизӓ версин, сизи долдурсун хертӱрлӱ севинмӓклӓн хем услулуклан инанынызда, ки Айоз Духун кувединнӓн сизи умутлан зенгиннетсин.

Павли – Христозун изметкери миллетлерин арасында

¹⁴ Кардашларым, бӓн кендим чок инанэрым, ани сиз пек ииликчийсиниз, ии билерсиниз, не йапмаа, хем да беӂерерсиниз бири-биринизӓ насаат вермӓӓ.

¹⁵ Ама кыйышмаклан йаздым сизӓ, ки енидӓн аклыныза гетирейим кими ишлери Аллахын иивергисиннӓн, ани бана верди,

¹⁶ ки Иисус Христозун изметкери олайым миллетлерин арасында. Бӓн чалышэрым айоз изметчиликтӓ, насаат едерӓк Аллахын Ии Хаберини, ки миллетлӓр олсуннар Аллахтан кабледилмиш курбан гиби, ани Айоз Духтан айозланмыш.

¹⁷ Бу бетерӓ Иисус Христозда ӱӱнӓбилерим Аллаха изметчилиимдӓ.

¹⁸ Зерӓ кыйышаӂам лафетмӓӓ салт о ишлӓр ичин, не Христос йапты, бени кулланарак, ки миллетлӓр Ону сеслесиннӓр, лафларымнан хем ишлеримнӓн,

¹⁹ мераклы нышаннарын хем шашмаклы ишлерин кудретлииннӓн, Айоз Духун кувединнӓн. Ӧлӓ ки, Христос ичин Ии Хабери херердӓ насаат еттим, Иерусалимдӓн Иллирийа долайына кадар.

²⁰ Чалыштым насаат етмӓӓ Ии Хабери орада, нередӓ Христозун ады билинмӓрди, ки йывмайым бир темел ӱстӱндӓ, ани башкасындан койулу.

²¹ Ниӂӓ йазылы: «Оннар, ким Ондан хаберсизди, Ону гӧреӂеклӓр, хем оннар, ким Онун ичин ишитмедийдилӓр, аннайаӂэклар».

Павли истеер Ромайа гитмӓӓ

²² Буннарын бетеринӓ чок сыра кӧстек олду бана, сизӓ гелейим.

²³ Ама шинди йок бир иш билӓ, не тутабилсин бени бу ерлердӓ, да чӱнкӱ чок йыллардан беери истеерим сизӓ гелейим,

²⁴ бакаӂам уурайым сизӓ, ачан Испанийайа гидеӂӓм. Зерӓ умутланэрым, ӧнӂӓ сизи, гечӓркӓн, гӧрейим хем хошланайым баарлем бираз сизиннӓн калмактан, сора йардым едирсиниз бана, орайы гидейим.

²⁵ Ама шинди гидерим Иерусалимӓ, ки йардым Аллахын айоз халкына гӧтӱрейим.

²⁶ Зерӓ Македонийадан хем Ахайадан инанӂылар кайыл олдулар, топласыннар йардым фукааралар ичин Аллахын айоз халкындан, оннар ичин, кимнӓр йашээрлар Иерусалимдӓ.

²⁷ Елбетки кайыл олаӂэклар, чӱнкӱ оннар борчлу йардым етсиннӓр. Зерӓ башка миллетлӓр иудейлерин духча ииликлериндӓн пай алдылар, онун ичин оннар да борчлу йардым етсиннӓр гӱӱдейӂесинӓ.

²⁸ Йаптыктан сора бу иши – гӧтӱрдӱктӓн сора оннара хепси бу баашышлары, сиздӓн гечип, Испанийайа гидеӂӓм.

²⁹ Билерим, ани, ачан гелеӂӓм сизӓ, гелеӂӓм бӱтӱн иисӧзлемӓклӓн Христоздан.

³⁰ Йалварэрым, кардашлар, бизим Сааби Иисус Христос ичин хем Духун севгилии ичин, чалышын бенимнӓн барабар дуаларынызда Аллаха беним ичин,

³¹ ки куртулайым инансызлардан Иудейада, да Иерусалимӓ изметим ии кабледилсин Аллахын айоз халкындан,

³² да бутӱрлӱ, Аллах истӓрсӓ, севинмӓклӓн сизӓ гелейим хем бираз сериннейим сизин аранызда.

³³ Аллах, услулук верӓн, олсун сизиннӓн хепсинизлӓн! Амин.