Romalılara 14 - Ени Бааланты

Каави хем зайыф инан

¹ Ии кабледин оннары, ким инанда зайыф, ама санмаклар бетеринӓ чекишмейин.

² Бириси инанэр, ани вар насыл имӓӓ хепсиндӓн, ама зайыф олан ийер саде ешиллик.

³ Ким ийер хепсиндӓн, ашаалатмасын ону, ким имеер. Ким имеер, мааналамасын ону, ким ийер хепсиндӓн, зерӓ Аллах каблетмиш ону.

⁴ Кимсин сӓн, ани башкасынын изметкеринӓ маана булэрсын? О изметкери доору чыкармаа еки кабаатландырмаа – онун чорбаӂысынын иши. О доору чыкаӂэк, зерӓ Аллахын куведи вар, ону доору чыкарсын.

⁵ Бириси сайэр бир гӱнӱ таа ӱстӱн ӧбӱр гӱндӓн. Таа башкасы сайэр хепси гӱннери биртӱрлӱ. Херкези карар версин, нейи инанэр.

⁶ Ким гӱнӱ гӱндӓн сечер, Сааби ичин ӧлӓ йапэр. /Ким гӱнӱ гӱндӓн сечмеер, Сааби ичин сечмеер./ Ким ийер, Аллах ичин ийер, зерӓ Аллаха шӱкӱр едер. Ким имеер, Аллах ичин имеер, о да Аллаха шӱкӱр едер.

⁷ Кимсей биздӓн йашамээр кендиси ичин, хем кимсей ӧлмеер кендиси ичин.

⁸ Йашарсак, Сааби ичин йашээрыз. Ӧлӱрсӓк, Сааби ичин ӧлериз. Онуштан, йашарыз мы, ӧлӓриз ми, биз варыз Саабинин.

⁹ Зерӓ Христос онуштан ӧлдӱ хем дирилди, ки чорбаӂылык етсин ӧлӱлерин хем дирилерин ӱстӱнӓ.

¹⁰ Нечин сӓн маана булэрсын кардашына? Нечин ашаалээрсын кардашыны? Биз хепсимиз чыкаӂэз Аллахын даава скемнесинин ӧнӱнӓ.

¹¹ Зерӓ йазылы: «Бӓн варым, деер Сааби, хербири диз чӧкеӂек Беним ӧнӱмдӓ, хем хербир дил ачык шаатлык едеӂек, ани Бӓним Аллах».

¹² Ӧлӓ ки, хепсимиз ӂувап вереӂек кенди ичин Аллахын ӧнӱндӓ.

Гӱӂендирмейелим бизим кардашымызы

¹³ Онуштан маана булмайалым бири-биримизӓ, ама таа ии, карарлайын йапмайасыныз бишей, ани кӧстек олэр кардашыныза еки ону гӱнаха дӱшӱрӱр.

¹⁴ Бӓн билерим хем чок инанэрым, ниӂӓ бир инанӂы Сааби Иисуса, ани йок бишей диил пак кенди-кендинӓ. О иш диил пак саде оннара, ким сайэр ону диил пак.

¹⁵ Ама еер сӓн гӱӂендирӓрсейдин кардашыны имӓклӓн, озаман гезмеерсин артык севгилик йолунда. Йок етмӓ имӓклӓн биркимсейи, кимин ичин Христос ӧлдӱ.

¹⁶ Кӧтӱленмесин о, не сӓн ии сайэрсын.

¹⁷ Зерӓ Гӧк Падишахлыы диил имӓк хем ичмӓк, ама доорулук, услулук хем севинмӓк Айоз Духта.

¹⁸ Ким бутӱрлӱ измет едер Христоза, беенилмиш Аллахтан хем сайгы казанэр инсандан.

¹⁹ Ӧлӓ ки, бакалым йапмаа, не гетирер услулук хем духча каавилендирир бири-биримизи.

²⁰ Бир имӓк ичин йыкма Аллахын ишини. Доору сӧлемӓӓ, хер имӓк темиз, ама о адам кӧтӱлӱк йапэр, ангысы имӓклӓн кӧстек олэр башкасына.

²¹ Иидир имейӓсин йааны, ичмейӓсин шарап хем корунасын хепсиндӓн, не кӧстек олэр сенин кардашына, /еки недӓн о гӱнаха дӱшер еки йуфкаланэр/.

²² Вар мы инанын? Кору ону кендин ичин Аллахын ӧнӱндӓ. Не мутлу она, ким кендини кабаатламээр, ачан йапэр, не сайэр доору!

²³ Ама ким шӱпейлӓн ийер, кабаатлы олэр, зерӓ имеер инаннан. Не инансыз йапылэр, о гӱнах.