Romalılara 13 - Ени Бааланты

Заабитлери сеслейин

¹ Херкезиниз сеслесин ӱӱсек заабитлери, зерӓ йок заабитлик, ани Аллахтан олмасын. Заабит оланнар Аллахтан сыраланмыш.

² Онуштан, ким каршы дурэр заабитлерӓ, каршы дурэр сырайа, ани Аллахтан курулу. Каршы дураннар ӂезаланмыш олаӂэклар.

³ Зерӓ ӧндерӂилердӓн йок нечин коркмаа ии ишлӓр ичин, ама салт кӧтӱ ишлӓр ичин. Истеерсин коркмайасын заабитлердӓн ми? Йап ии ишлӓр, да о метедеӂек сени.

⁴ О – Аллахын изметкери сенин иилиин ичин. Ама еер кӧтӱ йапарсайдын, корк ондан, зерӓ о наафилӓ ташымээр кылыӂы. О Аллахын изметиндӓ, Онун ӱфкесиннӓн ӂезаласын кӧтӱ йапыӂылары.

⁵ Онуштан лӓӓзым бойнунузу иилдӓсиниз, диил саде Аллахын ӱфкесиндӓн, ама чӱнкӱ ӱреениздӓ билерсиниз, ани лӓӓзым бӧлӓ йапасыныз.

⁶ Онуштан харчлары ӧдейин, зерӓ заабитлӓр – Аллахын изметчилери, ани хожма чалышэрлар буну таманнамаа.

⁷ Хепсинӓ, кимӓ не борчлуйсунуз, верин. Кимӓ харч, верин харч, кимӓ верги, верин верги. Кимдӓн лӓӓзым коркмаа, ондан коркун. Кими лӓӓзым хатырламаа, ону хатырлайын.

Кардашчасына севгилик

⁸ Калмайын кимсейӓ бишей борчлу, бири-биринизи севмектӓн каарӓ. Зерӓ ким север башкаларыны, о Айоз Закону таманнээр.

⁹ Зерӓ сымарламаклар: «Ороспулук йапмайасын», «ӧлдӱрмейӓсин», «хырсызлык етмейӓсин», /«йаланӂы шаат олмайасын»,/ «тамахланмайасын» хем башка сымарламаклар да хепси бу лафта баалы бирердӓ: «Сев йакын оланыны, ниӂӓ кендини».

¹⁰ Севги йапмээр кӧтӱлӱк йакын оланына. Ӧлӓ ки, севги – Айоз Закону таманнамак.

¹¹ Йапын буну, билерӓк, не вакытта йашээрыз. Гелди артык заман уйкудан уйанмаа, зерӓ шинди бизӓ куртулмак таа йакын, некадар озаман, ачан инанмаа башладык.

¹² Геӂӓ илерлемиш, гӱндӱз йаклашэр. Онуштан бракылалым о ишлердӓн, не каранныкта йапылэр, да алалым силӓхлары, ани гӱндӱз кулланылэр.

¹³ Йакышыклы йашайалым, ниӂӓ гӱндӱз айдынныында лӓӓзым. Олмасын айып ииленмеклӓр, сарфошчулук, ороспулук хем башка утанч ишлӓр. Аранызда кавга хем кысканчлык олмасын.

¹⁴ Сааби Иисус Христос сизи корусун, силӓх гиби. Бакмайын таманнамаа тенин истедиклерини.