Romalılara 11 - Ени Бааланты

Аллах бракмады Кенди инсаныны

¹ Шинди сорэрым: Аӂаба Аллах Кенди инсанындан атылды мы? Олмаз! Бӓн кендим израиллийим, Авраамын сенселесиндӓн, Вениаминин тамызлыындан.

² Аллах ӱзӱнӱ чевирмеди Кенди инсанындан, ангысыны баштан билирди. Не, билмеерсиниз ми, не денер Айоз Йазыда пророк Илийа ичин, ниӂӓ о аалашэр Аллаха Израилдӓн? О деер:

³ «Сааби, Сенин пророкларыны ӧлдӱрдӱлӓр, курбанныкларыны йыктылар, калдым салт бӓн йалныз, беним дӓ йашамамы бакэрлар алсыннар».

⁴ Ама не ӂувап едер Аллах? «Корудум еди бин адам, ангылары диз чӧкмедилӓр Ваалын ӧнӱндӓ».

⁵ Хеп ӧлӓ бӱӱнкӱ вакытта да калды аз киши, ани сечилмиш Аллахын иивергисиннӓн.

⁶ Ама еер бу Онун иивергисиннӓн олмушсайды, артык оннарын йаптыкларыннан диил. Башка тӱрлӱ ииверги артык ииверги диил.

⁷ Не дейеӂез? Израил еденмеди, не аарарды, ама сечиленнӓр едендилӓр. Каланнар инатлаштылар,

⁸ ниӂӓ йазылы: «Аллах верди бир уйвашыклык духу оннара, ки гӧзлериннӓн гӧрмесиннӓр, кулакларыннан ишитмесиннӓр бӱӱнкӱ гӱнӓ кадар».

⁹ Давид деер: «Оннарын софралары аркан хем тузак гиби олсун, йада ниӂӓ бир капкан ӂезалык ичин оннара.

¹⁰ Гӧзлери карарсын, гӧрмесиннӓр дейни, хем аркалары херзаман камбурлансын».

¹¹ Шинди сорэрым: иудейлӓр кӧстеклендилӓр, хептӓн дӱшсӱннӓр дейни ми? Олмаз! Ама оннарын сӱрчмеклери куртулмак гетирди башка миллетлерӓ, ки бутакым иудейлердӓ дебрешсин кысканчлык.

¹² Еер оннарын сӱрчмеклери дӱннейӓ зенгинниксейди, хем кӱчӱлмеклери башка миллетлери зенгиннеттисейди, бӱтӱннӱклери некадар таа бӱӱк бир зенгинник гетиреӂек!

¹³ Данышэрым сизӓ, башка миллетлерӓ: ниӂӓ апостол, ани башка миллетлерӓ йолланмыш, бӓн кенди изметчилиими метинни сайэрым,

¹⁴ ки дебрештирейим кысканчлык беним сенселемдӓ да куртарабилейим баарлем кимисини.

¹⁵ Еер оннарын атылмаларыннан дӱннӓ Аллахлан барыштыйса, кабледилмелери, ӧлӱмдӓн йашамаа гечмектӓн башка, не олур?

¹⁶ Еер айозсайды хамурун илк парчасы, озаман бӱтӱн хамур айоз. Еер кӧкӱ айозсайды, даллары да айоз.

¹⁷ Зейтин фиданындан кими даллар кесилди, да сӓн, йабан зейтин фиданындан филиз, хашландын оннарын еринӓ. Аслы зейтин фиданын семиз кӧкӱндӓн суйу чекерсин.

¹⁸ Ӧлейсӓ, ӱӱнмӓ кесилмиш далларын ӧнӱндӓ. Еер ӱӱнӓрсейдин, унутма, ани тутмээрсын сӓн кӧкӱ, ама кӧк тутэр сени.

¹⁹ Сӓн деерсин: «Даллар кесилдилӓр, ки бӓн хашланайым».

²⁰ Доору. Оннар кесилдилӓр инансызлык бетеринӓ, ама сӓн инаннан айакча дурэрсын. Онуштан шишкинненмӓ, ама корк!

²¹ Зерӓ Аллах кыйды хакына фиданын далларыны, онуштан кыйар сени дӓ.

²² Есап ал Аллахын иилиини хем кыйаклыыны: кыйаклык оннар ичин, ким дӱштӱ, иилик сенин ичин, саде тутунарсайдын Аллахын иилииндӓн, башка тӱрлӱ сӓн дӓ кесилирсин.

²³ Еер оннар да калмарсайдылар инансызлыкта, енидӓн хакына фидана хашланаӂэклар, зерӓ Аллахын вар куведи енидӓн геери оннары хашласын.

²⁴ Еер сӓн кесилмишсейдин йабан фидандан да, олмайарак хакына, хашланмышсайдын ии зейтин фиданына, некадар таа колай олур, хашланылсын кенди даллары зейтин фиданына!

²⁵ Кардашлар, истӓмеерим, ани бу саклы иши билмейӓсиниз. Бу сизи коруйаӂэк, кендинизи аариф сайасыныз. Израил бир парча вакыда инатлашты, башка миллетлердӓн инанӂыларын сайысы таманнанынӂа.

²⁶ Биткидӓ бӱтӱн Израил куртулаӂэк, ниӂӓ йазылы: «Куртарыӂы Сиондан гелеӂек, Иаковун сойундан аллахсызлыы узаклаштыраӂэк.

²⁷ Будур баалантым, ани оннарлан йапаӂам, ачан оннарын гӱнахларыны силеӂӓм».

²⁸ Ии Хаберӓ каршы дуруп, оннар Аллаха душман олдулар, да бу ии олду сизин ичин. Ама чӱнкӱ Аллах оннары сечти, оннар Аллахын севилмишлери оннарын бобаларын хатыры ичин.

²⁹ Зерӓ Аллах карарыны дииштирмӓз оннар ичин, кими чаарэр хем кимӓ баашышларыны верӓр.

³⁰ Ниӂӓ сиз вакыдын бириндӓ сеслӓмӓрдиниз Аллахы, ама оннарын сеслӓмемеклерин бетеринӓ аӂыйаннык едендиниз Аллахтан,

³¹ хеп ӧлӓ, ниӂӓ сизӓ аӂыйаннык гӧстерилди, оннар да шинди сеслӓмеерлӓр, ки оннар да аӂыйаннык еденсиннӓр.

³² Зерӓ Аллах йапты хепси инсаны ниӂӓ капана дӱшмӱш сеслӓмемеклери бетеринӓ, ки хепсини аӂысын.

³³ Бакын, не дериндир Аллахын зенгиннии, аарифлии хем билгичлии! Некадар кенарсыз Онун карарлары хем танынмадык Онун йоллары!

³⁴ «Аӂаба ким таныйабилир Аллахын фикирини, хем ким вар насыл Онун насаатчысы олсун?

³⁵ Ким Аллаха бишей верди, ки сора ӧдек геери истесин?»

³⁶ Хепси Ондан курулду, Онун кувединнӓн корунэр хем Онун ичин вар. Она метинник даймалардан даймалара! Амин.