Matfey 9 - Ени Бааланты

Иисус алыштырэр кӧтӱрӱм адамы

¹ Иисус гирди бир кайык ичинӓ, гечти гӧлӱ да гелди Кенди касабасына.

² Гетирдилӓр Она бир кӧтӱрӱм хаста, ангысы йатарды дӧшек ӱстӱндӓ. Иисус, гӧрӱп оннарын инаныны, деди кӧтӱрӱм адама: «Гиргиннӓн, оолум! Гӱнахларын баашланды».

³ Билгичлердӓн кимиси кенди-кендинӓ дейӓрдилӓр: «Бу адам Аллахы кӧтӱлеер!»

⁴ Иисус таныйарды оннарын неетлерини, онуштан деди: «Нечин кӧтӱ неетлӓр пейдаланэр сиздӓ?

⁵ Не таа колай: демӓӓ „Гӱнахларын баашланды“ мы оса демӓӓ „Калк, да гез“ ми?

⁶ Ама ки билӓсиниз, ани Адам Оолунун вар куведи ер ӱстӱндӓ гӱнахлары баашласын…», – сора кӧтӱрӱм адама деди: «Калк, ал дӧшеени да гит евӓ!»

⁷ Кӧтӱрӱм адам калкты да евӓ гитти.

⁸ Инсан, ачан буну гӧрдӱ, коркту да Аллахы метиннеди, ани адамнара бӧлӓ кувет верер.

Иисус чаарэр Матфейи

⁹ Гечерӓк орадан, Иисус гӧрдӱ бир адам, ани отурарды ердӓ, нередӓ харч топланарды, ады Матфей. Иисус деди она: «Гел ардыма». Матфей калкты да Онун ардына гитти.

¹⁰ Ачан Иисус Матфейин евиндӓ софрада булунарды, гелди чок харччылар хем гӱнахкерлӓр, софрайа ерлештилӓр Иисуслан хем ӱӱрениӂилериннӓн барабар.

¹¹ Фарисейлӓр, гӧрӱп буну, ӱӱрениӂилерӓ дедилӓр: «Нечин сизин Ӱӱредиӂи ийер харччыларлан хем гӱнахкерлӓрлӓн барабар?»

¹² Иисус ишитти бу лафлары да деди: «Дофтор лӓӓзым диил саа оланнара, ама хасталара.

¹³ Гидин да ӱӱренин, не аннамасы вар бу сӧзлерин: „Аӂыйаннык истеерим, диил курбан“. Бӓн гелмедим, чаарайым доорулары, ама гӱнахкерлери, /Аллаха дӧнсӱннӓр/».

Оруч ичин соруш

¹⁴ Озаман гелерлӓр Она Иоанын ӱӱрениӂилери да деерлӓр: «Нечин биз хем фарисейлӓр сык оруч тутэрыз, ама Сенин ӱӱрениӂилерин оруч тутмээрлар?»

¹⁵ Иисус деди оннара: «Вар мы насыл дӱӱнӂӱлӓр ааласыннар окадар вакыт, некадар гӱвӓӓ йаннарында? Гелеӂек вакыт, ачан гӱвӓӓ алынаӂэк оннардан, озаман оннар оруч тутаӂэк.

¹⁶ Кимсей ески рубайа ени йама йамамээр, зерӓ о йама таа пек йыртэр рубайы. Сонда йыртык таа бӱӱк олэр.

¹⁷ Хеп ӧлӓ инсан ени шарабы ески тулумнар ичинӓ долдурмаз, зерӓ тулумнар патлээр. Шарап дӧкӱлер, тулумнар да зӓн олэр. Ени шарабы ени тулумнар ичинӓ долдурэрлар, бутӱрлӱ икиси дӓ корунэр».

Кыз дирилер, хаста кары алышэр

¹⁸ Ачан Иисус сӧлӓрди бу сӧзлери, бир синагога ӧндерӂиси гелди, Она баш иилтти да деди: «Беним кызым шинди ӧлдӱ. Гел да кой еллерини онун ӱстӱнӓ, да о йашасын».

¹⁹ Иисус калкты да ӱӱрениӂилериннӓн онун ардына гитти.

²⁰ Бир кары, оники йылдан беери хаста кан акмасындан, йаклашты Иисуса ардындан да дииди Онун рубасынын етеенӓ.

²¹ О аклынӂа дейӓрди: «Саде диисӓм Онун рубасына, алышаӂам».

²² Иисус дӧндӱ геери, гӧрдӱ ону да деди: «Гиргиннӓн, кызым! Сенин инанын сени алыштырды». О кары хемен саа олду.

²³ Ачан Иисус етишти ӧндерӂинин евинӓ, гӧрдӱ кавалларлан чаланнары хем инсан баарышыны.

²⁴ Озаман деди оннара: «Олун бир тарафа, зерӓ кыз ӧлмеди, саде уйуйэр!» Оннар гӱлмӓӓ алдылар Ону.

²⁵ Ачан инсан чыкарылды дышары, Иисус гирди ичйанына, тутту кызы елиндӓн, да кыз калкты.

²⁶ Бу олушун хабери даалды бӱтӱн о ерӓ.

Ики кӧӧр саа олэр

²⁷ Ачан Иисус йолланды орадан, Онун ардына такышты ики кӧӧр адам. Оннар баарардылар: «/Иисус,/ Давидин оолу, аӂы бизи!»

²⁸ Ачан гирди ичери, бу кӧӧр адамнар йаклаштылар Она. Иисус сорду оннара: «Инанэрсыныз мы, ани вар ниӂӓ йапайым буну?» «Вар ниӂӓ, Сааби», – ӂувап еттилӓр оннар.

²⁹ Озаман дииди оннарын гӧзлеринӓ да деди: «Олсун инаныныза гӧрӓ!»

³⁰ Да ачылды оннарын гӧзлери. Иисус сыкыдан сымарлады оннара: «Бакын, билмесин кимсей!»

³¹ Ама оннар, чыкып дышары, бӱтӱн о ерӓ дааттылар хабери Иисус ичин.

Бир муту саа олэр

³² Ачан гиттилӓр бу кӧӧр адамнар, Иисуса гетирдилӓр бир муту, тутулмуш фена духтан.

³³ Ачан фена дух чыкарылды ондан, муту башлады лафетмӓӓ. Инсан шашты да деди: «Хич бир сыра бӧлӓ иш гӧрӱнмеди Израилдӓ».

³⁴ Ама фарисейлӓр дейӓрдилӓр: «О фена духлары чыкарэр фена духларын ӧндерӂисинин кувединнӓн!»

Гӱдӱӂӱсӱз койуннар

³⁵ Иисус гезӓрди кӱӱдӓн кӱӱйӓ хем касабадан касабайа. Ӱӱредӓрди инсаны синагогалар ичиндӓ. Насаат едӓрди Ии Хабери Гӧк Падишахлыы ичин. Алыштырарды хертӱрлӱ хасталыклары хем дертлери.

³⁶ Гӧрӱп алай-алай инсан, ӂаны аӂыды оннара, зерӓ оннар зеетленмишти хем даалмышты, ниӂӓ гӱдӱӂӱсӱз койуннар.

³⁷ Озаман ӱӱрениӂилеринӓ деди: «Берекет бӱӱк, ама ишчи аз!

³⁸ Онуштан дуа един берекет Чорбаӂысына, чыкарсын ишчи екиннерини топламаа».