Matfey 4 - Ени Бааланты

Шейтан денеер Иисусу

¹ Озаман Иисус Айоз Духлан чола гӧтӱрӱлдӱ, ки диаволдан дененилмиш олсун.

² Иисус кырк гӱн хем кырк геӂӓ оруч тутту да сонда аӂыкты.

³ Денейиӂи, Она йаклашып, деди: «Еер Сӓн Аллахын Оолусайдын, сымарла бу ташлара, екмек олсуннар».

⁴ Иисус ӂувап етти: «Йазылы, ани „Адам йашамээр салт екмеклӓн, ама хербир сӧзлӓн, ани чыкэр Аллахын аазындан“».

⁵ Сора алэр Ону диавол айоз касабайа да койэр Айоз бина сачаана,

⁶ да деер Она: «Еер Сӓн Аллахын Оолусайдын, атыл ерӓ, зерӓ йазылы: „Аллах Кенди ангиллеринӓ сымарлайаӂэк, Сени баксыннар“ хем „Сени куӂак алаӂэклар, урулмайасын айааннан бир таша дейни“».

⁷ Иисус деди: «Хеп ӧлӓ йазылы вар: „Денӓмӓ сенин Сааби Аллахыны“».

⁸ Сора диавол Ону бир пек ӱӱсек байыр ӱстӱнӓ гӧтӱрдӱ. Гӧстерди Она дӱннейин хепси падишахлыкларыны хем оннарын метинниини да деди:

⁹ «Буннары хепсини Сана вереӂӓм, еер, дӱшӱп, бана баш иилдӓрсӓн».

¹⁰ Озаман Иисус ӂувап етти она: «Чекил Бендӓн, шейтан, зерӓ вар йазылы: „Баш иилт Сенин Сааби Аллахына хем салт Она измет ет“».

¹¹ Озаман диавол Ону бракты. Ангиллӓр, гелип, измет етмӓӓ Иисуса башладылар.

Иисус башлээр насаат етмӓӓ

¹² Иисус ачан ишитти, ани Иоан капана койулду, дӧндӱ геери Галилейайа.

¹³ Бракып Назарети, гелди да ерлешти Капернаум касабасында, гӧл бойунда, Завулон хем Неффалимин ерлериндӓ,

¹⁴ ки таманнансын, не хаберленмишти пророк Исайадан, ангысы деер:

¹⁵ «Завулонун хем Неффалимин ерлери гӧл бойунда, Иордан ашыры, Галилейа, нередӓ йабанӂылар йашээрлар!

¹⁶ Каранныкта йашайан инсан гӧрдӱ бӱӱк шафк. Ӧлӱм гӧлгесинин мемлекетиндӓ йашайаннара шафк дууду».

¹⁷ Ондан сора Иисус башлады насаат етмӓӓ хем демӓӓ: «Дӧнӱн Аллаха гӱнахларыныздан, зерӓ йаклашты Гӧк Падишахлыы».

Иисусун илк ӱӱрениӂилери

¹⁸ Ачан Иисус гечӓрди Галилейа гӧлӱн бойундан, гӧрдӱ ики кардаш: Симону, ангысына дейӓрдилӓр Петри, хем Андрейи, онун кардашыны, ангылары атарды сӱзмейи су ичинӓ, чӱнкӱ оннар балыкчыйды.

¹⁹ Иисус деди оннара: «Гелин Беним ардыма, сизи инсан тутаннары йапаӂам».

²⁰ Оннар чабук бракты сӱзмелери да гитти Онун ардына.

²¹ Гидип орадан таа илери, гӧрдӱ башка ики кардаш: Иакову, Зеведейин оолуну, хем Иоаны, онун кардашыны, ангылары кенди бобаларыннан, Зеведейлӓн, кайык ичиндӓ сӱзмелерини тертиплӓрди. Оннары да чаарды.

²² Оннар чабук бракты кайыы хем бобаларыны да гитти Онун ардына.

Иисус ичин хабер даалэр

²³ Иисус гезӓрди бӱтӱн Галилейада хем ӱӱредӓрди инсаны синагогаларда, насаат едерӓк Гӧк Падишахлыы ичин Ии Хабери. Алыштырарды хертӱрлӱ хасталыктан хем дерттӓн инсаны.

²⁴ Онун ичин хабер даалды бӱтӱн Сирийа ерлериндӓ. Она гетирӓрдилӓр хепсини, ким зеетленӓрди хертӱрлӱ хасталыктан, аарыдан, фена духлардан, кара хасталыктан хем паралич хасталыындан. Оннара саалык верӓрди.

²⁵ Онун ардына гидӓрди чок инсан Галилейадан, Декаполистӓн, Иерусалимдӓн, Иудейадан хем Иорданын ӧбӱр тарафындан.