Matfey 27 - Ени Бааланты

Иисусу гӧтӱрерлӓр кулланыӂы Пилата

¹ Ачан сабаа олду, бӱӱк попазлар хем халк аксакаллары аннаштылар Иисусу ӧлдӱрсӱннӓр.

² Баалайып Ону, гӧтӱрдӱлӓр да вердилӓр кулланыӂы Понтий Пилата.

Иуда асылэр

³ Ачан Иуда, ани сатты Иисусу, аннады, ани Иисусу даавайа вердилӓр, пишман олду. Гетирди геери отуз гӱмӱшӱ да верди бӱӱк попазлара хем аксакаллара.

⁴ О деди: «Гӱнаха гирдим, зерӓ кабаатсыз адам каны саттым». «Бизӓ не? Сӓн кендин бак», – ӂувап етти оннар.

⁵ Иуда атты гӱмӱшлери Айоз бина ичинӓ, сора гитти да асылды.

⁶ Бӱӱк попазлар топладылар гӱмӱшлери да дедилӓр: «Дӱшмӓр коймаа бу парайы Айоз бинанын хазнасына, зерӓ бу кан парасы».

⁷ Аннаштылар бу парайлан чӧлмекчинин тарласыны сатын алсыннар, мезар ери олсун, йабанӂылары гӧммӓӓ дейни.

⁸ Онуштан бӱӱнкӱ гӱнӓ кадар бу тарланын ады: «Кан тарласы».

⁹ Озаман таманнанды, не хаберледийди пророк Иеремийа, ангысы деер: «Алдылар отуз гӱмӱшӱ, паа курушуну, ани Израил ооллары курду Онун ичин,

¹⁰ да вердилӓр чӧлмекчинин тарласы ичин, ниӂӓ бана Сааби сӧледи».

Иисус Пилатын ӧнӱндӓ

¹¹ Иисус чыкты кулланыӂынын ӧнӱнӓ, ангысы сорду Она: «Сӓнсин ми Иудейлерин Падишахы?» «Ӧлӓ, ниӂӓ сӧлеерсин», – ӂувап етти Иисус.

¹² Ама бӱӱк попазларын хем аксакалларын амазларына хич ӂувап етмеди.

¹³ Озаман Пилат деди Она: «Не, ишитмеерсин ми, некадар чок кабаатландырэрлар Сени?»

¹⁴ Иисус она хич бир дӓ лаф ӂувап етмеди. Кулланыӂы буна пек шашты.

Иисус хем Варавва

¹⁵ Хер Паскеллӓ йортусунда кулланыӂы, адетинӓ гӧрӓ, колверӓрди капанӂылардан бирисини, кими инсан истӓрди.

¹⁶ О вакыт капалыйды бир анылмыш адам, ады Варавва.

¹⁷ Ачан хепси топлуйдулар, Пилат сорду оннара: «Кими истеерсиниз колверейим? Вараввайы мы оса Иисусу му, Ангысына денер Христос?»

¹⁸ Зерӓ билӓрди, ани хасеетлик бетеринӓ вердилӓр Иисусу онун елинӓ.

¹⁹ Ачан Пилат таа отурарды даава скемнесиндӓ, онун карысы йоллады она, сӧлесиннӓр: «Бак йапмайасын бишей бу доору адама. Бу геӂӓ чок зеет чектим, ачан Ону дӱшӱмдӓ гӧрдӱм».

²⁰ Бӱӱк попазлар хем аксакаллар кызыштырдылар инсаны истесиннӓр Вараввайы, ама Иисусу ӧлдӱрсӱннӓр.

²¹ Кулланыӂы сорду оннара: «Ангысыны оннарын икисиндӓн колверейим?» «Вараввайы!» – баардылар оннар.

²² Пилат деди оннара: «Не йапайым Иисуслан, Ангысына денер Христос?» «Герилмиш олсун ставроза!» – баардылар оннар.

²³ Кулланыӂы деди: «Е не кӧтӱлӱк йапты?» Ама оннар чекеттилӓр таа пек баармаа: «Герилмиш олсун ставроза!»

²⁴ Ачан Пилат гӧрдӱ, ани бишей йапамээр, буна каршы, калабалык дебрешер, алды су, йыкады еллерини инсанын ӧнӱндӓ да деди: «Бӓн диилим кабаатлы бу доору Адамын каны ичин. Бакын кендиниз!»

²⁵ Хепси инсан ӂувап етти: «Онун каны дӱшсӱн бизим ӱстӱмӱзӓ хем бизим ушакларымызын ӱстӱнӓ».

Аскерлӓр гӱлмӓӓ алэрлар Иисусу

²⁶ Озаман Пилат колверди Вараввайы, ама Иисусу камчылайып, верди, ки герсиннӓр ставроза.

²⁷ Сора кулланыӂынын аскерлери гӧтӱрдӱлӓр Иисусу Преториума. Онун долайына топландылар хепси аскерлӓр.

²⁸ Сойундурдулар Онун рубаларыны да гиидирдилӓр кырмызы ӱст руба.

²⁹ Ӧрдӱлӓр тикенни чалыдан бир фенец да койдулар Онун башына, сора вердилӓр бир сопа саа елинӓ. Диз чӧкӱрдӱлӓр ӧнӱндӓ да, гӱлмӓӓ алып, дейӓрдилӓр: «Селӓм Сана, Иудейлерин Падишахы!»

³⁰ Тӱкӱрӱрдӱлӓр Онун ӱстӱнӓ, сора алып сопайы, кафасына урурдулар.

³¹ Гӱлмӓӓ алдыктан сора сойундурдулар кырмызы ӱст рубайы, гиидирдилӓр Кенди рубаларыны да гӧтӱрдӱлӓр Ону, ставроза гермӓӓ.

Иисусу герерлӓр ставроза

³² Касабадан чыкаркан, каршы гелдилӓр киринели бир адамнан, ады Симон. Ону зорладылар, гӧтӱрсӱн Иисусун ставрозуну.

³³ Ачан етиштилӓр о ерӓ, ани ады Голгофа, аннамасы «баш кемии ери»,

³⁴ вердилӓр ичсин шарап, карышык аӂы бишейлӓн, ама Иисус, дадып, истӓмеди ичсин.

³⁵ Гердиктӓн сора, аттылар четелӓ да пайеттилӓр Онун рубаларыны.

³⁶ Сора отурдулар да йанында бекчилик едӓрдилӓр.

³⁷ Башы ӱстӱндӓ тактылар кабаатыны, йазылы: «Иисус – Иудейлерин Падишахы».

³⁸ Онуннан барабар ставроза гердилӓр ики хайдут: бирисини саа, ӧбӱрӱнӱ дӓ сол тарафына.

³⁹ Орадан геченнӓр кӧтӱлӓрдилӓр Ону да, башларыны саллайарак, дейӓрдилӓр:

⁴⁰ «Сӓн, ани йыкэрсын Айоз бинайы да ӱч гӱндӓ енидӓн йапэрсын, еер Сӓн Аллахын Оолусайдын, куртар Кендини да ин ерӓ ставроздан!»

⁴¹ Хеп ӧлӓ бӱӱк попазлар, билгичлӓр хем аксакаллар /фарисейлӓрлӓн барабар/ гӱлмӓӓ алардылар Ону да дейӓрдилӓр:

⁴² «О башкаларыны куртарды, ама Кендини куртарамээр! Еер О Израилин падишахыйса, инсин ерӓ ставроздан, да биз инанаӂэз Она!

⁴³ Умутланарды Аллаха, ко шинди куртарсын Ону Аллах, еер Ону севӓрсӓ. Зерӓ О Кенди дейӓрди: „Бӓн Аллахын Оолуйум!“»

⁴⁴ Хайдутлар, ани герилийдилӓр Онуннан, хеп ӧлӓ кӧтӱлӓрдилӓр Ону.

Иисус ӧлер

⁴⁵ Алтынӂы сааттан докузунӂу саада кадар олду караннык бӱтӱн мемлекеттӓ.

⁴⁶ Докузунӂу саадын долайында Иисус баарды бӱӱк сеслӓн: «Ели! Ели! Лема шевактани?» Аннамасы: «Аллахым! Аллахым! Нечин Бени брактын?»

⁴⁷ Орада дураннардан кимиси, ишидип бу лафлары, дедилӓр: «О чаарэр Илийайы!»

⁴⁸ Бириси качты, чабук алды бир сӱнкер, бандырды ону ииши шарап ичинӓ да, такып бир сопайа, верди, ичсин.

⁴⁹ Ама каланы дейӓрдилӓр: «Дурун, бакалым, гелеӂек ми Илийа, куртарсын Ону?»

⁵⁰ Иисус енидӓн баарды бӱӱк сеслӓн да верди духуну.

Айоз бинанын пердеси йыртылэр

⁵¹ Бирдӓн Айоз бинанын ичиндӓ пердӓ йыртылды ики парчайа, йукардан ашаа кадар. Ер тепреди, ташлар чатладылар,

⁵² мезарлар ачылдылар. Чок айозларын гӱӱделери, ани ӧлдӱйдӱлӓр, дирилдилӓр

⁵³ да, мезарлар ичиндӓн чыкып, Онун дирилмесиндӓн сора гирдилӓр айоз касабайа да чойуна гӧстерилдилӓр.

⁵⁴ Аскер ӱзбашы хем аскерлӓр, ани бекчилик едӓрдилӓр Иисусун йанында, ачан гӧрдӱлӓр ер тепремесини хем хепсини, не олду, пек корктулар да дедилӓр: «Хакына, О Аллахын Оолуйду!»

⁵⁵ Орада варды чок кары, ангылары узактан сииредӓрдилӓр, хем ангылары Галилейадан гиттийдилӓр Иисусун ардына, измет едерӓк Она.

⁵⁶ Оннарын арасында Марийа Магдалина хем Марийа, Иаковун хем Иосифин аналары, хем Зеведейин оолларын аналары.

Иисусу гӧмерлӓр

⁵⁷ Авшамнен гелди бир зенгин адам, ады Иосиф, Аримафейа касабасындан, хеп Иисусун ӱӱрениӂилериндӓн.

⁵⁸ Гитти Пилата да истеди Иисусун гӱӱдесини. Пилат изин етти, версиннӓр она.

⁵⁹ Иосиф алды гӱӱдейи да сарды бийаз кетен чаршафлан,

⁶⁰ ерлештирди Ону кенди мезары ичинӓ, ангысыны оймушту канарада. Сора девирди бир бӱӱк таш мезарын капусуна да гитти.

⁶¹ Орадайды Марийа Магдалина хем ӧбӱр Марийа. Оннар отурурдулар мезара каршы.

Бекчилӓр мезарда

⁶² Ертеси гӱнӱ, ӂумаа гӱнӱндӓн сора, бӱӱк попазлар хем фарисейлӓр топландылар Пилатын ӧнӱнӓ да дедилӓр:

⁶³ «Чорбаӂы, биз аклымыза гетирдик, ани о алдадыӂы, таа йашаркан, деди: „Ӱчӱнӂӱ гӱнӱ дирилеӂӓм“.

⁶⁴ Онуштан сымарла, бекленилсин мезар ӱчӱнӂӱ гӱнӓ кадар, ки биртӱрлӱ гелмесиннӓр Онун ӱӱрениӂилери геӂӓ да чалмасыннар гӱӱдесини, сора демесиннӓр инсана, ани дирилди ӧлӱдӓн. Бу сон йалан олаӂэк таа кӧтӱ илкинкисиндӓн».

⁶⁵ Пилат деди: «Вар бир бӧлӱк бекчиниз, гидин да коруйун мезары, ниӂӓ билерсиниз».

⁶⁶ Оннар гиттилӓр да корудулар мезары бекчилӓрлӓн, мӱхӱрлейип ташы.