Matfey 26 - Ени Бааланты

Иисусу ӧлдӱрмӓк ичин неет

¹ Хепсини буннары аннаттыктан сора Иисус деди Кенди ӱӱрениӂилеринӓ:

² «Билерсиниз, ани ики гӱндӓн сора Паскеллӓ йортусу олаӂэк? Озаман Адам Оолу даавайа верилеӂек, ставроза герилмиш олсун».

³ Озаман топландылар бӱӱк попазлар, билгичлӓр хем халк аксакаллары Кайафанын, баш попазын, аулу ичинӓ.

⁴ Да аннаштылар, несой шалвирликлӓн тутсуннар Иисусу да ӧлдӱрсӱннӓр.

⁵ Ама дедилӓр: «Салт олмаз буну йапмаа йортуда, ки инсан дебрешмесин».

Бир кары йаалээр Иисусу

⁶ Ачан Иисус булунарды Вифанийа кӱӱйӱндӓ, лепралы Симонун евиндӓ,

⁷ Она йаклашты бир кары ак мермер кап ичиндӓ пек паалы кокулуклан, да Иисус софрада булунуркан, кокулуу дӧктӱ Иисусун башына.

⁸ Ӱӱрениӂилӓр, ачан гӧрдӱлӓр буну, ӱфкеленип, дедилӓр: «Не лӓӓзымды йапылсын бу зӓннык?

⁹ Бу кокулуу варды насыл сатмаа чок парайа да буну фукааралара вермӓӓ».

¹⁰ Иисус билӓрди, не лафедӓрдилӓр, да деди оннара: «Нечин гӱӂендирерсиниз карыйы? О бир йакышыклы иш йапты Беним ичин.

¹¹ Фукааралар херзаман сизиннӓн, ама Бӓн херзаман олмайаӂам.

¹² Дӧкӱп бу кокулуу гӱӱдемин ӱстӱнӓ, хазырлады Бени гӧмӱлмӓк ичин.

¹³ Доору сӧлеерим сизӓ, ани бӱтӱн дӱннедӓ, нередӓ Ии Хабер насаат олаӂэк, бу карынын йаптыы сӧленеӂек да она анылмак олаӂэк».

Иуда сатэр Иисусу

¹⁴ Озаман оники ӱӱрениӂидӓн бириси, Иуда Искариот, гитти бӱӱк попазлара

¹⁵ да деди: «Не вереӂениз бана, еер верирсейдим Иисусу сизин елинизӓ?» Оннар ададылар, вермӓӓ она отуз гӱмӱш.

¹⁶ Бундан сора Иуда аарарды уйгун вакыт, ки версин Иисусу оннарын еллеринӓ.

Паскеллӓ софрасы

¹⁷ Хамурсуз йортунун илк гӱнӱндӓ ӱӱрениӂилӓр гелдилӓр Иисуса да дедилӓр Она: «Нередӓ истеерсин хазырлайалым Сана Паскеллӓ имеени?»

¹⁸ О деди: «Гидин касаба ичинӓ, те о филан адама да дейин она: „Ӱӱредиӂи деер: Беним вакыдым йаклашты, сендӓ йортулайаӂам Паскеллейи ӱӱрениӂилеримнӓн“».

¹⁹ Ӱӱрениӂилӓр йаптылар ӧлӓ, ниӂӓ Иисус сымарлады, да хазырладылар Паскеллейи.

²⁰ Авшамнен Иисус оники ӱӱрениӂисиннӓн ерлешти софрайа.

²¹ Оннар ийӓркӓн, Иисус деди: «Доору сӧлеерим сизӓ, ани сиздӓн бириси Бени сатаӂэк».

²² Оннар пек кахырландылар да башладылар бири-бири арды сора Она сормаа: «Аӂаба, диилим ми Бӓн, Сааби?»

²³ Иисус ӂувап етти: «Ким узатты елини Бенимнӓн чини ичинӓ, о Бени сатаӂэк.

²⁴ Хакына, ани Адам Оолу гидер, ниӂӓ Онун ичин йазылы. Ама вай о адама, кимдӓн Адам Оолу сатылэр! Она таа ии олаӂэйды, хич дуумасын!»

²⁵ Иуда, ани сатты Ону, деди: «Ӱӱредиӂи, аӂаба диилим ми бӓн?» «Ӧлӓ, ниӂӓ сӧледин», – ӂувап етти Иисус.

Комка

²⁶ Ачан оннар ийӓрдилӓр, Иисус алды бир екмек, иисӧзледи, кырды да верди ӱӱрениӂилеринӓ, дейип: «Алын да ийин, бу – Беним гӱӱдӓм».

²⁷ Сора алды бир чӧлмек, шӱкӱр етти Аллаха, верди оннара, дейип: «Ичин хепсиниз ондан,

²⁸ зерӓ бу – Беним каным, ени баалантынын каны, ани дӧкӱлер чойу ичин, ки гӱнахлары баашлансын.

²⁹ Сӧлеерим сизӓ, ани бӱӱндӓн ӧтӓӓ ичмейеӂӓм бу чотук мейвасындан о гӱнӓ кадар, ачан ичеӂӓм таазесини сизиннӓн Бобамын Падишахлыында».

Петринин атылмасы ичин хабер

³⁰ Бир псалма чалдыктан сора, оннар гиттилӓр Зейтин байырына.

³¹ Иисус деди оннара: «Хепсиниз бу геӂӓ Беним бетеримӓ сӱрчеӂениз, зерӓ вар йазылы: „Ураӂам Гӱдӱӂӱйӱ, да койуннар даалаӂэк“.

³² Ама дирилдиктӓн сора сиздӓн ӧнӂӓ Галилейайа гидеӂӓм».

³³ Петри ӂувап етти Она: «Хепси сӱрчӓрсейди Сенин бетеринӓ, бӓн бир сыра билӓ сӱрчмейеӂӓм».

³⁴ Иисус она деди: «Доору сӧлеерим сана, ани бу геӂӓ, хороз ӧтӱнӂӓ, сӓн ӱч сыра атылаӂан Бендӓн».

³⁵ Петри деди: «Еер лӓӓзым оларсайды ӧлейим дӓ Сениннӓн, хеп окадар атылмарым Сендӓн». Калан ӱӱрениӂилӓр дӓ хеп ӧлӓ лафеттилӓр.

Иисус Гефсимани башчесиндӓ

³⁶ Сора Иисус оннарлан гитти бир ерӓ, ады Гефсимани. Да деди ӱӱрениӂилеринӓ: «Отурун бурада. Бӓн гидеӂӓм орайы, дуа едейим дейни».

³⁷ Алды Петрийи хем Зеведейин ики оолуну да башлады кахырланмаа хем зеетленмӓӓ.

³⁸ Иисус деди оннара: «Ӂаным кахырлы ӧлӱмӓдӓн. Калын бурада Бенимнӓн да кушку олун!»

³⁹ Сора гитти бираз таа илери, дӱштӱ ӱзӱкойну ерӓ да башлады дуа етмӓӓ: «Бобам, еер варсайды ниӂӓ, ко ашсын бу аӂы чӧлмек Бендӓн. Хеп окадар олсун диил ӧлӓ, ниӂӓ Бӓн истеерим, ама ниӂӓ Сӓн».

⁴⁰ Сора гелди ӱӱрениӂилеринӓ, булду оннары уйуйаркан да деди Петрийӓ: «Не бир саат баарлем кушку дурамадыныз Бенимнӓн?

⁴¹ Кушку олун хем дуа един, ки денемейӓ дӱшмейӓсиниз. Дух хавез, ама тен куветсиз».

⁴² Гитти енидӓн икинӂи сыра дуа етмӓӓ да деди: «Бобам, еер йоксайды ниӂӓ ашсын бу чӧлмек Бендӓн, ки ичмейим ону, ко олсун Сенин истедиин».

⁴³ Сора Иисус енидӓн дӧндӱ геери ӱӱрениӂилеринӓ да булду оннары уйуйаркан, зерӓ уйкудан аарлашмышты гӧзлери.

⁴⁴ Енидӓн бракып оннары, узаклашты да дуа етти ӱчӱнӂӱ сыра, дейип хеп о лафлары.

⁴⁵ Сора гелди ӱӱрениӂилеринӓ да деди оннара: «Сиз хеп таа уйуйэрсыныз хем динненерсиниз ми? Тӓ гелди саат, ачан Адам Оолу верилер гӱнахкерлерин елинӓ.

⁴⁶ Калкын, гиделим! Тӓ, Беним сатыӂым йаклашты».

Иисус тутулэр

⁴⁷ Иисус таа лафедӓркӓн, гелди Иуда, оникидӓн бириси, хем онуннан барабар чок инсан кылычларлан хем мочугаларлан, йолланылмыш бӱӱк попазлардан хем халк аксакалларындан.

⁴⁸ Сатыӂы вердийди оннара бутӱрлӱ нышан: «Кими ӧпеӂӓм, Одур Иисус, Ону тутун!»

⁴⁹ Бирдӓн йаклашты Иисуса да деди: «Селӓм, Ӱӱредиӂи!», сора ӧптӱ Ону.

⁵⁰ Иисус деди она: «Достум, не гелдин йапмаа, йап!» Озаман инсаннар йаклаштылар Иисуса да, узадып еллерини, туттулар Ону.

⁵¹ Бириси, ани Иисуслан барабарды, узатты елини да чыкарды кылыӂыны, урду баш попазын кулуна да кести онун кулааны.

⁵² Озаман Иисус деди: «Кой кылыӂыны еринӓ, зерӓ херкези, ким кылыч чыкарэр, кылычтан ӧлдӱрӱлер.

⁵³ Оса санэрсын, йок насыл йалварайым Бобама, ки йолласын Бана йардыма ангиллери, оники легиондан зеедӓ ми?

⁵⁴ Ама озаман несой таманнанаӂэк Айоз Йазылар, ангылары деер, ани хепси бӧлӓ лӓӓзым олсун?»

⁵⁵ Озаман Иисус деди инсана: «Сиз чыктыныз Бени тутмаа, ниӂӓ бир хайдуду, кылычларлан хем мочугаларлан. Хер гӱн отурурдум Айоз бинада, ӱӱредерӓк инсаны, да тутмадыныз Бени.

⁵⁶ Ама хепси буннар олду, ки таманнансын пророкларын йазылары». Бундан сора хепси ӱӱрениӂилӓр брактылар Ону да качтылар.

Иисус Синедрионун ӧнӱндӓ

⁵⁷ Иисусу тутаннар гӧтӱрдӱлӓр Ону баш попаза, Кайафайа, кимин евиндӓ топланмышты билгичлӓр хем аксакаллар.

⁵⁸ Петри гидӓрди Онун ардына узактан-узаа, баш попазын аулуна кадар. Сора гирди аул ичинӓ, отурду бекчилӓрлӓн барабар, ки гӧрсӱн нейлӓн бу иш битеӂек.

⁵⁹ Бӱӱк попазлар, аксакаллар хем бӱтӱн Синедрион Иисуса каршы аарардылар йаланӂы шаатлык, ки ӧлдӱрсӱннӓр Ону,

⁶⁰ ама буламадылар, макар ки чок йаланӂы шаат чыкты ортайа. Сонда гелди таа ики шаат.

⁶¹ Оннар дедилӓр: «О деди: „Бӓн вар ниӂӓ йыкайым Аллахын Айоз бинасыны да ӱч гӱнӓ кадар енидӓн йываӂам ону“».

⁶² Баш попаз калкты айакча да сорду: «Хич ӂувап етмейеӂӓн ми? Не сӧлеерлӓр шаатлар Сана каршы?»

⁶³ Иисус сусарды. Баш попаз деди она: «Емин еттирерим Сана дири Аллахлан, сӧлӓ бизӓ, Сӓнсин ми Христос, Аллахын Оолу?»

⁶⁴ «Ӧлӓ, ниӂӓ сӧледин, – ӂувап етти Иисус. – Бундан таа зеедӓ сӧлеерим сизӓ: бӱӱндӓн ӧтӓӓ гӧреӂениз Адам Оолуну отураркан Кудретлинин саа тарафында хем гелӓркӓн гӧк булутлары ӱстӱндӓ».

⁶⁵ Озаман баш попаз йыртты рубаларыны да баарды: «Кӧтӱледи Аллахы! Не лӓӓзым бизӓ башка шаат? Демин кендиниз ишиттиниз, ниӂӓ кӧтӱледи Аллахы!

⁶⁶ Не дейеӂениз?» Оннар ӂувап еттилӓр: «Кабаатлы, ӂезалансын ӧлӱмнӓн!»

⁶⁷ Озаман тӱкӱрдӱлӓр ӱзӱнӓ, дӱӱдӱлӓр шамарлан.

⁶⁸ Да дейӓрдилӓр: «Пророклук ет бизӓ, Христос, ким урду Сана?»

Петри атылэр Иисустан

⁶⁹ Петри дурарды дышарда, аул ичиндӓ. Бир изметчийка йаклашты она да деди: «Сӓн дӓ Галилейалы Иисуслан булунардын!»

⁷⁰ Петри атылды хепсинин ӧнӱндӓ да деди: «Хич аннамээрым, не сӧлеерсин».

⁷¹ Ачан чыкты токатлар йанына, бир башка изметчийка гӧрдӱ ону да деди оннара, ким орадайды: «Бу адам да Назаретли Иисусланды».

⁷² Петри енидӓн атылды да емин етти: «Хич танымээрым бу Адамы!»

⁷³ Бираздана орада дураннар йаклаштылар Петрийӓ да дедилӓр: «Аслы, сӓн дӓ оннардансын, зерӓ сенин лафын таныдэр сени».

⁷⁴ Петри башлады бетвайлан емин етмӓӓ: «Хич танымээрым бу Адамы!» Таман о вакыт хороз ӧттӱ.

⁷⁵ Петринин аклына гелди, не сӧледийди Иисус: «Хороз ӧтӱнӂӓ, сӓн ӱч сыра Бендӓн атылаӂан». Петри чыкты дышары да аӂы аалады.