Matfey 25 - Ени Бааланты

Он кыз

¹ Озаман Гӧк Падишахлыы он кыза бензӓр олаӂэк, ангылары алдылар кандиллерини да каршы етмӓӓ гӱвеейи чыктылар.

² Оннарын беши аарифти, ама беши диилди аариф.

³ Диил аарифлӓр, алып кандиллерини, алмадылар кендилериннӓн зейтин йаайы.

⁴ Ама аариф оланнар кандиллериннӓн алдылар зейтин йаайы да каплар ичиндӓ.

⁵ Чӱнкӱ гӱвӓӓ геч калды, оннар хепси уйукламаа башладылар да уйудулар.

⁶ Геӂӓ йарысы ишидилди бир бӱӱк сес: „Тӓ гӱвӓӓ гелер, чыкын она каршы!“

⁷ Озаман хепси кызлар уйандылар да хазырладылар кандиллерини.

⁸ Диил аарифлӓр дедилӓр аарифлерӓ: „Верин бизӓ дӓ сизин зейтин йаайыныздан, зерӓ бизим кандиллӓр сӱӱнер“.

⁹ Ама аариф кызлар ӂувап еттилӓр: „Йок насыл верелим, зерӓ сора етишмӓз хем бизӓ, хем сизӓ. Таа ислӓӓ гидин сатыӂылара да сатын алын кендинизӓ“.

¹⁰ Ачан гиттилӓр сатын алсыннар, гелди гӱвӓӓ. Хазыр оланнар онуннан гирдилӓр дӱӱн еринӓ да капуйу китледилӓр.

¹¹ Ондан сора гелдилӓр калан кызлар да йалвардылар: „Чорбаӂы, чорбаӂы, ач бизӓ капуйу!“

¹² Ама о ӂувап етти оннара: „Доору сӧлеерим, ани танымээрым сизи!“

¹³ Ӧлӓ ки, кушку олун, зерӓ билмеерсиниз, не гӱнӱ хем не саатта Адам Оолу гелеӂек.

Талантлар ичин ӧрнек

¹⁴ Бу олаӂэк, ниӂӓ бир адам, гидеӂейкӓн бир йабанӂы ерӓ, чаарды чыракларыны да пайетти оннара кенди варлыыны.

¹⁵ Бирисинӓ верди беш талант, икинӂисинӓ верди ики талант, ӱчӱнӂӱсӱнӓ верди бир талант, херкезинӓ беӂериклиинӓ гӧрӓ, сора гитти.

¹⁶ О, ангысы каблетти беш талант, гидип койду оннары алыш-веришӓ да казанды таа беш талант.

¹⁷ Хеп ӧлӓ йапты икинӂиси дӓ, ани каблетти ики талант. О да казанды таа ики талант.

¹⁸ Ама ӱчӱнӂӱсӱ, ангысы каблетти бир талант, гидип казды бир куйу ер ичиндӓ да орайы саклады чорбаӂысынын талантыны.

¹⁹ Чок вакыттан сора бу чорбаӂы дӧндӱ геери да истеди есап оннардан.

²⁰ О, ангысы каблеттийди беш талант, гелди да гетирди таа беш талант, дейип: „Чорбаӂы, сӓн вердин бана беш талант, бӓн казандым таа беш талант“.

²¹ Чорбаӂы деди она: „Хелал, сӓн ии хем инанч чыраксын, олдун инанч аз ишлердӓ, койаӂам сени чок ишлерин ӱстӱнӓ. Катыл чорбаӂынын шенниинӓ!“

²² О, ангысы каблеттийди ики талант, гелди да деди: „Чорбаӂы, сӓн вердин бана ики талант. Бӓн оннарлан казандым таа ики талант“.

²³ Чорбаӂы деди: „Хелал, сӓн ии хем инанч чыраксын, олдун инанч аз ишлердӓ, койаӂам сени чок ишлерин ӱстӱнӓ. Катыл чорбаӂынын шенниинӓ!“

²⁴ О, ангысы каблеттийди салт бир талант, гелди да деди: „Чорбаӂы, билӓрдим сени, ани кескин адамсын, бичерсин, нередӓ екмедин хем топлээрсын, нередӓ харман дӱӱмедин.

²⁵ Бӓн корктум, онуштан, гидип, гӧмдӱм бу таланты ер ичинӓ. Шинди ал, не сенин“.

²⁶ Чорбаӂы деди она: „Йарамаз хем хайлаз чырак! Билӓрдин, ани бичерим, нередӓ екмедим хем топлээрым, нередӓ харман дӱӱмедим.

²⁷ Онуштан сӓн лӓӓзымды койасын парамы банкаӂылара. Шинди, ачан дӧндӱм геери, алаӂэйдым парамы гелирлӓн.

²⁸ Алын ондан бу таланты да верин она, кимдӓ вар он талант.

²⁹ Зерӓ кимдӓ вар, она таа верилеӂек, ама кимдӓ йок, ондан алынаӂэк, нейи дӓ вар.

³⁰ Ама бу йарамаз чыраамы атын дышанкы караннаа. Орада олаӂэк ааламак хем диш гыӂырдатмасы“. /Сӧлейип буну, деди: „Кимин вар кулаа ишитмӓӓ дейни, ко ишитсин!“/

Миллетлерӓ даава

³¹ Ачан Адам Оолу Кенди метиннииндӓ гелеӂек, хем хепси айоз ангиллӓр Онуннан, озаман отураӂэк Кенди метинни чорбаӂылык скемнесиндӓ.

³² Хепси миллетлӓр топланаӂэк Онун ӧнӱнӓ. Да айыраӂэк оннары бири-бириндӓн, ниӂӓ айырэр гӱдӱӂӱ койуннары текелердӓн.

³³ Койуннары айыраӂэк саа тарафына, ама текелери – сол тарафына.

³⁴ Озаман Падишах дейеӂек саа тарафында оланнара: „Гелин, Бобамын иисӧзленмишлери, да елӓ алын Падишахлыы, ани хазырланмыш сизӓ дӱннейин курулмасындан.

³⁵ Зерӓ аачтым, да сиз дойурдунуз Бени. Сусуздум, да вердиниз су, ичейим. Йабанӂыйдым, каблеттиниз Бени.

³⁶ Чыплактым, гиидирдиниз Бени. Хастайдым, гелдиниз Бана. Капанда капалыйдым, долаштыныз Бени“.

³⁷ Озаман доору оланнар ӂувап едеӂеклӓр: „Сааби, незаман аач Сени гӧрдӱк да дойурдук? Еки незаман сусуздун, да су вердик, ичӓсин?

³⁸ Незаман йабанӂы Сени гӧрдӱк да каблеттик? Еки чыплак, да гиидирдик?

³⁹ Незаман хаста Сени гӧрдӱк еки капанда да Сана гелдик?“

⁴⁰ Падишах ӂувап едеӂек оннара: „Доору сӧлеерим сизӓ, кач сыра буннары йаптыныз бу ен кӱчӱк кардашларымдан бирисинӓ, Бана Кендимӓ йаптыныз“.

⁴¹ Сора дейеӂек сол тарафында оланнара: „Гидин Бендӓн, сиз бетвалылар, дивеч атешӓ, ани хазырланмыш диавола хем онун ангиллеринӓ!

⁴² Зерӓ аачтым, да дойурмадыныз Бени. Сусуздум, да су ичейим, вермединиз.

⁴³ Йабанӂыйдым, каблетмединиз Бени. Хастайдым, капанда булундум, да гелмединиз Бана“.

⁴⁴ Озаман оннар дейеӂеклӓр: „Сааби, незаман гӧрдӱк Сени аач, сусуз, йабанӂы, чыплак, хаста, капанда да йардым етмедик Сана?“

⁴⁵ Озаман О ӂувап едеӂек: „Доору сӧлеерим сизӓ, ани кач сыра буну йапмадыныз бу ен кӱчӱк кардашларымдан бирисинӓ, Бана йапмадыныз“.

⁴⁶ Буннар гидеӂеклӓр дивеч ӂезайа, ама доору оланнар – дивеч йашамайа».