Matfey 24 - Ени Бааланты

Битки вакыдын нышаннары

¹ Ачан Иисус чыкты Айоз бинадан да йолланды гитмӓӓ, ӱӱрениӂилӓр йаклаштылар Она, гӧстерсиннӓр Айоз бинанын йапыларыны.

² Ама Иисус деди оннара: «Гӧрерсиниз ми хепсини буннары? Доору сӧлеерим сизӓ, ани калмайаӂэк бурада таш ӱстӱндӓ таш, хепси йыкылаӂэк».

³ Ачан Иисус отурду Зейтин байыры ӱстӱндӓ, ӱӱрениӂилери йалныз Она йаклаштылар да дедилӓр: «Сӧлӓ бизӓ, незаман олаӂэк буннар хем несой нышан Сенин гелмени хем заманын биткисини гӧстереӂек?»

⁴ Иисус ӂувап етти оннара: «Бакын, биркимсей алдатмасын сизи.

⁵ Зерӓ чойу гелеӂек Беним адыма да дейеӂек: „Бӓним Христос“, да чойуну алдадаӂэклар.

⁶ Ишидеӂениз ӂенк уултусу хем хабер ӂенклӓр ичин. Бакын, коркмайасыныз. Зерӓ хепси буннар лӓӓзым олсун, ама бу таа диил биткиси.

⁷ Зерӓ миллет миллетӓ, падишахлык падишахлаа каршы калкаӂэк. Кими ерлердӓ олаӂэк аачлык, /салгыннар/ хем ер тепремелери.

⁸ Ама хепси буннар салт бӱӱк кахырларын чекетмеси.

⁹ Озаман зеетлейеӂеклӓр сизи хем ӧлдӱреӂеклӓр, хем Беним адым ичин хепси миллетлӓр сиздӓн азетмейеӂек.

¹⁰ Чойу инандан дӱшеӂек. Бири-бирини сатаӂэклар хем азетмейеӂеклӓр бири-бириндӓн.

¹¹ Калкаӂэк чок йаланӂы пророклар да чойуну алдадаӂэклар.

¹² Законсузлук зееделенеӂек, онуштан чойунда севги сууаӂэк.

¹³ Ама ким биткийӓдӓн дайанаӂэк, о куртулаӂэк.

¹⁴ Гӧк Падишахлыын Ии Хабери бӱтӱн дӱннедӓ насаат олаӂэк, шаатлык олсун хепси миллетлерӓ, да озаман биткиси гелеӂек.

¹⁵ Ӧлӓ ки, ачан гӧреӂениз дикили айоз ердӓ ииренч иши, ани бозгунӂулук йапэр, ангысы ичин лафетти пророк Даниил, – ким окуйэр, аннасын –

¹⁶ озаман ким олаӂэк Иудейада, качсын байырлара.

¹⁷ Ким булунаӂэк ев ӱстӱндӓ, инмесин алмаа бишей ичйандан.

¹⁸ Ким олаӂэк кырда, дӧнмесин геери ӱст рубасыны алмаа.

¹⁹ О гӱннердӓ вай маамул хем ушак емзирӓн карылара!

²⁰ Дуа един, качманыз разгелмесин кышын еки ӂумертеси.

²¹ Зерӓ озаман бӱӱк зеет олаӂэк, ани олмады дӱннейин курулмасындан бӱӱнӓдӓн хем олмайаӂэк да.

²² Еер о вакыт кысалдылмайды, кимсей куртуламайаӂэйды, ама сечилмишлерин хатыры ичин о вакыт кысалдылды.

Адам Оолунун гелмеси

²³ Озаман еер биркимсей дейӓрсейди сизӓ: „Тӓ, Христос бурада!“ еки: „Христос орада!“, инанмайын.

²⁴ Зерӓ пейдаланаӂэк йаланӂы христослар хем йаланӂы пророклар. Йапаӂэклар бӱӱк нышаннар хем шашмаклы ишлӓр, алдатсыннар дейни, оларсайды колай, артык сечилмиш оланнары да.

²⁵ Тӓ, Бӓн вакытча сизӓ хаберледим.

²⁶ Ӧлӓ ки, еер дейӓрсейдилӓр сизӓ: „Тӓ, О чол ердӓ!“, гитмейин, еки: „Тӓ, О саклы ичердӓ!“, инанмайын.

²⁷ Зерӓ, ниӂӓ чимчирик чакэр гӱндуусундан да гӧрӱнер гӱнбатысына кадар, ӧлӓ олаӂэк Адам Оолунун гелмеси дӓ.

²⁸ Нередӓ олаӂэк леш, орайы топланаӂэк леш карталлары.

²⁹ О зеет гӱннериндӓн сора хемен гӱн карараӂэк, ай вермейеӂек айдынныыны, йылдызлар гӧктӓн дӱшеӂеклӓр, хем гӧкӱн куветлери сарсаланаӂэк.

³⁰ Озаман гӧктӓ Адам Оолунун нышаны гӧстерилеӂек. Озаман хепси ердеки сенселелӓр аалайаӂэк. Гӧреӂеклӓр Адам Оолуну, гелӓркӓн гӧкӱн булутлары ӱстӱндӓ бӱӱк куветлӓн хем метинниклӓн.

³¹ О йоллайаӂэк бӱӱк бору сесиннӓн ангиллерини. Оннар топлайаӂэклар Онун сечилмишлерини дӧрт тарафтан, гӧкӱн бир кенарындан ӧбӱр кенарынадан.

³² Инӂир фиданындан ӧрнек алын. Ачан даллары йымышээрлар, хем йапраклары ешерерлӓр, билерсиниз, ани йаз йакын.

³³ Хеп ӧлӓ, сиз дӓ ачан гӧреӂениз хепси буннары, билиниз, ани бу иш йакын, артык капуда.

³⁴ Доору сӧлеерим сизӓ, ани бу бой инсан гечмейеӂек, хепси буннар таманнанмайынӂа.

³⁵ Ер хем гӧк гечеӂек, ама Беним сӧзлерим хич гечмейеӂек.

Гӱн хем саат билинмеер

³⁶ О гӱнӱ хем о саады кимсей билмеер: не гӧктеки ангиллӓр, не дӓ Оол, ама салт Боба.

³⁷ Ниӂӓ олду Нойун гӱннериндӓ, хеп ӧлӓ олаӂэк Адам Оолунун гелмесиндӓ дӓ.

³⁸ Ниӂӓ о гӱннердӓ потоптан илери ийӓрдилӓр, ичӓрдилӓр хем евленӓрдилӓр о гӱнӓ кадар, ачан Ной гирди геми ичинӓ,

³⁹ да бишей шӱпеленмӓрдилӓр, потоп гелмейинӂӓ да хепсини телеф етмейинӂӓ, хеп ӧлӓ олаӂэк Адам Оолунун гелмеси дӓ.

⁴⁰ Озаман ики адам олаӂэк кырда. Бириси алынаӂэк, ӧбӱрӱ калаӂэк.

⁴¹ Ики кары дермендӓ ун ӱӱдеӂеклӓр. Бириси алынаӂэк, бириси калаӂэк.

⁴² Онуштан кушку олун, зерӓ билмеерсиниз, не гӱнӱ Саабиниз гелеӂек.

⁴³ Билиниз, еер билейди евин чорбаӂысы, незаман хырсыз гелеӂек, кушку дураӂэйды да бракмайаӂэйды, евини сойсун.

⁴⁴ Онуштан сиз дӓ олун хазыр, зерӓ Адам Оолу гелеӂек о саатта, ачан хич дӱшӱнмеерсиниз.

Инанч хем касаветсиз чыраклар

⁴⁵ Аӂаба кимдир инанч хем аариф чырак, ангысыны чорбаӂысы койду ӂувапчы кенди евиндӓ хепси чыракларын ӱстӱнӓ, вакыдында дойурсун оннары дейни?

⁴⁶ Мутлу чырак, ангысыны чорбаӂысы, гелмесиндӓ, булаӂэк бӧлӓ йапаркан.

⁴⁷ Доору сӧлеерим сизӓ, ани койаӂэк ону ӂувапчы бӱтӱн кенди варлыы ӱстӱнӓ.

⁴⁸ Ама чырак оларсайды фена да акылӂа дейӓрсейди: „Чорбаӂым ойаланэр“,

⁴⁹ да башларсайды дӱӱмӓӓ кафадарларыны, имӓӓ хем ичмӓӓ сарфошчуларлан,

⁵⁰ чыраан чорбаӂысы гелеӂек бир гӱн, незаман хич беклӓмеер, хем о саатта, незаман хич дӱшӱнмеер,

⁵¹ чок дӱӱйеӂек, ону икиӱзлӱлӓрлӓн бир ерӓ койаӂэк. Орада олаӂэк ааламак хем диш гыӂырдатмасы.