Matfey 23 - Ени Бааланты

Азар билгичлерӓ хем фарисейлерӓ

¹ Сора Иисус данышты инсана хем Кенди ӱӱрениӂилеринӓ

² да деди: «Билгичлӓр хем фарисейлӓр отурэрлар Моисейин ериндӓ.

³ Онуштан хепсини, не сӧлеерлӓр сизӓ, коруйун хем йапын. Ама не йапэрлар, сиз йапмайын. Зерӓ оннар сӧлеерлӓр, ама йапмээрлар.

⁴ Баалээрлар аар ӱклӓр, ани зор гӧтӱрмӓӓ. Койэрлар инсанын сыртына, ама кендилери баарлем пармааннан кымылдатмээрлар.

⁵ Хепсини инсана гӧстермӓк ичин йапэрлар. Дуа пачкаларыны бӱӱлдеерлӓр, руба етеклерини узун пӱскӱллӓрлӓн йапэрлар.

⁶ Северлӓр отурмаа ӧндеки ерӓ конак софраларында хем илк скемнелерӓ синагогаларда.

⁷ Беенерлӓр, инсан селӓм версин оннара мейданнарда да десиннӓр: „Ӱӱредиӂи!“

⁸ Ама сиз кендинизӓ „Ӱӱредиӂи“ сӧлеттирмейин, зерӓ сиздӓ бир ӱӱредиӂи – Христос, ама сиз хепсиниз кардашсыныз.

⁹ Бу ердӓ кимсейӓ демейин „Боба“, зерӓ сизин бирдир Бобаныз, ани гӧктӓ булунэр.

¹⁰ Кимсейӓ демейин „Ӧндерӂи“, зерӓ бирдир сиздӓ Ӧндерӂи – Христос.

¹¹ Сизин аранызда ен бӱӱйӱ сизӓ изметкӓр олсун.

¹² Ким кендини ӱӱсеклендирер, о ашааландырылаӂэк, ким кендини ашааландырэр, о ӱӱсеклендирилеӂек.

¹³ Вай сизӓ, билгичлӓр хем фарисейлӓр, икиӱзлӱлӓр! Зерӓ сиз капээрсыныз инсана Гӧк Падишахлыыны. Кендиниз гирмеерсиниз, ким дӓ гирмӓӓ истеер, бракмээрсыныз. /

¹⁴ Вай сизӓ, билгичлӓр хем фарисейлӓр, икиӱзлӱлӓр! Сиз кемирерсиниз дулларын евлерини, ама гӧстермӓк ичин узун дуалар йапэрсыныз. Онуштан ӂезаныз чок аар олаӂэк./

¹⁵ Вай сизӓ, билгичлӓр хем фарисейлӓр, икиӱзлӱлӓр! Зерӓ сиз доланэрсыныз ери хем денизи, ки чевирӓсиниз баарлем бирисини дининизӓ, да чевирип, йапэрсыныз ону бир ӂендем адамы, ики кат таа фена сиздӓн.

¹⁶ Вай сизӓ кӧӧр ӧндерӂилӓр, ани деерсиниз: „Еер емин едӓрсейди биркимсей Айоз бинайлан, диил бишей. Ама емин едӓрсейди Айоз бинанын алтыныннан, о баалы емининнӓн“.

¹⁷ Фикирсизлӓр хем кӧӧрлар, не таа бӱӱк? Алтын мы оса Айоз бина мы, ани айозлээр алтыны?

¹⁸ Хем деерсиниз: „Еер биркимсей емин едирсейди курбанныклан, диил бишей, ама емин едирсейди курбаннан, ани курбаннык ӱстӱндӓ, о баалы емининнӓн“.

¹⁹ /Фикирсизлӓр хем/ кӧӧрлар! Не таа бӱӱк, курбан мы, оса курбаннык мы, ани курбаны айозлээр?

²⁰ Ӧлӓ ки, ким емин едер курбанныклан, о емин едер хепсиннӓн, не вар онун ӱстӱндӓ.

²¹ Ким емин едер Айоз бинайлан, о емин едер Айоз бинайлан хем Онуннан, Ким орада йашээр.

²² Хем ким емин едер гӧклӓн, емин едер Аллахын чорбаӂылык скемнесиннӓн хем скемнедӓ Отураннан.

²³ Вай сизӓ, билгичлӓр хем фарисейлӓр, икиӱзлӱлӓр! Зерӓ сиз верерсиниз онунӂу пайыны наанедӓн, марардан хем кимйондан, ама бракэрсыныз таманнанмадык Закондан ен паалы ишлери: доорулуу, аӂыйанныы хем инаны. Буннары лӓӓзым йапасыныз, каланыны да бракмайасыныз!

²⁴ Кӧӧр ӧндерӂилӓр, ани сиври синӓӓ сӱзерсиниз, ама девейи йудэрсыныз!

²⁵ Вай сизӓ, билгичлӓр хем фарисейлӓр, икиӱзлӱлӓр! Сиз йыкээрсыныз чӧлмӓӓн хем чанаан дышансыны, ама ичйансы долу хырсызлыклан хем тамахлыклан.

²⁶ Кӧӧр фарисей! Илкин пакла чӧлмӓӓн /хем чанаан/ ичйансыны, сора пак олаӂэк дышансы да.

²⁷ Вай сизӓ, фарисейлӓр хем билгичлӓр, икиӱзлӱлӓр! Зерӓ сиз ниӂӓ киречли мезарлар, ани дышандан гӧрӱнерлӓр гӧзӓл, ама ичйандан долу ӧлӱлерин кемиклериннӓн хем хертӱрлӱ мындарлыклан.

²⁸ Хеп ӧлӓ сиз дӓ дышандан гӧстерилерсиниз инсанын ӧнӱндӓ доору, ама ичйандан долуйсунуз икиӱзлӱлӱклӓн хем законсузлуклан.

²⁹ Вай сизӓ, билгичлӓр хем фарисейлӓр, икиӱзлӱлӓр! Зерӓ сиз дӱзерсиниз пророкларын мезарларыны хем донадэрсыныз доору адамнарын анылмак ташларыны.

³⁰ Сиз деерсиниз: „Еер биз йашайайдык бизим деделерин вакыдында, кайыл олмайаӂэйдык пророкларын каныны дӧкмӓӓ“.

³¹ Бутакым сиз кенди-кендинизӓ каршы шаатлык едерсиниз, ани сиз пророк ӧлдӱрӱӂӱлерин оолларыйсыныз.

³² Хайди, битирин, не бобаларыныз чекеттирди.

³³ Йыланнар, зихирли йылан йаврулары! Несой куртулаӂэныз ӂендемин ӂезасындан?

³⁴ Онун ичин, тӓ, йоллээрым сизӓ пророклары, аарифлери хем билгичлери. Кимисини ӧлдӱреӂениз да ставроза гереӂениз, башкаларыны дӱӱйеӂениз сизин синагогаларда хем коолайаӂэныз оннары касабадан касабайа.

³⁵ Ӧлӓ ки, сиз ӂувап едеӂениз хепси доору оланнарын каннары ичин, ани дӧкӱлдӱ бу ердӓ, кабаатсыз Авелин канындан, Варахийанын оолунун, Захарийанын канынадан, ангысыны ӧлдӱрдӱнӱз Айоз бина хем курбаннык арасында.

³⁶ Доору сӧлеерим сизӓ, ани хепси буннар ичин бу бой инсан ӂувап едеӂек.

Иерусалим ичин аалайыш

³⁷ Иерусалим, Иерусалим, ани ӧлдӱрерсин пророклары хем ташлан дӱӱйерсин сана йолланылмышлары! Кач сыра истедим топлайым сенин ушакларыны, ниӂӓ клочка топлээр пиличлерини канатлары алтына, ама сиз истӓмединиз!

³⁸ Тӓ, евиниз сизӓ бош бракылэр.

³⁹ Сӧлеерим сизӓ, ани бӱӱндӓн ӧтӓӓ гӧрмейеӂениз Бени, демейинӂӓ: „Иисӧзленмиш олсун, Ким гелер Саабинин адына!“»