Matfey 22 - Ени Бааланты

Падишах дӱӱнӱ

¹ Иисус, енидӓн лафедип, оннара ӧрнеклӓрлӓн сӧледи:

² «Гӧк Падишахлыы бензӓр бир падишаха, ангысы йапты дӱӱн кенди оолуна.

³ Йоллады чыракларыны, чаарылмышлары дӱӱнӓ теклиф етсиннӓр, ама оннар истӓмедилӓр гелмӓӓ.

⁴ Сора енидӓн йоллады башка чыракларыны, дейип: „Сӧлейин чаарылмышлара: Софра хазыр, курулу, ӧкӱзлерим хем бесли хайваннарым кесили, хепси хазыр, гелин дӱӱнӓ!“

⁵ Ама оннар есаба алмадылар. Бириси гитти тарласыны бакмаа, башкасы гитти алыш-вериш йапмаа.

⁶ Таа башкалары туттулар чыраклары, гӱлмӓӓ алып, ӧлдӱрдӱлӓр оннары.

⁷ Ачан ишитти буну падишах, ӱфкеленди, йоллады аскерлерини да телеф етти бу ӧлдӱрӱӂӱлери, йакты оннарын касабаларыны.

⁸ Сора деди чыракларына: „Дӱӱн хазыр, ама чаарылмышлар диил йакышык гелмӓӓ.

⁹ Гидин йол чатырыкларына, чаарыныз дӱӱнӓ хепсини, кими булаӂэныз“.

¹⁰ Куллар гиттилӓр сокаклара, топладылар хепсини, кими булдулар: иилери хем кӧтӱлери. Дӱӱн ери долду конакчыларлан.

¹¹ Падишах гирди, гӧрсӱн конакчылары, да гӧрдӱ орада бир адам, ани диилди дӱӱн рубасыннан гиийимни.

¹² „Ба дост, – деди она чорбаӂы, – несой сӓн дӱӱн рубасыз бурайы гирӓбилдин?“ О адам сусарды.

¹³ Озаман падишах деди кенди изметкерлеринӓ: „Баалайын онун еллерини хем айакларыны да атын ону дышанкы караннаа. Орада олаӂэк ааламак хем диш гыӂырдатмасы“.

¹⁴ Зерӓ чок чаарылмыш, ама аз сечилмиш».

Хак Кесара хем Аллаха

¹⁵ Озаман фарисейлӓр гидип аннаштылар, несой тутсуннар Иисусу лафлан.

¹⁶ Йолладылар Она кенди ӱӱрениӂилерини, Иродун адамнарыннан барабар, десиннӓр: «Ӱӱредиӂи, биз билериз, ани доору адамсын, Аллахын йолуну хакына ӱӱредерсин, кимсейӓ пай тутмээрсын, зерӓ адам ӱзӱнӓ бакмээрсын.

¹⁷ Ӧлӓ ки, сӧлӓ бизӓ, несой сайэрсын, дӱшер ми ӧдемӓӓ харч Кесара оса дӱшмеер ми?»

¹⁸ Ама Иисус, билерӓк оннарын кӧтӱ неетлерини, деди: «Нечин Бени денеерсиниз, икиӱзлӱлӓр?

¹⁹ Гӧстерин Бана парайы, нейлӓн ӧденер харч!» Оннар гетирдилӓр Она бир динар.

²⁰ Иисус сорду оннара: «Кимин ресими хем ады йазылы бурада?»

²¹ «Кесарын», – ӂувап етти оннар. Озаман Иисус деди: «Верин Кесара не Кесарын, ама Аллаха не Аллахын».

²² Шаштылар бу лафлара да, Ону бракып, гиттилӓр.

Соруш дирилмӓк ичин

²³ Хеп о гӱнӱ Иисуса гелди садукейлӓр, ангылары деерлӓр, ани йок дирилмӓк, да сордулар:

²⁴ «Ӱӱредиӂи, Моисей деди: „Еер биркимсей ӧлӓрсейди таа ушаа олмадыйнан, онун кардашы лӓӓзым евленсин бу карыйа да калдырсын ушак ӧлмӱш кардашына тамызлык ичин“.

²⁵ Варды биздӓ еди кардаш. Илкинкиси евленди да ӧлдӱ. Чӱнкӱ йокту ушаа, кенди карысыны бракты кардашына.

²⁶ Хеп ӧлӓ олду икинӂисиннӓн дӓ, ӱчӱнӂӱсӱннӓн дӓ, единӂисинӓдӓн.

²⁷ Хепсиндӓн сора ӧлдӱ кары да.

²⁸ Дирилмектӓ ангысынын бу едисиндӓн карысы о олаӂэк? Зерӓ хепси йашады онуннан».

²⁹ Иисус ӂувап етти оннара: «Йанылэрсыныз, зерӓ билмеерсиниз не Айоз Йазылары, не да Аллахын куведини.

³⁰ Зерӓ ӧлӱлӓр дирилдийнӓн евленмейеӂеклӓр, ама олаӂэклар, ниӂӓ Аллахын ангиллери гӧктӓ.

³¹ Ӧлӱлерин дирилмеси ичин окумадыныз мы, не Аллах сизӓ деер:

³² „Бӓн Авраамын Аллахы, Исаакын Аллахы хем Иаковун Аллахыйым“. Аллах – диил ӧлӱлерин Аллахы, ама дирилерин».

³³ Инсаннар, ани сеслӓрдилӓр, шаштылар Иисусун ӱӱретмесинӓ.

Ен бӱӱк сымарламак

³⁴ Фарисейлӓр, ачан ишиттилӓр, ани Иисус сустурду садукейлери, топландылар бирери.

³⁵ Оннардан бир закон ӱӱредиӂиси, Иисусу денесин дейни, койду она бӧлӓ бир соруш:

³⁶ «Ӱӱредиӂи, ангы сымарламак ен бӱӱк Законда?»

³⁷ Иисус ӂувап етти: «„Севӓсин Сааби Аллахыны бӱтӱн ӱрӓӓннӓн, бӱтӱн ӂаныннан хем бӱтӱн аклыннан“.

³⁸ Будур илк хем ен бӱӱк сымарламак.

³⁹ Икинӂиси буна бензӓр: „Севӓсин йакын оланыны, ниӂӓ кендини“.

⁴⁰ Бу ики сымарламакта тутунэр бӱтӱн Закон хем пророклар».

Христос – кимин оолу?

⁴¹ Ачан топлуйдулар фарисейлӓр бирердӓ, Иисус сорду оннара:

⁴² «Не дӱшӱнерсиниз сиз Христос ичин? Кимин оолу О?» «Давидин», – ӂувап етти оннар.

⁴³ Иисус деер оннара: «Ӧлейсӓ, нечин Давид, Аллахын Духундан кулланылмыш, адлээр Ону „Чорбаӂы“, дейип:

⁴⁴ „Сааби деди беним Чорбаӂыма: Отур саа тарафымда, Бӓн койунӂа Сенин душманнарыны айакларын алтына“.

⁴⁵ Чӱнкӱ Давид адлээр Ону „Чорбаӂы“, несой О олабилир Давидин оолу?»

⁴⁶ Кимсей ӂувап едӓмеди Она бир дӓ лаф. О гӱндӓн сора артык кимсей кыйышмады бишей сорсун Она.