Matfey 19 - Ени Бааланты

Дӱшер ми, кары-коӂа айырылсыннар?

¹ Бӧлӓ лафеттиктӓн сора Иисус Галилейадан гечти да гелди Иудейа ерлеринӓ, Иорданын ӧбӱр тарафына.

² Онун ардына гитти чок инсан. Орада О алыштырды хасталары.

³ Фарисейлӓр гелдилӓр денесиннӓр Ону дейни, да дедилӓр: «Дӱшер ми адам айырылсын карысындан хербир себеп бетеринӓ?»

⁴ Иисус ӂувап етти оннара: «Не, окумадыныз мы, ани Йарадыӂы баштан йаратты инсаннары, олсуннар адам хем кары.

⁵ Да деди: „Онуштан бракаӂэк адам бобасыны хем анасыны да бирлешеӂек карысыннан. Икиси бир гӱӱдӓ олаӂэк“.

⁶ Бутакым олаӂэклар диил ики, ама бир гӱӱдӓ. Ӧлӓ ки, не Аллах бирлештирди, инсан ону айырмасын».

⁷ Оннар сордулар: «Ӧлейсӓ, нечин Моисей сымарлады, коӂа версин карысына айырылмак кийады да айырылсын ондан?»

⁸ Иисус ӂувап етти оннара: «Сизин инатлыынызын бетеринӓ изин верди Моисей, айырыласыныз карыларыныздан, ама баштан диилди ӧлӓ.

⁹ Бӓн сизӓ деерим: хербир адам, ангысы айырылэр карысындан диил хайырсызлык бетеринӓ да евленер башкасына, ороспулук йапэр. /Ким дӓ евленер коӂасындан айырылмыш карыйа, о да ороспулук йапэр/».

¹⁰ Онун ӱӱрениӂилери дедилӓр: «Еер бӧлӓ дурарсайды ишлӓр кары-коӂайлан, озаман таа ии хич евленмемӓӓ!»

¹¹ О ӂувап етти оннара: «Хепси кабледӓмеер буну, ама саде оннар, кимӓ верили.

¹² Зерӓ вар евнухлар – дуумактан евнух. Вар инсандан йапылы евнухлар. Хем вар евнухлар, ангылары кенди-кендилерини евнух йаптылар Гӧк Падишахлыы ичин. Ким кабледӓбилер буну, ко каблетсин».

Иисус иисӧзлеер ушаклары

¹³ Озаман гетирдилӓр Иисуса ушаклары, О койсун еллерини оннарын ӱстӱнӓ дейни да дуа етсин оннар ичин, ама ӱӱрениӂилӓр азарладылар оннары.

¹⁴ Иисус деди: «Бракын ушаклары, гелсиннӓр Бана, да дургутмайын оннары, зерӓ Гӧк Падишахлыы оннарын гибилери ичин».

¹⁵ Еллерини оннарын ӱстӱнӓ койдуктан сора Иисус гитти орадан.

Зенгинник хем дивеч йашамак

¹⁶ Бир адам йаклашты Иисуса да сорду Она: «Ӱӱредиӂи, не иилик йапайым, ки дивеч йашамак еденейим?»

¹⁷ Иисус ӂувап етти она: «Нечин сорэрсын Бана „не иилик“? Салт бир Аллах ии. Еер истӓрсейдин ӧмӱрӓ гирмӓӓ, таманна сымарламаклары».

¹⁸ «Ангыларыны?» – сорду о адам. Иисус ӂувап етти: «Ӧлдӱрмейӓсин, ороспулук йапмайасын, чалмайасын, йаланӂы шаат олмайасын,

¹⁹ бобаны-ананы икрамнайасын хем йакын оланыны, ниӂӓ кендини, севӓсин».

²⁰ Генч олан ӂувап етти: «Хепсини буннары таманнадым /таа генчлиимдӓн/. Не таа бана етишмеер?»

²¹ «Еер истӓрсейдин таман олмаа, гит да сат варлыыны, пайет фукааралара, да олаӂэк хазнан гӧктӓ. Сора гел да излӓ Бени», – деди Иисус.

²² Ачан генч олан ишитти бу лафлары, гӱӂеник гитти, зерӓ чок зенгиннии варды.

²³ Иисус деди ӱӱрениӂилеринӓ: «Доору сӧлеерим сизӓ, не зор бир зенгин адам Гӧк Падишахлыына гирсин!

²⁴ Хем да сӧлеерим сизӓ, ани таа илин бир девӓ ииненин кулаандан гечсин, некадар бир зенгин адам Аллахын Падишахлыына гирсин».

²⁵ Ӱӱрениӂилӓр, буну ишидип, чок шаштылар да дедилӓр: «Озаман ким куртулабилир?»

²⁶ Иисус бакты уз оннара да деди: «Бу инсана олмаз, ама Аллаха хепси олур».

²⁷ Озаман Петри деди: «Тӓ, биз брактык хепсини да гелдик Сенин ардына. Бизӓ не олаӂэк?»

²⁸ Иисус ӂувап етти: «Доору сӧлеерим сизӓ, ани ачан Адам Оолу отураӂэк Кенди метиннииндӓ, чорбаӂылык скемнесиндӓ, ени заманда, сиз, ани гелдиниз Беним ардыма, отураӂэныз оники чорбаӂылык скемнелериндӓ, даава кесерӓк Израилин оники тамызлыына.

²⁹ Хепси, ким бракты евини йада кардашларыны, кызкардашларыны, бобасыны, анасыны, /карысыны,/ ушакларыны еки мерасыны Беним адым ичин, кабледеӂек ӱз катына таа чок хем дӓ еденеӂек дивеч йашамак.

³⁰ Ама чойу илк оланнардан битки олаӂэк, чойу да биткилердӓн илк олаӂэк.