Matfey 17 - Ени Бааланты

Иисус пейдаланэр метинниктӓ

¹ Алты гӱндӓн сора Иисус алды салт Петрийи, Иакову хем онун кардашыны, Иоаны, да, гӧтӱрӱп, пиндирди оннары бир ӱӱсек байыр ӱстӱнӓ.

² Хемен гӧрӱнӱшӱ диишти оннарын ӧнӱндӓ, ӱзӱ йалабыйарды гӱн гиби. Рубалары да ак-бийаз олду, ниӂӓ айдыннык.

³ Бирдӓн гӧстерилди оннара Моисей хем Илийа, ангылары лафедӓрдилӓр Иисуслан.

⁴ Петри деди Иисуса: «Сааби, ии, ки бурадайыз. Истӓрсейдин, йапалым ӱч чалмар: бир Сенин ичин, бир Моисей ичин, бир дӓ Илийа ичин».

⁵ Буну сӧлӓркӓн, бир айдынныклы булут гӧлгесиннӓн каплады оннары, да булут ичиндӓн бир сес деди: «Будур Беним севгили Оолум, Онда Беним ислеелиим».

⁶ Ачан ӱӱрениӂилӓр буну ишиттилӓр, пек корктулар да ӱзӱкойну дӱштӱлӓр.

⁷ Иисус, йаклашып, оннара дииди да деди: «Калкын, хич коркмайын!»

⁸ Ачан оннар бактылар, башка кимсейи гӧрмедилӓр, Иисустан каарӓ.

⁹ Ачан инӓрдилӓр байыр ӱстӱндӓн, Иисус сымарлады оннара: «Кимсейӓ сӧлӓмейин, не гӧрдӱнӱз, Адам Оолу дирилмейинӂӓ ӧлӱдӓн».

¹⁰ Ӱӱрениӂилӓр сордулар Она: «Нечин билгичлӓр деерлӓр, ани илкин лӓӓзым гелсин Илийа?»

¹¹ Иисус ӂувап етти оннара: «Хакына, ани Илийа илкин гелеӂек да ерлештиреӂек хепсини.

¹² Ама сӧлеерим сизӓ, ани Илийа шиндӓн сора гелди, ама ону танымадылар да йаптылар онуннан, не истедилӓр. Хеп ӧлӓ Адам Оолу да оннарын елиндӓн зеетленеӂек».

¹³ Озаман ӱӱрениӂилӓр аннадылар, ани Иисус Иоан Ваатизедиӂи ичин лафедер.

Чоӂук фена духтан куртулэр

¹⁴ Ачан оннар етиштилӓр инсанын йанына, йаклашты Иисуса бир адам, диз чӧкӱп Онун ӧнӱндӓ, бӧлӓ йалварды:

¹⁵ «Сааби, аӂы беним оолуму, зерӓ ону кара хасталык чок зеетлеер. Чок сыра дӱшер атеш ичинӓ хем су ичинӓ.

¹⁶ Гетирдим ону Сенин ӱӱрениӂилеринӓ, ама оннар алыштырамадылар ону».

¹⁷ «Инансыз хем шашырык сенселӓ! Некадар вакыт таа сизиннӓн олаӂам? Некадар вакыт дайанаӂам сизӓ? Гетирин ону Бана», – ӂувап етти Иисус.

¹⁸ Иисус азарлады фена духу, да о чоӂуктан чыкты. Чоӂук бирдӓн саа олду.

¹⁹ Озаман ӱӱрениӂилӓр, йалныз Иисуса йаклашып, сордулар: «Нечин биз чыкарамадык фена духу?»

²⁰ «Сизин инансызлыынызын бетеринӓ, – ӂувап етти Иисус. – Доору сизӓ сӧлеерим: еер олурса сиздӓ инан хардал тоому гиби, да дейӓрсениз бу байыра: „Дииш бурадан“, о диишеӂек. Бишей олмайаӂэк, ани сиз йапамайасыныз. /

²¹ Бусой фена духлар чыкэрлар саде дуайлан хем оручлан/».

Иисус енидӓн хаберлеер ӧлӱмӱнӱ хем дирилмесини

²² Ачан оннар барабар Галилейада булунардылар, Иисус деди оннара: «Адам Оолу верилеӂек инсан елинӓ.

²³ Ону ӧлдӱреӂеклӓр, ама ӱчӱнӂӱ гӱнӱ дирилеӂек». Ӱӱрениӂилӓр чок кахырландылар.

Иисус ӧдеер харч Айоз бина ичин

²⁴ Ачан етиштилӓр Капернаум касабасына, Айоз бинайа ики драхма топлайаннар, гелип Петрийӓ, сордулар: «Сизин Ӱӱредиӂиниз ӧдӓмеер ми харч?»

²⁵ «Ӧдеер», – ӂувап етти Петри. Ачан Петри гирди ичери, Иисус илкин лафетти: «Симон, насыл сӓн санэрсын, дӱннӓ падишахлары кимдӓн харч хем верги алэрлар? Кенди оолларындан мы оса йабанӂылардан мы?»

²⁶ «Йабанӂылардан», – ӂувап етти Петри. Иисус деди: «Озаман чыкэр, ани оолларын йок зорлары ӧдесиннӓр.

²⁷ Ама гӱӂендирмейелим оннары дейни, гит гӧлӓ, ат балык ченгелини. Ал илк балыы, ани тутулаӂэк, ач аазыны да булаӂан бир статир. Ал ону да ӧдӓ беним ичин хем кендин ичин».