Matfey 14 - Ени Бааланты

Иоан Ваатизедиӂи ӧлдӱрӱлер

¹ О вакытларда Ирод кулланыӂы ишитти Иисус ичин.

² Да деди кенди изметкерлеринӓ: «Бу Иоан Ваатизедиӂи! О дирилди ӧлӱдӓн, онуштан йапабилер кудретли ишлӓр».

³ Ирод, тутуп Иоаны, бааладыйды да аттыйды зындана, Иродиаданын бетеринӓ, ани Иродун кардашынын, Филипин, карысыйды.

⁴ Зерӓ Иоан таказаладыйды Ироду, дейерӓк: «Дӱшмеер йашайасын онуннан».

⁵ Ирод истеди ӧлдӱрсӱн ону, ама коркарды инсандан, зерӓ инсан сайарды Иоаны пророк.

⁶ Иродун дуума гӱнӱ йортусунда Иродиаданын кызы ойнады конакларын ӧнӱндӓ, да Ирод пек беенди.

⁷ Онуштан Ирод адады еминнӓн, ани вереӂек она хепсини, не о истейеӂек.

⁸ Ӱӱредилмиш анасындан кыз деди: «Вер бана бир чини ичиндӓ Иоан Ваатизедиӂинин кафасыны!»

⁹ Падишах гӱчленди, ама чӱнкӱ емин еттийди конакларын ӧнӱндӓ, сымарлады верилсин, не кыз истеди.

¹⁰ Йоллады, алсыннар Иоанын кафасыны зынданда,

¹¹ сора гетирдилӓр кафасыны бир чини ичиндӓ да вердилӓр кыза, кыз да верди анасына.

¹² Иоанын ӱӱрениӂилери гелдилӓр, алдылар онун гӱӱдесини да гӧмдӱлӓр. Сора гиттилӓр да хаберледилӓр Иисуса.

Беш бин адам дойурулэр

¹³ Иисус, буну ишидип, гирди бир кайык ичинӓ да йалныз гитти орадан бир сапа ерӓ. Инсан буну ишитти да, чыкып касабалардан, Онун ардына йайан гитти.

¹⁴ Ачан чыкты кайык ичиндӓн, Иисус гӧрдӱ чок инсан. Ӂаны аӂыды оннара, да алыштырды хасталары.

¹⁵ Ачан авшам олду, Онун ӱӱрениӂилери йаклаштылар да дедилӓр Она: «Бурасы чол ер, вакыт артык геч олду. Колвер инсаны, гитсиннӓр кӱӱлерӓ да сатын алсыннар кендилеринӓ имӓӓ».

¹⁶ «Диил лӓӓзым гитсиннӓр, сиз верин оннара имӓӓ», – ӂувап етти Иисус.

¹⁷ Оннар дедилӓр Она: «Бурада биздӓ вар салт беш екмек хем ики балык».

¹⁸ «Гетирин оннары бурайы Бана», – деди Иисус.

¹⁹ Сора сымарлады инсан отурсун чимен ӱстӱнӓ. Алды беш екмӓӓ хем ики балыы, калдырды бакышыны гӧкӓ, иисӧзледи да, кырып екмеклери, верди ӱӱрениӂилеринӓ. Ӱӱрениӂилӓр пайеттилӓр инсана.

²⁰ Хепси идилӓр да дойундулар, сора топладылар имӓк парчаларыны, оники сепет долу.

²¹ Хепси, ким иди, карылардан хем ушаклардан каарӓ, варды беш бин адам.

Иисус гезер су ӱстӱндӓ

²² Ондан сора Иисус чалыштырды ӱӱрениӂилерини тез гирсиннӓр кайык ичинӓ да ӧнӱ сора гечсиннӓр гӧлӱн ӧбӱр тарафына. Бу вакытта Кендиси лӓӓзымды салверсин инсаны.

²³ Ачан салверди инсаны, пинди бир байыр ӱстӱнӓ, ки йалныз дуа етсин. Ачан авшам олду, йалныз орада булунурду.

²⁴ Бу вакыт кайык кенардан чок узакты да буушарды далгаларлан, зерӓ лӱзгӓр каршы есӓрди.

²⁵ Сабаа каршы, айдыннанаӂэйкан, Иисус гелди оннара гезерӓк су ӱстӱндӓ.

²⁶ Ачан ӱӱрениӂилӓр гӧрдӱлӓр Ону гезерӓк су ӱстӱндӓ, корктулар да дедилӓр: «Бу бир тылсым!» – да коркудан баардылар.

²⁷ Ама Иисус деди оннара: «Усланын, бу Бӓним, коркмайын!»

²⁸ «Сааби, еер Сӓнсейдин, изин ет, гидейим Сана су ӱстӱндӓ», – деди Петри.

²⁹ «Гел!» – деди Иисус. Петри инди кайык ичиндӓн да башлады гитмӓӓ су ӱстӱндӓ Иисуса доору.

³⁰ Ама ачан гӧрдӱ, ани лӱзгӓр серт, коркту да башлады батмаа, озаман баарды: «Сааби, куртар бени!»

³¹ Чабук Иисус узатты елини, тутту ону да деди: «Аз инанӂы, нечин икиледин?»

³² Ачан гирдилӓр кайык ичинӓ, лӱзгӓр дургунду.

³³ Оннар, ким кайык ичиндейди, баш иилттилӓр Она да дедилӓр: «Хакына, ани Сӓн Аллахын Оолуйсун».

Геннисареттӓн хасталар саалык еденерлӓр

³⁴ Ачан гечтилӓр гӧлӱ, чыктылар кенара Геннисарет ерлеринӓ.

³⁵ О ерлердӓн инсаннар таныдылар Иисусу да йолладылар хабер доз-долайа, да инсаннар хепси хасталары Она гетирӓрдилӓр.

³⁶ Хасталар йалварардылар, браксын, диисиннӓр баарлем Онун рубасынын етеенӓ. Хепси, ким диийӓрди, саалык еденӓрди.