Matfey 13 - Ени Бааланты

Екиӂи ичин ӧрнек

¹ О гӱнӱ Иисус чыкты евдӓн да гидип отурурду гӧл бойунда.

² Чок инсан топланды Она, ӧлӓ ани лӓӓзым олду гирсин да отурсун бир кайык ичиндӓ, ама инсан калды кенарда.

³ О лафетти оннара ӧрнеклӓрлӓн чок ишлӓр ичин да деди: «Тӓ екиӂи чыкты тоом екмӓӓ.

⁴ Ачан екӓрди, тоомнардан биразы дӱштӱ йол бойуна. Кушлар кондулар да идилӓр оннары.

⁵ Башка тоомнар ташлык ерлерӓ дӱштӱлӓр, нередӓ аз топрак варды. Тоомнар тез филизлендилӓр, зерӓ топрак диилди дерин.

⁶ Ама ачан гӱнеш чыкты, оннар сӧрпештилӓр да курудулар, зерӓ кӧклери сувадайды.

⁷ Таа башка тоомнар чалылар ичинӓ дӱштӱлӓр. Чалылар бӱӱдӱлӓр да буулттулар филизлери.

⁸ Ама калан тоомнар ии топраа дӱштӱлӓр да берекет гетирдилӓр: бириси ӱз, башкасы алтмыш, таа башкасы отуз катына.

⁹ Кимин вар кулаа /ишитмӓӓ дейни/, ко ишитсин».

¹⁰ Ӱӱрениӂилӓр йаклаштылар да дедилӓр Она: «Нечин лафедерсин оннара ӧрнеклӓн?»

¹¹ Иисус ӂувап етти: «Чӱнкӱ сизӓ верилди, аннайасыныз Гӧк Падишахлыын саклылыкларыны, ама оннара верилмеди.

¹² Зерӓ кимдӓ вар, она таа чок верилеӂек хем зееделенеӂек, ама кимдӓ йок, ондан алынаӂэк, нейи дӓ вар.

¹³ Онун ичин оннара лафедерим ӧрнеклӓрлӓн. Зерӓ, оннар бакаркан, гӧрмеерлӓр, сеслӓркӓн, ишитмеерлӓр хем аннамээрлар.

¹⁴ Оннарлан таманнанэр пророк Исайанын сӧзлери, ангысы деди: „Ишидеӂениз кулакларынызлан, ама аннамайаӂэныз. Бакаӂэныз гӧзлеринизлӓн, ама гӧрӓмейеӂениз.

¹⁵ Зерӓ бу халкын ӱреклери уйвашык олду. Кулакларындан аар ишидерлӓр, гӧзлерини кападылар, ки гӧзлери гӧрмесин, кулаклары ишитмесин хем ӱреклери аннамасын. Башка тӱрлӱ Бана дӧнеӂейдилӓр, да Бӓн оннары алыштыраӂэйдым“.

¹⁶ Мутлу сизин гӧзлериниз, ани гӧрерлӓр, хем кулакларыныз, ани ишидерлӓр!

¹⁷ Доору сӧлеерим сизӓ, ани чойу пророклардан хем доору адамнардан истедилӓр гӧрмӓӓ, не сиз гӧрерсиниз, хем ишитмӓӓ, не сиз ишидерсиниз, ама гӧрмедилӓр хем ишитмедилӓр.

¹⁸ Сеслейин да аннайын, не аннамасы вар бу ӧрнӓӓн екиӂи ичин.

¹⁹ Ким Гӧк Падишахлыы ичин сӧзӱ ишидер да аннамээр, она шейтан гелер да тоому онун ӱреендӓн чалэр. Буннар о тоомнар, ани дӱштӱлӓр йол бойуна.

²⁰ Тоомнар, екилмиш ташлык ерлерӓ, оннардыр, ким, ишидип сӧзӱ, кабледер севинмӓклӓн,

²¹ ама кӧклешӓмеерлӓр хем аз вакыт тутунэрлар. Ачан гелер зорлук еки кооламак Аллахын сӧзӱ ичин, оннар тез атылэрлар.

²² Тоомнар, екилмиш чалылар ичинӓ, оннардыр, ким ишидер сӧзӱ, ама бу заманын кахырлары хем зенгинник алдангачлыы буулдэрлар, да оннар берекет гетирӓмеерлӓр.

²³ Тоомнар, екилмиш ии топраа, оннардыр, ким, ишидип сӧзӱ, аннээр да берекет гетирер: бир тоом ӱз, башкасы алтмыш, таа башкасы отуз катына».

Боодай хем айырык оту

²⁴ Иисус сӧледи таа бир ӧрнек да деди: «Гӧк Падишахлыы бензеер бир адама, ангысы екти ии тоомнары кенди тарласына.

²⁵ Ама ачан инсан уйуйарды, гелди онун душманы да екти айырык тоому боодайлар ичинӓ, сора гитти.

²⁶ Ачан пейдаланды боодай филизлери да башак салверди, ӱзӓ чыкты айырык отлары да.

²⁷ Ев чорбаӂысынын чыраклары гелдилӓр да дедилӓр: „Чорбаӂы, екмедин ми сӓн ислӓӓ тоомнары сенин тарлана? Нередӓн чыкты бу айырык отлары?“

²⁸ О деди оннара: „Буну бир душман йапты“. Озаман чыраклар дедилӓр: „Истӓрсейдин, гиделим да оннары йолалым?“

²⁹ „Олмаз, зерӓ йоларкан айырык отларыны, йолмайасыныз бирердӓ боодайлары да.

³⁰ Бракын, барабар бӱӱсӱннӓр бичмӓк вакыдына кадар. Бичмӓк вакыды дейеӂӓм оракчылара: илкин йолун айырык отларыны да демет оннары баалайын, атешӓ йакмаа дейни. Ама боодайы топлайын беним амбарыма“».

Хардал тоому хем хамур майасы

³¹ Иисус сӧледи бир башка ӧрнек: «Гӧк Падишахлыы бензеер хардал тоомуна, ани адам екер кенди тарласына.

³² Бу тоом, макар, ани таа кӱчӱк хепси тоомнардан, ама ачан бӱӱйер, ешилликлердӓн таа ӱӱсек, бир аач гиби, олэр ӧлӓ, ки кушлар конэрлар онун далларына да йува йапэрлар».

³³ Башка бир ӧрнек сӧледи: «Гӧк Падишахлыы бензеер бир парча хамур майасына, ани алэр бир кары да карыштырэр ӱч ӧлчӱ уннан, бӱтӱн хамуру кабартсын».

³⁴ Иисус хепсини буннары инсана ӧрнеклӓн сӧлӓрди. Бишей ӧрнексиз оннара сӧлӓмӓрди,

³⁵ таманнансын дейни, не сӧледийди пророк: «Лафедеӂӓм ӧрнеклӓрлӓн, дӱннӓ курулмасындан саклы ишлери аннадаӂам».

Айырык тоомун ачыкламасы

³⁶ Ондан сора Иисус салверди инсаны да гирди бир ев ичинӓ. Онун ӱӱрениӂилери йаклаштылар Она да дедилӓр: «Ачыкла бизӓ бу ӧрнӓӓ айырык тоому ичин».

³⁷ О деди оннара: «Екиӂи ии тоому – Адам Оолу.

³⁸ Тарла – дӱннӓ. Ии тоом – Гӧк Падишахлыын ооллары. Айырык тоомнар – йарамазын ооллары.

³⁹ Душман, айырык тоомуну екӓн – диавол. Бичмӓк вакыды – заман биткиси. Оракчылар – ангиллӓр.

⁴⁰ Ниӂӓ айырык оту йолунэр да атылэр атешӓ, ӧлӓ олаӂэк заман биткисиндӓ дӓ.

⁴¹ Адам Оолу йоллайаӂэк Кенди ангиллерини да топлайаӂэклар Онун Падишахлыындан хепсини, не гӱнаха дӱшӱрер хем ким законсузлук йапэр,

⁴² да кызгын фырына атылаӂэклар, нередӓ ааламак хем диш гыӂырдатмасы.

⁴³ Озаман доору оланнар шафк едеӂеклӓр, гӱн гиби, Бобанын Падишахлыында. Кимин вар кулаа /ишитмӓӓ дейни/, ко ишитсин!

Саклы хазна хем седеф

⁴⁴ Гӧк Падишахлыы бензеер бир хазнайа, ани гӧмӱлӱ бир тарлада. Бир адам, ани булэр ону, енидӓн саклээр да севинмектӓн гидип сатэр бӱтӱн варлыыны да о тарлайы сатын алэр.

⁴⁵ Хем да Гӧк Падишахлыы бензеер бир безиргенӓ, ани аарээр гӧзӓл седеф.

⁴⁶ Ачан пек паалы седеф булэр, гидер да сатэр, нейи вар, да сатын алэр седефи.

Балыкчылык

⁴⁷ Хем да Гӧк Падишахлыы бензеер бир сӱзмейӓ, ани салверерлӓр су ичинӓ балык тутмаа дейни, ани тутэр хертӱрлӱ балык.

⁴⁸ Ачан долэр сӱзмӓ балыклан, балыкчылар чыкарэрлар кенара да отуруп айырэрлар каплар ичинӓ ии балыклары, ама инмӓз балыклары сыбыдэрлар.

⁴⁹ Хеп ӧлӓ олаӂэк дӱннейин биткисиндӓ дӓ. Ангиллӓр чыкаӂэклар да айыраӂэклар кӧтӱлери дооруларын ичиндӓн.

⁵⁰ Кӧтӱлери атаӂэклар йанар фырына, нередӓ олаӂэк ааламак хем диш гыӂырдатмасы».

⁵¹ «Шинди аннадыныз мы хепси бу ишлери?» – сорду Иисус. «Аннадык», – ӂувап етти оннар.

⁵² О деди оннара: «Онуштан хербир билгич, ангысы ӱӱренди, не лӓӓзым Гӧк Падишахлыы ичин, бензеер бир ев чорбаӂысына, ангысы чыкарэр хазнасындан хем ени, хем ески ишлӓр».

Иисус паасызланэр Кенди мемлекетиндӓ

⁵³ Иисус, ачан дургунду лафетмӓӓ ӧрнеклӓн, гитти орадан.

⁵⁴ Гелди Кенди мемлекетинӓ да башлады ӱӱретмӓӓ инсаны синагогада. Инсан шашарды да дейӓрди: «Нередӓн Онда вар бу аарифлик хем кудретли ишлӓр?

⁵⁵ Диил ми О дӱлгерин оолу? Марийа диил ми Онун анасы? Иаков, Иосиф, Симон хем Иуда диил ми Онун кардашлары?

⁵⁶ Хем диил ми Онун хепси кызкардашлары бизим арамызда? Нередӓн хепси бу ишлӓр вар Онда?»

⁵⁷ Бу бетерӓ Иисус ичин шӱпейӓ дӱштӱлӓр. Иисус деди оннара: «Бир дӓ пророк диил паасызландырылмыш ӧлӓ, ниӂӓ кенди мемлекетиндӓ хем кенди евиндӓ».

⁵⁸ Иисус орада йапмады чок кудретли ишлӓр, оннарын инансызлыы бетеринӓ.