Matfey 1 - Ени Бааланты

Иисусун сенселеси

¹ Иисус Христозун, Давидин оолунун хем Авраамын оолунун сенселеси будур:

² Авраамдан дуума Исаак. Исаактан дуума Иаков. Иаковдан дуума Иуда хем онун кардашлары.

³ Иудадан дуума Фарес хем Зара, ангыларын анасы Фамар. Фарестӓн дуума Есром. Есромдан дуума Арам.

⁴ Арамдан дуума Аминадав. Аминадавдан дуума Наассон. Наассондан дуума Салмон.

⁵ Салмондан дуума Вооз, Воозун анасы Раав. Вооздан дуума Овид, ангысынын анасы Руф. Овидтӓн дуума Иессей.

⁶ Иессейдӓн дуума падишах Давид. Давидтӓн дуума Соломон, ангысы Урийанын дулундан дууду.

⁷ Соломондан дуума Ровоам. Ровоамдан дуума Авийа. Авийадан дуума Аса.

⁸ Асадан дуума Иосафат. Иосафаттан дуума Иорам. Иорамдан дуума Озийа.

⁹ Озийадан дуума Иоафам. Иоафамдан дуума Ахаз. Ахаздан дуума Езекийа.

¹⁰ Езекийадан дуума Манассийа. Манассийадан дуума Амон. Амондан дуума Иосийа.

¹¹ Иосийадан дуума Иехонийа хем онун кардашлары, таа Израил миллети гечмедийнӓн Вавилон есирлиинӓ.

¹² Вавилона гечтиктӓн сора: Иехонийадан дуума Салафиил. Салафиилдӓн дуума Зоровавел.

¹³ Зоровавелдӓн дуума Авиуд. Авиудтан дуума Елиаким. Елиакимдӓн дуума Азор.

¹⁴ Азордан дуума Садок. Садоктан дуума Ахим. Ахимдӓн дуума Елиуд.

¹⁵ Елиудтан дуума Елеазар. Елеазардан дуума Матфан. Матфандан дуума Иаков.

¹⁶ Иаковдан дуума Иосиф, Марийанын коӂасы. Марийадан дуума Иисус, Ангысына денер Христос.

¹⁷ Ӧлӓ ки, Авраамдан Давидӓ кадар ондӧрт евлат бойу; Давидтӓн Вавилон есирлиинӓ кадар ондӧрт евлат бойу; Вавилон есирлииндӓн Христоза кадар хеп ондӧрт евлат бойу.

Иисусун дуумасы

¹⁸ Иисус Христозун дуумасы бӧлӓ олду: ачан Онун анасы Марийа Иосифлӓн йавклу олдуйду, ама таа йашамардылар барабар, аннашылды, ани Марийа Айоз Духтан гебӓ калды.

¹⁹ Онун йавклусу Иосиф, чӱнкӱ доору бир адамды да истӓмӓрди утандырсын Марийайы аалемин ӧнӱндӓ, карарлады саклыдан ондан атылмаа.

²⁰ Буну дӱшӱнӓркӓн, Саабидӓн бир ангил дӱшӱндӓ она гӧрӱндӱ да деди: «Иосиф, Давидин оолу! Коркма Марийайы кендинӓ кары алмаа, зерӓ онун гебӓ калмасы Айоз Духтан.

²¹ Марийа бир оол дуудураӂэк. Онун адыны Иисус койаӂан, зерӓ О Кенди инсаныны гӱнахларындан куртараӂэк».

²² Буннар хепси олду, ки таманнансын, не Сааби сӧледи пророклан, ангысы деер:

²³ «Тӓ кыз гебӓ калаӂэк да бир оол дуудураӂэк. Онун адыны койаӂэклар „Еммануил“, аннамасы „Аллах бизимнӓн“».

²⁴ Ачан Иосиф уйанды, йапты ниӂӓ Саабинин ангили сымарлады, да Марийайы кары кендинӓ каблетти.

²⁵ Ама онуннан бирлешмеди, таа Марийа дуудурмайынӂа оолуну, да дууан ушаан адыны Иисус койду.