Mark 8 - Ени Бааланты

Дӧрт бин адам дойурулэр

¹ Бир гӱнӱ, ачан генӓ топланды чок инсан, да йокту не исиннӓр, Иисус чаарды ӱӱрениӂилери да деди оннара:

² «Ӂаным аӂыйэр бу инсана, зерӓ ӱч гӱн дурэрлар йанымда, да йок не исиннӓр.

³ Еер бракарсам, аач гитсиннӓр евӓ, йолда байылаӂэклар, зерӓ кимилери узактан гелди».

⁴ Ӱӱрениӂилери Она ӂувап еттилӓр: «Нередӓн вар ниӂӓ алмаа бу чол ердӓ окадар екмек, ки дойурмаа оннары?»

⁵ «Кач екмеениз вар?» – сорду Иисус. «Еди», – ӂувап етти оннар.

⁶ Озаман Иисус сымарлады инсана, отурсуннар ерӓ. Алды еди екмӓӓ, шӱкӱр етти Аллаха да, кырып, верди ӱӱрениӂилеринӓ, пайетсиннӓр. Оннар пайеттилӓр инсана.

⁷ Варды оннарда биркач балыӂак да. Иисус, иисӧзлейип, сымарлады, пайетсиннӓр оннары да инсана.

⁸ Идилӓр да дойундулар. Сора топладылар еди сепет, долу имӓк парчасыннан.

⁹ Варды йакын дӧрт бин киши. Бундан сора Иисус оннары бракты гитсиннӓр.

¹⁰ Иисус гирди ӱӱрениӂилериннӓн барабар кайык ичинӓ да гитти Далмануфа ерлеринӓ.

Нышан истеерлӓр

¹¹ Хемен гелди фарисейлӓр да башладылар чекишмӓӓ Иисуса, ки денесиннӓр Ону. Истӓрдилӓр Ондан бир нышан гӧктӓн.

¹² Иисус дериндӓн солуду да деди оннара: «Нечин бу бой инсан истеер бир нышан? Доору сӧлеерим сизӓ, ани бу инсана нышан верилмейеӂек».

¹³ Сора бракты оннары да енидӓн гирди кайык ичинӓ, гечсин дейни гӧлӱн ӧбӱр тарафына.

Фарисейлерин хем Иродун майасы

¹⁴ Озаман ӱӱрениӂилӓр екмек алмаа унутмуштулар. Кайык ичиндӓ оннарда варды саде бир екмек.

¹⁵ Иисус хаберледи оннары, дейип: «Бакын, корунун фарисейлерин хем Иродун майасындан!»

¹⁶ Ӱӱрениӂилӓр бири-бириннӓн лафедӓрдилӓр: «Онуштан деер, зерӓ йок екмеемиз».

¹⁷ Иисус, буну билерӓк, деди оннара: «Нечин лафедерсиниз, ани йок екмеениз? Хеп таа аклыныз ермеер ми, аннамээрсыныз мы? Хеп таа уйвашык ӱреклериниз?

¹⁸ Вар гӧзлериниз, да гӧрмеерсиниз ми? Вар кулакларыныз, да ишитмеерсиниз ми? Не, хич ми аклыныза гетирмеерсиниз,

¹⁹ ачан беш екмӓӓ пайеттим беш бин кишийӓ, кач сепет, долу имӓк парчасыннан, топладыныз?» «Оники», – ӂувап етти оннар.

²⁰ «Хем ачан пайеттим еди екмӓӓ дӧрт бин кишийӓ, кач сепет, долу имӓк парчасыннан, топладыныз?» «Еди», – ӂувап етти оннар.

²¹ Сора сорду оннара: «Хеп таа аннамээрсыныз мы?»

Вифсаида касабасындан хаста

²² Ачан гелдилӓр Вифсаида касабасына, гетирдилӓр Иисуса бир кӧӧр, да йалвардылар диисин она.

²³ Иисус алды кӧӧр адамы елиндӓн да чыкарды ону оннарын кӱӱйӱндӓн бир тарафа. Сора тӱкӱрдӱ онун гӧзлеринӓ, койду еллерини онун ӱстӱнӓ да сорду: «Гӧрерсин ми бишей?»

²⁴ О бакты йукары да деди: «Гӧрерим инсаны гезерӓк, оннар гӧрӱнер аачлар гиби».

²⁵ Иисус енидӓн койду еллерини онун гӧзлеринӓ. Адам гӧзлерини ачты да бакты. Гӧзлери алышмышты, хепсини ачык гӧрӓрди.

²⁶ Сора Иисус йоллады ону евӓ да деди: «Гирмӓ кӱӱ ичинӓ /хем кимсейӓ бишей сӧлӓмӓ кӱӱдӓ/».

Петринин шаатлыы Иисус ичин

²⁷ Иисус гитти ӱӱрениӂилериннӓн барабар Филип Кесарийасынын кӱӱлеринӓ. Йолда Иисус койду оннара бир соруш: «Не деер инсан, Кимим Бӓн?»

²⁸ Оннар ӂувап еттилӓр: «Кимиси деер, ани Сӓн – Иоан Ваатизедиӂи, башкасы – пророк Илийа, таа башкасы – пророклардан бириси».

²⁹ «Ама сиз не деерсиниз, кимим Бӓн?» – сорду Иисус. «Сӓнсин Христос», – ӂувап етти Петри.

³⁰ Иисус сыкыдан сымарлады, Онун ичин кимсейӓ сӧлӓмесиннӓр.

Иисус хаберлеер ӧлӱмӱнӱ хем дирилмесини

³¹ Сора башлады оннара сӧлемӓӓ, ани Адам Оолу лӓӓзым чок зеетленсин, сыбыдылмыш олсун аксакаллардан, бӱӱк попазлардан, билгичлердӓн, ӧлдӱрӱлсӱн да ӱч гӱндӓн сора дирилсин.

³² Буннары ачык сӧледи. Петри алды Ону бир тарафа да башлады таказаламаа.

³³ Иисус дӧндӱ, бакарак ӱӱрениӂилеринӓ, азарлады Петрийи да деди: «Узаклан Бендӓн, шейтан! Зерӓ сенин неетлерин диил Аллахтан, ама адамдан».

Несой излейелим Иисусу?

³⁴ Сора Иисус топлады инсаны хем ӱӱрениӂилерини да деди: «Ким истеер гелсин Беним ардыма, атылсын кенди-кендиндӓн, алсын ставрозуну да Бени излесин.

³⁵ Зерӓ ким истеер куртармаа кенди йашамасыны, кайбедеӂек ону. Ама ким кайбедеӂек йашамасыны Беним ичин хем Ии Хабер ичин, о йашамасыны куртараӂэк.

³⁶ Зерӓ не файда олаӂэк адама, казансын бӱтӱн дӱннейи, ама кенди йашамасыны кайбетсин?

³⁷ Нейлӓн вар насыл адам дииштирсин кенди йашамасыны?

³⁸ Еер биркимсей утанарса Бендӓн хем Беним сӧзлеримдӓн бу ороспу хем гӱнахкер бой инсанын ӧнӱндӓ, ондан утанаӂэк Адам Оолу да, ачан гелеӂек Бобасынын метиннииндӓ айоз ангиллериннӓн барабар».