Mark 3 - Ени Бааланты

Куру еллӓн бир адам

¹ Иисус енидӓн гирди синагога ичинӓ. Орада варды бир адам куру еллӓн.

² Фарисейлӓр гӧзледӓрдилӓр Иисусун ардына, гӧрсӱннӓр дейни, алыштыраӂэк мы бу адамы ӂумертеси гӱнӱ, ки сора кабаатландырсыннар Ону.

³ Иисус деди куру еллӓн адама: «Калк да чык каршыйа».

⁴ Сора сорду оннара: «Не дӱшер ӂумертеси гӱнӱ йапмаа: иилик ми оса кӧтӱлӱк мӱ? Йашамайы куртармаа мы оса ӧлдӱрмӓӓ ми?» Оннар сусардылар.

⁵ Ӱфкели бакты долайында оланнара, гӱчленерӓк оннарын ӱреклерин уйвашыклыы бетеринӓ, сора деди о адама: «Узат елини!» О узатты, да ели алышты, енидӓн саа олду, ниӂӓ ӧбӱр ели.

⁶ Фарисейлӓр чыктылар дышары да чабук Иродун адамнарыннан аннаштылар, несой ӧлдӱрӓбилсиннӓр Иисусу.

Иисус гӧл йанында алыштырэр хасталары

⁷ Иисус ӱӱрениӂилериннӓн барабар йолланды гӧл бойуна. Онун ардына гитти чок инсан Галилейадан, Иудейадан,

⁸ Иерусалимдӓн, Идумейадан хем Иорданын ӧбӱр тарафындан. Инсаннар Тир хем Сидон касабаларын тарафындан, ишидип, не О йапэр, сӱрӱ-сӱрӱ гелӓрдилӓр Она.

⁹ Иисус сымарлады ӱӱрениӂилеринӓ хазырласыннар Она бир кайык, ки инсан сыкыштырмасын Ону.

¹⁰ Чӱнкӱ чок инсан алыштырдыйды, онуштан хасталар итириширдилӓр, баарлем диисиннӓр Она.

¹¹ Фена духлар, ачан гӧрӓрдилӓр Ону, дӱшӓрдилӓр ерӓ Онун ӧнӱндӓ да баарардылар: «Сӓн Аллахын Оолуйсун!»

¹² Ама О серт сымарларды оннара, ачыкламасыннар Ону башкаларына.

Иисус айырэр оники апостол

¹³ Сора Иисус пинди байыр ӱстӱнӓ да чаарды, кими истеди. Оннар топландылар Она.

¹⁴ Оннарын ичиндӓн айырды оникисини, ангыларына апостол деди, ки олсуннар Онуннан, да йолласын оннары насаат етмӓӓ,

¹⁵ хем куветлери олсун /алыштырмаа хасталары хем/ кооламаа фена духлары.

¹⁶ Буннар, кими Иисус айырды, оники киши: Симон, ангысынын адыны койду Петри;

¹⁷ Иаков хем Иоан, Зеведейин ооллары, ангыларын адларыны койду Воанергес, аннамасы «Гӧк гӱрӱлтӱ ооллары»;

¹⁸ Андрей; Филип; Варфоломей; Матфей; Фома; Иаков, Алфейин оолу; Фаддей; Симон Кананит

¹⁹ хем Иуда Искариот, ангысы Иисусу сатты.

Айоз Духа каршы гӱнах

²⁰ Иисус бундан сора евӓ гитти. Енидӓн топланды инсан ӧлӓ чоклук, ани Иисуслан ӱӱрениӂилерин йокту колайы екмек исиннӓр.

²¹ Хысымнары ишиттилӓр буну да гелдилӓр, алсыннар Ону, зерӓ оннар дейӓрдилӓр, ани О акылдан чыкты.

²² Билгичлӓр, ани гелдилӓр Иерусалимдӓн, дейӓрдилӓр, ани О Веелзевулдан тутулу, хем ани фена духлары чыкарэр фена духларын ӧндерӂисинин кувединнӓн.

²³ Иисус топлады оннары да лафетти ӧрнеклӓрлӓн: «Несой шейтан вар насыл шейтаны чыкарсын?

²⁴ Хербир падишахлык, нередӓ бӧлӱнмӓк олэр, йок насыл айакча дурсун.

²⁵ Хербир ев, нередӓ бӧлӱнмӓк олэр, йок насыл айакча дурсун.

²⁶ Хеп ӧлӓ шейтан да, кенди-кендинӓ каршы гидӓрсӓ хем бӧлӱнмӓк йапарса, дурамаз айакча, ама биткиси гелир.

²⁷ Кимсей йок насыл гирсин каави оланын евинӓ, ки чалсын онун варлыыны, еер илкин бааламарсайды ону. Салт ондан сора вар насыл сойсун онун евини.

²⁸ Доору сӧлеерим сизӓ, хер гӱнах, ани инсан йапэр, хем хер кӧтӱ лаф, ани сӧлеер, баашланэр.

²⁹ Ама ким кӧтӱлеер Айоз Духу, хич бир сыра билӓ баашланмайаӂэк. О кабаатлы бир гӱнахлан, ани дивеӂинӓ калаӂэк».

³⁰ Буну сӧледи, зерӓ оннар дейӓрдилӓр: «Онда вар фена дух».

Иисусун анасы хем кардашлары

³¹ О вакыт гелдилӓр Иисусун анасы хем кардашлары да, дуруп дышарда, йолладылар чаарсыннар Ону.

³² Чоклук отурарды Онун долайында, ачан Она сӧледилӓр: «Бак, Сенин анан хем кардашларын дышарда, сени аарээрлар».

³³ «Ким Беним анам хем ким Беним кардашларым?» – ӂувап етти О.

³⁴ Сора бакты Онун долайында отураннара да деди: «Тӓ, Беним анам хем кардашларым!

³⁵ Ким таманнээр Аллахын истедиини, оннар Бана кардаш, кызкардаш хем ана».