Mark 2 - Ени Бааланты

Иисус алыштырэр кӧтӱрӱм адамы

¹ Биркач гӱндӓн сора Иисус енидӓн гелди Капернаум касабасына. Ишидилди, ани О евдӓ.

² Ӧлӓ чок инсан топланды, ани капунун дышанда артык дурмаа ер йокту. Иисус аннадарды оннара Аллахын сӧзӱнӱ.

³ Она биркач адам гелди, гетирерӓк бир кӧтӱрӱм хаста, ангысыны дӧрт киши ташыйарды.

⁴ Чӱнкӱ йаклашамардылар Она калабалык бетеринӓ, ачтылар евин ӧртӱсӱнӱ, нередӓ булунурду Иисус, да индирдилӓр хастайы дӧшек ӱстӱндӓ.

⁵ Иисус, гӧрӱп оннарын инаныны, деди кӧтӱрӱм адама: «Оолум! Гӱнахларын баашланды».

⁶ Билгичлердӓн кимиси, ангылары отурардылар орада, кенди-кендилеринӓ дӱшӱнӓрдилӓр:

⁷ «Нечин бу адам Аллахы бӧлӓ кӧтӱлеер? Ким, Аллахтан каарӓ, вар насыл гӱнахлары баашласын?»

⁸ Иисус бирдӓн ичйандан дуйду, ани оннар бӧлӓ дӱшӱнерлӓр, онуштан деди оннара: «Нечин ӧлӓ дӱшӱнерсиниз ӱреклериниздӓ?

⁹ Не таа колай: кӧтӱрӱм адама демӓӓ „Гӱнахларын баашланды мы“, оса демӓӓ „Калк, ал дӧшеени да гез ми“?

¹⁰ Ама ки билӓсиниз, ани Адам Оолунун вар куведи ер ӱстӱндӓ гӱнахлары баашласын…»,

¹¹ дӧнӱп кӧтӱрӱм адама, деди: «Сана сымарлээрым: калк, ал дӧшеени да гит евӓ!»

¹² Чабук бу кӧтӱрӱм адам хепсинин ӧнӱндӓ калкты, алды дӧшеени да чыкты дышары. Хепси шашардылар, Аллахы метиннейерӓк, дейӓрдилӓр: «Бӧлӓ иш хич бир сыра билӓ гӧрмедик!»

Иисус чаарэр Левийи

¹³ Иисус енидӓн чыкып-гитти гӧл бойуна, хепси инсан Онун йанына топланды, да О оннары ӱӱредӓрди.

¹⁴ Орадан гечӓркӓн, гӧрдӱ Левийи, Алфейин оолуну, ани отурурду ердӓ, нередӓ харч топланарды, да деди она: «Гел Беним ардыма». Левий калкты да гитти Онун ардына.

¹⁵ Ачан Иисус Левийин евиндӓ конакланарды, чок харччылар хем гӱнахкерлӓр Онуннан хем ӱӱрениӂилериннӓн барабар софрада булунардылар. Бӧлӓ чок киши варды, ани Онун ардына гидӓрдилӓр.

¹⁶ Кими билгичлӓр фарисейлердӓн гӧрдӱлӓр, ани харччыларлан хем гӱнахкерлӓрлӓн билӓ ийер, онун ичин дедилӓр Онун ӱӱрениӂилеринӓ: «Нечин О ийер /хем ичер/ харччыларлан хем гӱнахкерлӓрлӓн барабар?»

¹⁷ Иисус, ишидип буну, ӂувап етти оннара: «Дофтор лӓӓзым диил саа оланнара, ама хасталара. Бӓн гелмедим, чаарайым доорулары, ама гӱнахкерлери, /Аллаха дӧнсӱннӓр/».

Оруч ичин соруш

¹⁸ Иоанын ӱӱрениӂилери хем фарисейлӓр оруч тутардылар. Биркач киши гелдилӓр Иисуса да сордулар: «Нечин Иоанын хем фарисейлерин ӱӱрениӂилери оруч тутэрлар, ама Сенин ӱӱрениӂилерин тутмээрлар?»

¹⁹ Да деди оннара Иисус: «Вар мы насыл гӱвеенин достлары оруч тутсуннар, ачан гӱвӓӓ йаннарында? Некадар вакыт йаннарында гӱвӓӓ, оннар оруч тутмазлар.

²⁰ Гелеӂек вакыт, ачан гӱвӓӓ алынаӂэк оннардан, озаман, о гӱн, оннар оруч тутаӂэк.

²¹ Кимсей ески рубайа ени йама йамамээр, зерӓ ени йама таа пек ески рубайы йыртэр. Сонда йыртык таа бӱӱк олэр.

²² Кимсей ени шарабы ески тулумнар ичинӓ долдурмаз, зерӓ ени шарап патладэр тулумнары. Шарап дӧкӱлер, тулумнар да зӓн олэр. Ени шарабы лӓӓзым долдурмаа ени тулумнар ичинӓ».

Не дӱшер ӂумертеси йапмаа?

²³ Олду ӧлӓ, ани бир ӂумертеси гӱнӱ Иисус екиннӓр ичиндӓн гечӓрди. Гидӓркӓн йолда, Онун ӱӱрениӂилери башак копармаа башладылар.

²⁴ Фарисейлӓр дедилӓр Иисуса: «Йа бак, нечин оннар йапэрлар, не дӱшмеер ӂумертеси гӱнӱ?»

²⁵ Иисус деди оннара: «Окумадыныз мы, не йапты Давид хем кафадарлары, ачан аӂыктылар?

²⁶ Ниӂӓ Авиафарын, баш попазын, вакыдында о гирди Аллахын евинӓ да иди екмеклердӓн, ани Аллахын ӧнӱнӓ койуларды, ангыларыны, попазлардан каарӓ, кимсей дӱшмӓрди исин. Сора верди кафадарларына да».

²⁷ Иисус деди оннара: «Ӂумертеси адам ичин курулду, ама диил адам ӂумертеси ичин.

²⁸ Ӧлӓ ки, Адам Оолу – артык ӂумертесинин дӓ Саабиси».