Mark 10 - Ени Бааланты

Дӱшер ми, кары-коӂа айырылсыннар?

¹ Иисус гитти орадан да гелди Иудейа ерлеринӓ, Иорданын ӧбӱр тарафына. Инсан генӓ топланды Онун долайына. О алышмасына гӧрӓ башлады енидӓн ӱӱретмӓӓ оннары.

² Гелдилӓр фарисейлӓр да, денейип Ону, сордулар: «Дӱшер ми, адам айырылсын кенди карысындан?»

³ Иисус сорду оннара: «Не сизӓ Моисей сымарлады?»

⁴ Оннар дедилӓр: «Моисей бракты, коӂа йазсын айырылмак кийады да айырылсын карысындан».

⁵ Иисус ӂувап етти оннара: «Сизин инатлыыныз бетеринӓ Моисей йазыларында верди сизӓ бу сымарламайы.

⁶ Ама дӱннейин курулмасындан „Аллах йаратты инсаннары, олсуннар адам хем кары.

⁷ Онуштан бракаӂэк адам бобасыны хем анасыны

⁸ да бирлешеӂек карысыннан. Икиси бир гӱӱдӓ олаӂэк“. Бутакым олаӂэклар диил ики, ама бир гӱӱдӓ.

⁹ Ӧлӓ ки, не Аллах бирлештирди, инсан ону айырмасын».

¹⁰ Ичердӓ ӱӱрениӂилӓр енидӓн сордулар Она хеп бунун ичин.

¹¹ О деди оннара: «Ким айырылэр карысындан да евленер башкасына, ороспулук йапэр.

¹² Хем хер кары, ани бракэр коӂасыны да евленер башка адама, ороспулук йапэр».

Иисус иисӧзлеер ушаклары

¹³ Гетирӓрдилӓр Иисуса ушаклары, ки диисин оннара, ама ӱӱрениӂилӓр азарладылар оннары.

¹⁴ Иисус, гӧрӱп буну, ӱфкеленди да деди ӱӱрениӂилеринӓ: «Бракын ушаклары, гелсиннӓр Бана, да дургутмайын оннары, зерӓ Аллахын Падишахлыы оннарын гибилери ичин.

¹⁵ Доору сӧлеерим сизӓ: ким каблетмейеӂек Аллахын Падишахлыыны бир ушак гиби, о орайы хич гирӓмейеӂек».

¹⁶ Сора куӂаклады ушаклары, койду еллерини оннарын ӱстӱнӓ да иисӧзледи.

Зенгинник хем дивеч йашамак

¹⁷ Ачан Иисус йолланды йола гитмӓӓ, хызлы гелди бир адам, диз чӧктӱ Онун ӧнӱндӓ да сорду: «Ии Ӱӱредиӂи, не йапайым, ки дивеч йашамак еденейим?»

¹⁸ «Нечин деерсин Бана „ии“? Кимсей диил ии, салт бир Аллах, – ӂувап етти Иисус. –

¹⁹ Билерсин сымарламаклары: „Ороспулук йапмайасын, ӧлдӱрмейӓсин, чалмайасын, йаланӂы шаат олмайасын, алдатмайасын, бобаны-ананы икрамнайасын“».

²⁰ О ӂувап етти: «Ӱӱредиӂи, хепси буннары таманнадым таа генчлиимдӓн».

²¹ Иисус бакты уз онун гӧзлеринӓ, севди ону да деди: «Сана етишмеер салт бир иш. Гит да сат, нейин вар, пайет фукааралара, да олаӂэк хазнан гӧктӓ. Сора гел, /ал ставрозуну/ да излӓ Бени».

²² О, ишидип бу лафлары, гӱӂеник гитти, зерӓ чок зенгиннии варды.

²³ Иисус бакты долайа да деди ӱӱрениӂилеринӓ: «Некадар зор Аллахын Падишахлыына гирсин оннар, кимин вар зенгиннии!»

²⁴ Ӱӱрениӂилӓр шаш-беш калдылар Онун сӧзлериндӓн. Иисус енидӓн лафетти да деди: «Ушаклар, некадар зор Аллахын Падишахлыына гирсин /оннар, ким умудуну койэр зенгиннӓӓ/!

²⁵ Таа илин бир девӓ ииненин кулаандан гечсин, некадар бир зенгин адам Аллахын Падишахлыына гирсин».

²⁶ Ӱӱрениӂилӓр пек чок шаштылар да бири-биринӓ дедилӓр: «Озаман ким куртулабилир?»

²⁷ Иисус бакты уз оннарын гӧзлеринӓ да деди: «Бу инсана олмаз, ама диил Аллаха, зерӓ Аллаха хепси олур».

²⁸ Петри лафетмӓӓ башлады да Она деди: «Тӓ, биз брактык хепсини да гелдик Сенин ардына».

²⁹ Иисус ӂувап етти: «Доору сӧлеерим сизӓ: хепси, ким бракты евини, кардашларыны, кызкардашларыны, анасыны, бобасыны, /карысыны,/ ушакларыны еки мерасыны Беним ичин хем Ии Хабер ичин,

³⁰ о кабледеӂек шинди, бу ӧмӱрдӓ, ӱз катына таа чок ев, кардаш, кызкардаш, ана, ушак, тарла, кооламакларлан билӓ, ама гелӓн ӧмӱрдӓ кабледеӂек дивеч йашамак.

³¹ Ама чойу илк оланнардан битки олаӂэк, чойу да биткилердӓн илк олаӂэк».

Иисус ӱчӱнӂӱ сыра хаберлеер ӧлӱмӱнӱ хем дирилмесини

³² Ачан оннар йолда Иерусалимӓ доору гидӓрдилӓр, Иисус оннарын ӧнӱ сора гидӓрди. Ӱӱрениӂилӓр титсинӓрдилӓр, Онун ардына гиденнӓр коркардылар. Иисус, енидӓн алып бир тарафа оники ӱӱрениӂисини, башлады оннара сӧлемӓӓ, не олаӂэк Онуннан:

³³ «Тӓ, биз гидериз Иерусалимӓ. Адам Оолу верилеӂек бӱӱк попазларын хем билгичлерин елинӓ. Ону ӧлӱмӓ даава едеӂеклӓр да йабанӂыларын елинӓ вереӂеклӓр.

³⁴ Ону гӱлмӓӓ алаӂэклар, камчыйлан дӱӱйеӂеклӓр, тӱкӱреӂеклӓр ӱзӱнӓ да ӧлдӱреӂеклӓр, ама О ӱч гӱндӓн сора дирилеӂек».

Зеведейин оолларынын истемеси

³⁵ Йаклашэр Зеведейин ооллары Иаков хем Иоан да деерлӓр Она: «Ӱӱредиӂи, биз истеериз, йапасын, не биз Сана йалвараӂэз».

³⁶ О сорду оннара: «Не истеерсиниз, йапайым сизин ичин?»

³⁷ Оннар дедилӓр: «Изин вер, ани отуралым Сениннӓн, биримиз саа тарафында, биримиз дӓ сол тарафында, ачан Сӓн метинниктӓ олаӂан».

³⁸ Иисус ӂувап етти оннара: «Билмеерсиниз, не истеерсиниз. Вар мы ниӂӓ сиз ичӓсиниз о чӧлмектӓн, ани Бӓн ичерим, еки ваатиз оласыныз о ваатизликлӓн, ани Бӓн олэрым?»

³⁹ Оннар ӂувап еттилӓр: «Вар ниӂӓ». Иисус деди оннара: «Ичеӂениз о чӧлмектӓн, ани Бӓн ичерим, хем ваатиз олаӂэныз о ваатизликлӓн, ани Бӓн олэрым.

⁴⁰ Ама Бендӓн тутунмээр, изин верейим отурмаа саа еки сол тарафымда. Бу верилеӂек оннара, кимӓ хазырланмыш».

⁴¹ Калан он ӱӱрениӂи, ишидип буну, ӱфкелендилӓр Иакова хем Иоана.

⁴² Иисус чаарды оннары да деди: «Билерсиниз, ани ким сайылэр миллетлерин ӧндерӂилери, оннар чорбаӂылык едерлӓр инсан ӱстӱнӓ хем бӱӱклери заабитлик едерлӓр.

⁴³ Ама сизин аранызда бӧлӓ олмасын. Ким сиздӓн истеер бӱӱк олсун, о изметкӓр олсун каланына.

⁴⁴ Ким сиздӓн истеер илк олсун, о чырак олсун хепсинӓ.

⁴⁵ Зерӓ Адам Оолу гелмеди, ки Она измет етсиннӓр, ама Кенди измет етсин инсана хем версин йашамасыны чойун еринӓ, ки куртарабилсин оннары».

Кӧӧр Вартимей

⁴⁶ Гелдилӓр Иерихон касабасына. Ачан Иисус чыкарды Иерихон касабасындан ӱӱрениӂилериннӓн хем чок инсаннан, Тимейин оолу, Вартимей, кӧӧр диленӂи, отурарды йол бойунда.

⁴⁷ О ишитти, ани Назаретли Иисус орадан гечер, да башлады баармаа: «Иисус, Давидин Оолу, аӂы бени!»

⁴⁸ Чойу таказаларды ону, суссун дейни, ама о таа пек баарарды: «Давидин Оолу, аӂы бени!»

⁴⁹ Иисус дургунду да деди: «Чаарын ону». Чаардылар кӧӧр адамы да дедилӓр: «Калк да гиргин ол, О сени чаарэр».

⁵⁰ О сыбытты ӱстӱнкӱ рубасыны, калкып-атлады да гелди Иисуса.

⁵¹ Иисус сорду: «Не истеерсин, йапайым сана?» «Раввуни, гӧрмӓк еденейим», – ӂувап етти бу кӧӧр адам.

⁵² Озаман Иисус деди она: «Вар насыл гидӓсин, сенин инанын сени куртарды». Чабук кӧӧр адам башлады гӧрмӓӓ да гитти йол бойунӂа Иисусун ардына.