Mark 1 - Ени Бааланты

Иоан Ваатизедиӂи

¹ Иисус Христозун, Аллахын Оолунун, Ии Хабери башлантысы.

² Ниӂӓ йазылы пророк Исайанын кийадында: «Тӓ, Бӓн йоллээрым хаберӂими Сенин ӧнӱн сора, ангысы хазырлайаӂэк йол Сана».

³ «Бааранын сеси чол ердӓ ишидилер: „Саабийӓ йолу хазырлайын, йолӂаазлары узладын“».

⁴ Иоан гелди, чол ердӓ ваатиз едерӓк хем насаат едерӓк, ани инсан лӓӓзым дӧнсӱн гӱнахларындан Аллаха хем ваатиз олсун, ки баашламак еденсиннӓр.

⁵ Бӱтӱн Иудейа ерлериндӓн, Иерусалим касабасындан гелӓрдилӓр да хепси ваатиз олардылар ондан Иордан дересиндӓ, кенди гӱнахларыны ачыклайарак.

⁶ Иоан гиийимнийди девӓ йапаасындан рубайлан, кушаныкты деридӓн кайышлан, ийӓрди чекиргӓ хем кыр ары балы.

⁷ Иоан насаат едӓрди: «Беним ардыма гелер О, Ким таа каави бендӓн. Бӓн диилим йакышыклы иилип чӧзмӓӓ Онун айак капларынын тасмаларыны.

⁸ Бӓн сизи суйлан ваатиз еттим, ама О сизи Айоз Духлан ваатиз едеӂек».

Иисус ваатиз олэр, шейтандан дененер

⁹ О вакыт Галилейадан, Назарет касабасындан, гелди Иисус, да Иоан ваатиз етти Ону Иордан дересиндӓ.

¹⁰ Су ичиндӓн чыкарак, О хемен гӧрдӱ, ниӂӓ гӧк ачылды, да Айоз Дух, бир гугуш гиби, Онун ӱстӱнӓ конду.

¹¹ Гӧклердӓн бир сес ишидилди: «Сӓнсин Беним севгили Оолум, Сендӓ Беним ислеелиим».

¹² Бундан сора Дух Иисусу чол ерӓ чабук гӧтӱрдӱ.

¹³ Чолда О кырк гӱн булунду, нередӓ шейтандан дененмиш олду. Ӂанаварлар арасында булунурду, да ангиллӓр Она измет едӓрдилӓр.

Иисусун илк ӱӱрениӂилери

¹⁴ Ачан Иоаны кападылар, Иисус гелди Галилейайа, насаат едерӓк Ии Хабери Аллахын Падишахлыы ичин.

¹⁵ Да дейӓрди: «Вакыт таманнанды, Аллахын Падишахлыы йаклашты. Гӱнахларыныздан Аллаха дӧнӱн хем Ии Хабери инанын».

¹⁶ Гечип Галилейа гӧлӱн бойундан, Иисус гӧрдӱ Симону хем Андрейи, онун кардашыны. Оннар су ичинӓ сӱзмелери атардылар, зерӓ балыкчыйдылар.

¹⁷ Иисус оннара деди: «Гелин Беним ардыма, сизи инсан тутан йапаӂам».

¹⁸ Оннар чабук сӱзмелерини брактылар да Онун ардына йолландылар.

¹⁹ Гидип бираз илери, Иисус гӧрдӱ Зеведейин оолуну, Иакову, хем кардашыны Иоаны, ангылары кайык ичиндӓ сӱзмелерини тертиплӓрдилӓр.

²⁰ Иисус хемен чаарды оннары. Оннар бобаларыны, Зеведейи, кайыкта ишчилӓрлӓн брактылар да кендилери Иисусун ардына гиттилӓр.

Синагогада фена духлу адам алыштырылэр

²¹ Капернаум касабасына гелдилӓр. Тездӓ, ӂумертеси гӱнӱ, Иисус синагога ичинӓ гирди, ӱӱретмӓӓ инсаны башлады.

²² Онун ӱӱретмесинӓ шашардылар, зерӓ ӱӱредӓрди оннары ниӂӓ бир адам, ангысында вар заабитлик, диил ниӂӓ билгичлӓр.

²³ Таман о вакыт оннарын синагогасынын ичиндӓ булунарды бир адам, ангысы фена духлан тутулмуш. О башлады баармаа:

²⁴ «Не истеерсин биздӓн, Назаретли Иисус? Гелдин бизи кайбетмӓӓ ми? Билерим, кимсин Сӓн, Сӓн Аллахын Айозуйсун!»

²⁵ Ама Иисус таказалады ону да деди: «Сус да чык бу адамдан!»

²⁶ Озаман фена дух адамы сарсалады да сора, бир кескин сеслӓн баарып, ондан чыкты.

²⁷ Хепси шаш калдылар да бири-биринӓ сорардылар: «Недир бу? Несой ени ӱӱретмӓктир бу? О артык фена духлара заабитликлӓн сымарлээр, да оннар Ону сеслеер!»

²⁸ Галилейанын бӱтӱн долайында Иисус ичин херери хабер чабук даалды.

Иисус Петринин кайнанасыны алыштырэр

²⁹ Иисус Иаковлан хем Иоаннан синагогадан чыкты, Симонун хем Андрейин евинӓ гитти.

³⁰ Симонун кайнанасы патта сытмадан хаста йатарды. Бунун ичин Иисуса чабук хабер верилди.

³¹ Иисус, йаклашып, тутту ону елиндӓн да йардым етти, калксын. Сытма ону бракты, да кары измет етмӓӓ оннара башлады.

³² Авшамнен, гӱн каушмасында, хепси хасталары хем фена духтан тутулмушлары Иисуса гетирӓрдилӓр.

³³ Капу ӧнӱндӓ инсан бӱтӱн касабадан топланды.

³⁴ Хертӱрлӱ хасталыклардан О чок инсан алыштырарды. Чыкарарды чок фена духлары да бракмарды сӧлесиннӓр, зерӓ оннар билирдилӓр, ани О Христос.

³⁵ Ертеси гӱнӱ чин-сабаалӓн Иисус калкты да, чыкып евдӓн, бир сапа ерӓ гитти, нередӓ дуа едӓрди.

³⁶ Симон хем ким онуннанды, гиттилӓр Иисусу аарамаа.

³⁷ Ачан булдулар, дедилӓр Она: «Хепси Сени аарээр».

³⁸ О ӂувап етти оннара: «Гиделим долай кӱӱлерӓ /хем касабалара/, ки орада да насаат едейим, зерӓ бунун ичин чыкып-гелдим».

³⁹ Гитти, насаат етсин бӱтӱн Галилейанын синагогаларында да фена духлары чыкарсын.

Лепралы хаста пакланэр

⁴⁰ Иисуса гелди бир лепралы адам, диз чӧктӱ Онун ӧнӱндӓ да йалварды: «Еер истӓрсейдин, вар насыл бени паклайасын».

⁴¹ Иисусун ӂаны аӂыды да, узадып елини, дииди она да деди: «Истеерим, паклан!»

⁴² Бирдӓн лепра ону бракты, да бу адам пакланды.

⁴³ Иисус тез йолландырды ону да сыкыдан сымарлады:

⁴⁴ «Бак, сӧлӓмейӓсин кимсейӓ, ама гит да гӧстерил попаза. Кенди пакланман ичин гетир не Моисей сыралады, ки шаатлык олсун инсана».

⁴⁵ Бу адам са, чыкып орадан, башлады сӧлемӓӓ хем хабер вермӓӓ бунун ичин херердӓ. Ӧлӓ, ани сора Иисус хич бир касабайа ачыкта гирӓмӓрди. О дышанда, сапа ерлердӓ дурарды, да инсан хер тарафтан Она гелӓрди.