Luka 7 - Ени Бааланты

Иисус алыштырэр ӱзбашынын изметкерини

¹ Битирдиктӓн сора насаат етмӓӓ инсана, ани сеслӓрди Ону, Иисус гирди Капернаум касабасына.

² Бир аскер ӱзбашы, кимин чыраа хастайды ӧлӱм дӧшеендӓ, ангысыны о пек беенӓрди,

³ ишитти Иисус ичин да йоллады Иисуса иудейлерин аксакалларыны, ки йалварсыннар, гелсин да алыштырсын онун чырааны.

⁴ Оннар гелдилӓр Иисуса да пек йалвардылар, дейип: «Дӱшер она йапасын бу иилии,

⁵ зерӓ о север бизим инсаны, бизим ичин бир синагога йапты».

⁶ Иисус гитти оннарлан, ама ачан йаклашты йакын онун евинӓ, аскер ӱзбашы йоллады достларыны, десиннӓр: «Сааби, койма зааметини, зерӓ бӓн етмеерим, ки Сӓн гирӓсин беним евимӓ.

⁷ Бӓн есапладым, ки бӓн дӓ етмеерим, ки гидейим кендим Сана. Саде де бир лаф, да беним изметкерим алышаӂэк.

⁸ Зерӓ бӓн дӓ заабитлик алтындайым, беним дӓ елим алтында вар аскерлӓр. Ачан бирисинӓ деерим: „Гит“, о гидер. Башкасына деерим: „Гел“, о гелер. Чыраама деерим: „Йап бу иши“, о йапэр».

⁹ Ачан Иисус ишитти бу лафлары, шашты, дӧндӱ инсана, ани гелӓрди Онун ардына, да деди: «Сӧлеерим сизӓ, ани артык Израил ичиндӓ булмадым бӧлӓ бир бӱӱк инан».

¹⁰ Ачан дӧндӱлӓр геери бу йолланмышлар, булдулар о хаста чыраа саа.

Наин касабасында ӧлӱ дирилер

¹¹ Ертеси гӱнӱ Иисус гидӓрди бир касабайа, ады Наин. Онуннан барабар гидӓрди Онун ӱӱрениӂилери хем чок инсан.

¹² Ачан Иисус йаклашты касабанын токатларына, мезара гӧтӱрӓрдилӓр бир ӧлӱ, бир дул ананын йалныз оолуну. Бу карыйлан гидӓрди чок инсан.

¹³ Ачан Сааби гӧрдӱ карыйы, ӂаны аӂыды она да деди: «Аалама!»

¹⁴ Сора йаклашты, дииди тезгерейӓ. Оннар, ким гӧтӱрӓрдилӓр, дурдулар. О деди: «Сана, деликанны, деерим: калк!»

¹⁵ Ӧлӱ отурду да башлады лафетмӓӓ. Иисус верди ону анасына.

¹⁶ Хепси корктулар да Аллахы метиннедилӓр, дейип: «Бӱӱк пророк калкты арамызда!» хем: «Аллах Кенди гелди Онун инсанына!»

¹⁷ Хабер Иисус ичин даалды бӱтӱн Иудейада хем долайда.

Иоан Ваатизедиӂинин йолланмышлары

¹⁸ Иоан Ваатизедиӂинин ӱӱрениӂилери хепсини буннары сӧледилӓр Иоана.

¹⁹ Иоан чаарды ӱӱрениӂилерин икисини да йоллады Иисуса, ки сорсуннар Она: «Сӓнсин ми О, Ким лӓӓзым гелсин, оса башкасыны мы беклейелим?»

²⁰ Ӱӱрениӂилӓр гелдилӓр Иисуса да дедилӓр: «Иоан Ваатизедиӂи йоллады бизи Сана соралым: „Сӓнсин ми О, Ким лӓӓзым гелсин, оса башкасыны мы беклейелим?“»

²¹ О вакыт Иисус алыштырарды чок хасталары тӱрлӱ дертлердӓн, хасталыклардан хем фена духлардан, чок кӧӧрларын ачарды гӧзлерини.

²² О ӂувап етти оннара, дейерӓк: «Гидин сӧлейин Иоана, не гӧрерсиниз хем не ишидерсиниз: кӧӧрлар гӧрер, топаллар гезер, лепралылар пакланэр, саарлар ишидер, ӧлӱлӓр дирилер, фукааралара ии хабер насаат олэр.

²³ Мутлу о, кимин ичин Бӓн кӧстек олмайаӂам».

Иисус шаатлык едер Иоан ичин

²⁴ Ачан гиттилӓр Иоанын йолланмышлары, Иисус башлады сӧлемӓӓ инсана Иоан ичин: «Не чыктыныз гӧрмӓӓ чолда? Бир сааз мы, ани лӱзгердӓн салланэр?

²⁵ Не чыктыныз гӧрмӓӓ? Бир адамы мы, йымышак рубайлан гиийимни? Ким гиийимни донак рубайлан хем сефалыкта йашээр, оннар падишах биналарында.

²⁶ Е не чыктыныз гӧрмӓӓ? Бир пророк му? Аслы, хем деерим сизӓ, ани о таа бӱӱк, некадар бир пророк.

²⁷ Одур, кимин ичин йазылы: „Тӓ, Бӓн йоллээрым хаберӂими Сенин ӧнӱн сора, ангысы хазырлайаӂэк йол Сана“.

²⁸ Сӧлеерим сизӓ, ани оннардан, ким карыдан дууду, йок башка биркимсей таа бӱӱк Иоан Ваатизедиӂидӓн. Хеп окадар ен кӱчӱӱ Гӧк Падишахлыында таа бӱӱк ондан».

²⁹ Хепси инсан, ким ишитти, артык харччылар да, аннадылар Аллахын доорулууну, чӱнкӱ каблеттийдилӓр Иоанын ваатизлиини.

³⁰ Ама фарисейлӓр хем закон ӱӱредиӂилери бастылар Аллахын истедиини оннар ичин, зерӓ ваатиз олмадылар ондан.

³¹ Иисус деди: «Кимӓ бензедейим бу бой инсаны, кимӓ бензеер оннар?

³² Оннар бензеерлӓр ушаклара, ангылары отурэрлар мейданда да баарэрлар бири-биринӓ: „Чалдык сизӓ каваллан, ойнамадыныз; чалдык сизӓ гамны тӱркӱ, ааламадыныз“.

³³ Гелди Иоан Ваатизедиӂи, не екмек ийӓрди, не шарап ичӓрди, деерсиниз: „Онда вар фена дух“.

³⁴ Гелди Адам Оолу, ийер хем ичер, деерсиниз: „Хобур хем ичкиӂи, харччыларын хем гӱнахкерлерин досту!“

³⁵ Ама ким аарифлиин ушаа, о буну доорудур».

Бир кары йаалээр Иисусу

³⁶ Бир фарисей теклиф етти Иисусу, софрайа гелсин онун евинӓ. Иисус гирди фарисейин евинӓ да отурду софрайа.

³⁷ Бир гӱнахкер кары касабадан аннады, ани О конакланэр фарисейин евиндӓ, да гетирди бир ак мермер кап ичиндӓ паалы кокулуу.

³⁸ О дурарды Иисусун ардында, айакларында, да ааларды, йыслайып Иисусун айакларыны кенди йашларыннан хем силип сачларыннан, ӧпӓрди хем кокуларды.

³⁹ Ачан буну гӧрдӱ фарисей, ангысы буйур еттийди Иисусу, деди кенди-кендинӓ: «Еер бу Адам пророк олайды, озаман билеӂейди, нетӱрлӱ кары бу, ким шинди Она диийер, зерӓ о – бир гӱнахкер».

⁴⁰ Иисус, лафы алып, деди: «Симон, сӧлейеӂӓм сана бишей». «Сӧлӓ, Ӱӱредиӂи», – деди фарисей.

⁴¹ Иисус деди: «Бир зенгин адама борчлуйду ики киши, бириси бешӱз динар, ӧбӱрӱ дӓ елли.

⁴² Чӱнкӱ йокту нейлӓн ӧдесиннӓр, зенгин олан афетти икисини дӓ. Шинди сӧлӓ, ангысы ону таа чок севеӂек?»

⁴³ Симон ӂувап етти: «Санэрым о, кимӓ таа чок афетти». «Доору ӂувап еттин», – деди Иисус.

⁴⁴ Сора дӧндӱ бу карыйа да деди Симона: «Гӧрерсин ми бу карыйы? Гелдим сенин евинӓ, да сӓн дӧкмедин бана су, айакларымы йыкамаа, ама о йыслады айакларымы йашларыннан хем силди башындан сачларыннан.

⁴⁵ Сӓн ӧпӱш вермедин Бана, ама о, незамандан гирдим, дургунмээр ӧпмӓӓ айакларымы.

⁴⁶ Башымы йааламадын зейтин йаайыннан, ама о йаалады айакларымы кокулу йаалан.

⁴⁷ Онун ичин сӧлеерим сана: чӱнкӱ онун чок гӱнахлары афедилди, онуштан чок севди. Зерӓ кимӓ аз афедилер, о аз да север».

⁴⁸ Сора деди бу карыйа: «Афедилди сенин гӱнахларын!»

⁴⁹ Оннар, ким отурдулар Онуннан софрада, башладылар лафетмӓӓ бири-бириннӓн: «Кимдир Бу, Ангысы афедер гӱнахлары?»

⁵⁰ Иисус деди карыйа: «Сенин инанын сени куртарды, гит услулуклан евӓ».