Luka 5 - Ени Бааланты

Шашмаклы балыкчылык

¹ Бир сыра, ачан Иисус булунарды Геннисарет гӧлӱнӱн бойунда, инсан сыкышып сокуларды Она, ишитсин Аллахын сӧзӱнӱ дейни.

² Иисус гӧрдӱ ики кайык су ӱстӱндӓ. Балыкчылар чыкмыштылар кенара да йыкардылар сӱзмелерини.

³ Иисус пинди бу кайыклардан бирисинӓ, ани Симонунду, йалварды, бираз итирсиннӓр кайыы кенардан су ичинӓ, сора отурду да орадан ӱӱредӓрди инсаны.

⁴ Ачан битирди ӱӱретмӓӓ инсаны, деди Симона: «Ӱз таа деринӓ да атын сӱзмелери балык тутмаа».

⁵ Симон ӂувап етти Она: «Ӱӱредиӂи! Биз саваштык бӱтӱн геӂӓ да бишей тутамадык, ама Сенин лафына гӧрӓ атэрым сӱзмелери су ичинӓ».

⁶ Ачан аттылар сӱзмелери, оннар туттулар ӧлӓ чок балык, ани сӱзмелӓр башладыйдылар копмаа.

⁷ Йаптылар нышан кафадарларына, ангылары ӧбӱр кайыктайдылар, гелсиннӓр йардыма. Оннар гелдилӓр, долдурдулар икисини дӓ кайыклары ӧлӓ чок балыклан, ани кайыклар батмаа башладыйдылар.

⁸ Ачан гӧрдӱ буннары Симон Петри, дӱштӱ Иисусун айакларына да деди: «Сааби, гит бендӓн, зерӓ бӓн гӱнахкерим!»

⁹ О хем хепси, ким онуннан барабарды, шаштылар бу балык тутмасына.

¹⁰ Хеп бутӱрлӱ олду Иаковлан хем Иоаннан, Зеведейин оолларыннан, ани Симонун кафадарларыйдылар. Озаман Иисус деди Симона: «Коркма, бӱӱндӓн сора адам тутан олаӂан».

¹¹ Чыкардылар ики кайыы кенара, брактылар хепсини да гиттилӓр Иисусун ардына.

Лепралы хаста пакланэр

¹² Иисус булунарды касабаларын бирисиндӓ, да бир лепралы адам, гӧрӱп Иисусу, дӱштӱ ӱзӱкойну ерӓ да йалварды: «Сааби, еер истӓрсейдин, вар насыл бени паклайасын».

¹³ Иисус узатты елини, дииди она да деди: «Истеерим, паклан!» Хемен лепра ону бракты.

¹⁴ Иисус сымарлады она, сӧлӓмесин кимсейӓ. Иисус деди: «Гит да гӧстерил попаза. Кенди пакланман ичин гетир курбан, ниӂӓ Моисей сыралады, ки шаатлык олсун инсана».

¹⁵ Иисус ичин хабер гиттикчӓ таа чок дааларды. Инсаннар сӱрӱ-сӱрӱ гелӓрдилӓр Она, сеслесиннӓр хем хасталыкларындан алыштырылсыннар дейни.

¹⁶ Ама Иисус гидӓрди сапа ерлерӓ да орада дуа едӓрди.

Иисус алыштырэр кӧтӱрӱм адамы

¹⁷ Бир гӱнӱ, ачан Иисус ӱӱредӓрди инсаны, фарисейлӓр хем закон ӱӱредиӂилери, ани гелдийдилӓр Галилейанын хем Иудейанын хепси долай кӱӱлериндӓн хем Иерусалимдӓн, дурардылар орада. Саабинин куведи Онуннанды, инсаны алыштырмаа дейни.

¹⁸ Биркач адам гетирдилӓр пат ӱстӱндӓ бир кӧтӱрӱм хастайы да саваштылар ону сокмаа ичйанына, Иисусун ӧнӱнӓ койсуннар дейни.

¹⁹ Чӱнкӱ буламадылар, насыл соксуннар ону ев ичинӓ калабалык бетеринӓ, пиндилӓр евин ӧртӱсӱнӓ да кереметлӓр арасындан салвердилӓр хастайы дӧшек ӱстӱндӓ орта ерӓ, Иисусун ӧнӱнӓ.

²⁰ Иисус, гӧрӱп оннарын инаныны, деди кӧтӱрӱм адама: «Гӱнахларын баашланды».

²¹ Билгичлӓр хем фарисейлӓр башладылар дӱшӱнмӓӓ кенди-кендилеринӓ: «Кимдир Бу, ани Аллахы кӧтӱлеер? Ким, Аллахтан каарӓ, вар насыл гӱнахлары баашласын?»

²² Иисус, Ангысы билӓрди оннарын неетлерини, ӂувап етти оннара: «Не дӱшӱнерсиниз ӱреклериниздӓ?

²³ Не таа колай: демӓӓ „Гӱнахларын баашланды“ мы оса демӓӓ „Калк да гез“ ми?

²⁴ Ама ки билӓсиниз, ани Адам Оолунун вар куведи ер ӱстӱндӓ гӱнахлары баашласын…», дӧнӱп кӧтӱрӱм хастайа деди: «Сана сымарлээрым: калк, ал дӧшеени да гит евӓ!»

²⁵ Чабук бу хаста оннарын ӧнӱндӓ калкты, алды дӧшеени да евӓ гитти, Аллахы метиннейерӓк.

²⁶ Хепси шаштылар, метиннедилӓр Аллахы бӱӱк коркуйлан да дейӓрдилӓр: «Бӱӱн гӧрдӱк шашылаӂак ишлӓр».

Иисус чаарэр Левийи

²⁷ Ондан сора Иисус, чыкып дышары, гӧрдӱ бир харччы, ады Левий, ангысы отурарды ердӓ, нередӓ харч топланарды, да деди она: «Гел Беним ардыма!»

²⁸ Левий бракты хепсини да гитти Онун ардына.

²⁹ Сора йапты Она бир бӱӱк конуш кенди евиндӓ. Бир сӱрӱ харччы хем башка конакчылар отурдулар оннарлан софрайа.

³⁰ Фарисейлӓр хем билгичлӓр, маана булуп, дейӓрдилӓр Онун ӱӱрениӂилеринӓ: «Нечин ийерсиниз хем ичерсиниз харччыларлан хем гӱнахкерлӓрлӓн барабар?»

³¹ Иисус деди оннара: «Дофтор лӓӓзым диил саа оланнара, ама хасталара.

³² Бӓн гелмедим чаарайым доорулары, ама гӱнахкерлери, Аллаха дӧнсӱннӓр».

Оруч ичин соруш

³³ Оннар дедилӓр: «Иоанын хем дӓ фарисейлерин ӱӱрениӂилери сык оруч тутэрлар хем дуа едерлӓр, ама Сенин ӱӱрениӂилерин саде ийерлӓр хем ичерлӓр».

³⁴ Иисус ӂувап етти: «Вар мы насыл дӱӱнӂӱлӓр оруч тутсуннар, ачан гӱвӓӓ йаннарында?

³⁵ Гелеӂек вакыт, ачан гӱвӓӓ алынаӂэк оннардан, озаман, о гӱннердӓ оннар оруч тутаӂэк».

³⁶ Хем дӓ сӧледи оннара бир ӧрнек: «Кимсей йыртмээр ени рубадан йама, ески рубайа диксин дейни, зерӓ ени руба йыртылэр хем йама ески рубайа уймээр.

³⁷ Кимсей коймээр ески тулумнар ичинӓ ени шарабы, зерӓ ени шарап патладэр ески тулумнары, да шарап дӧкӱлер, тулумнар да зӓн олэрлар.

³⁸ Ама ени шарабы лӓӓзым дӧкмӓӓ ени тулумнар ичинӓ. /Озаман корунэр икиси дӓ./

³⁹ Кимсей ески шарабы ичтиктӓн сора истӓмеер ичмӓӓ ени шараптан, зерӓ деер: „Ески шарап таа ии“».