Luka 20 - Ени Бааланты

Иисусун заабитлии

¹ Бир гӱнӱ, незаман Иисус инсаны Айоз бина аулунда ӱӱредӓрди хем насаат едӓрди Ии Хабери, Она гелдилӓр бӱӱк попазлар, билгичлӓр хем аксакаллар.

² Да дедилӓр: «Сӧлӓ, не заабитликлӓн йапэрсын буннары, хем ким верди Сана заабитлии?»

³ Иисус ӂувап етти оннара: «Койаӂам Бӓн дӓ сизӓ бир соруш, ӂувап единиз Бана.

⁴ Иоанын ваатизлии гӧктӓн ми, оса инсандан мы?»

⁵ Оннар бири-бириннӓн лафедӓрди: «Еер дейӓрсейдик: „Гӧктӓн“, О дейеӂек: „Ӧлейсӓ, нечин ону инанмадыныз?“

⁶ Ама дейӓрсейдик: „Инсандан“, озаман инсан бизи ӧлдӱреӂек ташлан, зерӓ хепси инанэр, ани Иоан бир пророк».

⁷ Онуштан ӂувап еттилӓр: «Билмеериз, нередӓн гелер Иоанын ваатизлии».

⁸ Озаман Иисус ӂувап етти: «Бӓн дӓ сӧлӓмейеӂӓм сизӓ, не заабитликлӓн йапэрым буннары».

Фена бааӂылар

⁹ Сора сӧледи инсана бу ӧрнӓӓ: «Бир адам койду бир баа, верди ону бааӂылара, сора узун бир вакыда гитти башка мемлекетӓ.

¹⁰ Ӱзӱм вакыдында йоллады бир чырак бааӂылара, алсын пайыны баа берекединдӓн, ама бааӂылар дӱӱдӱлӓр ону да бош еллӓн геери йолладылар.

¹¹ Сора йоллады башка бир чырааны. Оннар ону да дӱӱдӱлӓр, гӱлмӓӓ алдылар да бош еллӓн геери йолладылар.

¹² Йоллады ӱчӱнӂӱ чырааны. Оннар ону да йараладылар хем баадан дышары уураттылар.

¹³ Баайын чорбаӂысы дӱшӱндӱ: „Не йапайым? Йоллайаӂам беним севгили оолуму. Беки ону икрамнан кабледирлӓр!“

¹⁴ Ама бааӂылар, гӧрӱп ону, аннаштылар бири-бириннӓн, дейип: „Тӓ чорбаӂынын оолу, ӧлдӱрелим ону, да баа бизӓ калаӂэк“.

¹⁵ Чыкарып ону баадан бир тарафа, ӧлдӱрдӱлӓр. Шинди не йапаӂэк баа чорбаӂысы бу бааӂыларлан?

¹⁶ Гелип, телеф едеӂек оннары, ама баайы башка адамнара вереӂек». Бу лафлары ишидип, инсан деди: «Олмаз бу олсун!»

¹⁷ Иисус, бакып уз оннарын гӧзлеринӓ, деди: «Озаман насыл аннамаа бу сӧзлери, ани йазылы: „Таш, ани усталар сыбытты, сонда етишти кӧшӓ ташы олсун“?

¹⁸ Ким дӱшеӂек бу таш ӱстӱнӓ, езилеӂек. Ама кимин ӱстӱнӓ таш дӱшеӂек, ону туз-буз йапаӂэк».

¹⁹ Бӱӱк попазлар хем билгичлӓр бактылар хемен Ону тутсуннар, ама инсандан коркардылар. Зерӓ аннадылар, ани оннар ичин Иисус бу ӧрнӓӓ сӧледи.

Хак Кесара хем Аллаха

²⁰ Онуштан башладылар Иисусу колламаа. Йолладылар ардына гӧзчӱлери, ангылары йапындылар кабаатсыз, бакарак тутсуннар Ону бир лафлан, ки кулланыӂынын даавасына хем заабитлиинӓ версиннӓр.

²¹ Она сордулар: «Ӱӱредиӂи, билериз, ани доору лафедерсин хем ӱӱредерсин, адамын ӱзӱнӓ бакмайарак, хакына Аллахын йолуну ӱӱредерсин.

²² Дӱшер ми, ӧдейелим харч Кесара оса дӱшмеер ми?»

²³ Иисус аннады оннарын шалвирликлерини, да деди: «/Нечин Бени денеерсиниз?/

²⁴ Гӧстерин Бана бир динар. Кимин ресими хем ады йазылы бурада?» «Кесарын», – ӂувап еттилӓр оннар.

²⁵ Озаман Иисус деди: «Верин Кесара, не Кесарын, ама Аллаха, не Аллахын».

²⁶ Тутамадылар Ону лафлан инсанын ӧнӱндӓ да, шашып Онун ӂувабына, сустулар.

Дирилмӓк ичин соруш

²⁷ Кимиси садукейлердӓн, ким деер, ани йок дирилмӓк, йаклашып Иисуса, сордулар:

²⁸ «Ӱӱредиӂи, Моисей йазыларында деди бизӓ: „Еер биркимсей ӧлӓрсейди ушаксыз, да карысы саа каларсайды, онун кардашы евленсин бу карыйа да калдырсын ушак ӧлмӱш кардашына тамызлык ичин“.

²⁹ Варды еди кардаш. Илкинкиси евленди да ушаксыз ӧлдӱ.

³⁰ Онун карысына евленди икинӂи кардашы, /о да ӧлдӱ таа олмадыйнан ушаа/.

³¹ Сора бу карыйы алды ӱчӱнӂӱ кардашы. Ӧлӓ йапты еди кардаш да ушаксыз ӧлдӱлӓр.

³² Хепсиндӓн сора ӧлдӱ кары да.

³³ Дирилмектӓ ангысынын карысы олаӂэк бу кары? Зерӓ хепси еди кардаш она евлийди».

³⁴ Иисус ӂувап етти: «Бу йашаманын ооллары хем кызлары евленерлӓр.

³⁵ Ама ким етишеӂек, пай алсын гелӓр ӧмӱрдӓн хем ӧлӱлерин дирилмесиндӓн, евленмейеӂек.

³⁶ Артык йок насыл ӧлсӱннӓр, чӱнкӱ ангиллерӓ бензеерлӓр. Оннар Аллахын ооллары, зерӓ ӧлӱмдӓн дирилеӂеклӓр.

³⁷ Ама, ани ӧлӱлӓр дирилеӂек, буну гӧстерди кенди Моисей орада, нередӓ лаф гидер йанар гӱмӓ ичин. Орада Сааби ичин деер: „Авраамын Аллахы, Исаакын Аллахы хем Иаковун Аллахы“.

³⁸ Аллах – ӧлӱлерин Аллахы диил, ама дирилерин, зерӓ Аллаха хепси инсан диридир».

³⁹ Билгичлердӓн кимиси ӂувап етти: «Ии сӧледин, Ӱӱредиӂи!»

⁴⁰ Бундан сора кимсей кыйышамарды сорсун Она бир дӓ лаф.

Христос – кимин оолу?

⁴¹ Иисус сорду оннара: «Нечин деерлӓр, ани Христос – Давидин Оолу?

⁴² Кенди Давид Псалма кийадында деер: „Сааби деди беним Чорбаӂыма: Отур саа тарафымда,

⁴³ Бӓн койунӂа Сенин душманнарыны айакларын алтына“.

⁴⁴ Давид адлээр Ону „Чорбаӂы“, озаман насыл О олабилир Давидин оолу?»

⁴⁵ Хепси ишиттилӓр, ниӂӓ Иисус ӱӱрениӂилеринӓ деди:

⁴⁶ «Корунун билгичлердӓн, ангылар северлӓр гезмӓӓ узун рубайлан хем беенерлӓр инсан селӓмнесин оннары мейданнарда. Северлӓр отурмаа илк скемнелерӓ синагогаларда хем ӧндеки ерлерӓ конак софраларында.

⁴⁷ Оннар кемирерлӓр дулларын евлерини, ама гӧстермӓк ичин узун дуалар йапэрлар. Оннарын ӂезасы чок аар олаӂэк».