Luka 19 - Ени Бааланты

Закей

¹ Иисус гирди Иерихон касабасына да гечӓрди касаба ичиндӓн.

² Бир зенгин адам, ады Закей, харччыларын заабиди,

³ истӓрди гӧрсӱн Иисусу, ама инсан бетеринӓ гӧрӓмӓрди, зерӓ кенди алчак бойлуйду.

⁴ Онуштан качты илери, пинди бир йабан инӂир ааӂына, Иисусу гӧрсӱн, чӱнкӱ Иисус лӓӓзымды гечсин бу йолдан.

⁵ Ачан Иисус етишти бурайы, бакты йукары, гӧрдӱ ону да деди: «Закей, хызлы ин ерӓ, бӱӱн лӓӓзым калайым сенин евиндӓ».

⁶ Закей хызлы инди ерӓ да Иисусу севинмӓклӓн каблетти.

⁷ Гӧрӱп буну, хепси мырылданмаа башладылар да дейӓрдилӓр: «Гирди конаклансын бир гӱнахкер адамын евиндӓ!»

⁸ Ама Закей, калкып, Саабийӓ деди: «Сааби, беним варлыымын йарысыны веририм фукааралара. Еер биркимсейи алдаттысайдым, она чевиреӂӓм геери дӧрт катына».

⁹ Иисус деди: «Бӱӱн бу евӓ гелди куртулмак, зерӓ бу адам да Авраамын оолудур.

¹⁰ Адам Оолу гелди аарасын хем куртарсын кайып оланнары».

Он алтын ичин ӧрнек

¹¹ Ачан Иисус сӧлӓрди бу лафлары, Иерусалимӓ йакынды. Чӱнкӱ чойу санардылар, ани тездӓ орада курулаӂэк Аллахын Падишахлыы,

¹² О сӧледи: «Бир адам ӱӱсек бойдан йолланды бир узак мемлекетӓ, ки алсын елӓ падишахлыы да сора дӧнсӱн геери.

¹³ Чаарды он чырааны, верди оннара он гӱмӱш да деди: „Бӓн геери дӧнӱнӂӓ, койун оннары алыш-веришӓ“.

¹⁴ Ама ватандашлары ондан азетмӓрдилӓр, йолладылар хаберӂилери ардына, сӧлесиннӓр: „Биз истӓмеериз, сӓн падишахлык едӓсин бизим ӱстӱмӱзӓ“.

¹⁵ Ачан бу адам алды падишахлыы елӓ, дӧндӱ геери да чаарды чыракларыны, кимӓ вердийди алтыннары, ки гӧрсӱн, не казандылар алыш-веришликтӓн.

¹⁶ Илкинкиси гелди да деди: „Чорбаӂы, сенин гӱмӱшӱннӓн казандым таа он гӱмӱш“.

¹⁷ Озаман чорбаӂы ӂувап етти: „Хелал, сӓн ии чыраксын, олдун инанч адам кӱчӱк ишлердӓ, онуштан койэрым сени кулланыӂы он касабанын ӱстӱнӓ“.

¹⁸ Гелди икинӂиси да деди: „Чорбаӂы, сенин гӱмӱшӱннӓн казандым таа беш гӱмӱш“.

¹⁹ Чорбаӂы ӂувап етти: „Сӓн беш касабада кулланыӂы олаӂан“.

²⁰ Гелди ӱчӱнӂӱсӱ, дейип: „Чорбаӂы, тӓ гетирдим сенин гӱмӱшӱнӱ. Корудум ону сарылы бир пешкир ичиндӓ,

²¹ зерӓ корктум сендӓн. Сӓн бир кескин адамсын, алэрсын орадан, нерейи коймадын, хем бичерсин, нередӓ екмедин“.

²² Озаман чорбаӂы деди: „Йарамаз чырак! Даава кесеӂӓм сана сенин кенди лафларына гӧрӓ. Билӓрдин, ани бӓн кескин бир адамым, алэрым орадан, нерейи коймадым, хем бичерим, нередӓ екмедим.

²³ Нечин озаман коймадын парамы алыш-веришлӓӓ, ки беним дӧнмемдӓ кабледейим геери казанчлан?“

²⁴ Сора дӧндӱ орада дураннара да деди: „Алын гӱмӱшӱ ондан да верин она, кимдӓ вар он гӱмӱш“.

²⁵ „Чорбаӂы, – ӂувап етти оннар, – онда шинди вар он гӱмӱш!“

²⁶ Чорбаӂы деди: „Сизӓ сӧлеерим, кимдӓ вар, она таа верилеӂек, кимдӓ йок, ондан алынаӂэк, нейи дӓ вар.

²⁷ Ама беним душманнарымы, ким истӓмеди падишахлык едейим оннарын ӱстӱнӓ, гетирин бурайы да ӧлдӱрӱн беним ӧнӱмдӓ!“»

Иисус гирер Иерусалимӓ

²⁸ Буну сӧледиктӓн сора, Иисус йолланды Иерусалимӓ доору гитмӓӓ.

²⁹ Йаклашты Виффагийа хем Вифанийа кӱӱлеринӓ, ани Зейтин байырынын йанында, йоллады ики ӱӱрениӂисини

³⁰ да деди оннара: «Гидин ӧндеки кӱӱйӓ. Гирӓркӓн орайы, булаӂэныз баалы бир ешек кодуу, ангысына таа кимсей атлы пинмеди. Чӧзӱн ону да гетирин Бана.

³¹ Еер биркимсей сорарса: „Нечин чӧзерсиниз?“, ӂувап един: „О лӓӓзым Саабийӓ“».

³² Йолланмышлар гиттилӓр, хепсини ӧлӓ булдулар, ниӂӓ сӧледийди.

³³ Ачан чӧзӓрдилӓр ешӓӓн кодууну, чорбаӂылар сорду: «Нечин чӧзерсиниз кодуу?»

³⁴ Оннар ӂувап еттилӓр: «О лӓӓзым Саабийӓ».

³⁵ Ӱӱрениӂилӓр гетирдилӓр кодуу Иисуса, сора дӧшедилӓр рубаларыны кодуун ӱстӱнӓ да Иисусу атлы пиндирдилӓр.

³⁶ Иисус атлы гидӓркӓн, инсан дӧшӓрди йол ӱстӱнӓ Онун ӧнӱндӓ кенди рубаларыны.

³⁷ Ачан йаклашты Иерусалимӓ, йылмаланаркан Зейтин байырындан, хепси ӱӱрениӂилӓр севинмектӓн бир бӱӱк сеслӓн башладылар метиннемӓӓ Аллахы хепси кудретли ишлӓр ичин, не гӧрдӱлӓр:

³⁸ «Иисӧзленмиш олсун Саабинин адына гелӓн Падишах! Услулук гӧклердӓ хем метинник ӱӱсек ерлердӓ!»

³⁹ Фарисейлердӓн кимиси, ким инсан арасындайды, Иисуса дедилӓр: «Ӱӱредиӂи, сустур ӱӱрениӂилерини!»

⁴⁰ О ӂувап етти оннара: «Сӧлеерим сизӓ: еер оннар сусарсайдылар, ташлар баараӂэклар».

Иисус аалээр Иерусалим ичин

⁴¹ Иисус, йаклашып касабайа, бакты она да башлады ааламаа онун ичин.

⁴² О деди: «Еер сӓн баарлем бӱӱн билейдин, насыл еденӓбилирсин услулук! Ама бу саклы сендӓн.

⁴³ Гелеӂек вакытлар, незаман душман дуварларда топрак йываӂэк, долайлайаӂэк хем сыкыштыраӂэк сени хер тарафтан.

⁴⁴ Йапаӂэк ерлӓн бир сени хем йок едеӂек сенин ушакларыны сендӓ. Бракмайаӂэк сендӓ бир дӓ таш ӱстӱндӓ таш, зерӓ танымадын вакыды, незаман Аллах гелди сени куртарсын».

Иисус паклээр Айоз бинайы

⁴⁵ Сора Иисус гирди Айоз бинанын аулу ичинӓ да башлады кооламаа дышары хепсини, ким алыш-вериш йапарды.

⁴⁶ О деди оннара: «Йазылы: „Беним евим дуа еви олаӂэк“, ама сиз чевирдиниз ону хайдут ининӓ».

⁴⁷ Иисус хер гӱн ӱӱредӓрди инсаны Айоз бина ичиндӓ. Бӱӱк попазлар, билгичлӓр хем халкын аксакаллары Ону ӧлдӱрмӓӓ бакардылар.

⁴⁸ Ама йапамардылар бишей, зерӓ инсан хавезлӓн Иисусун лафыны сеслӓрди.