Luka 18 - Ени Бааланты

Дул кары хем инансыз дааваӂы

¹ Иисус сӧледи ӱӱрениӂилеринӓ бир ӧрнек, ки гӧстерсин, ани лӓӓзым херзаман дуа етмӓӓ да хич бракылмамаа:

² «Бир касабада варды бир дааваӂы, ангысы Аллахтан коркмарды, инсандан да утанмарды.

³ О касабада варды бир дул кары, ангысы сык гелӓрди она да йалварарды: „Йап доорулук бана беним каршы дуранымнан“.

⁴ О узун вакыт истӓмеди доорулук йапмаа, ама сонда кенди-кендинӓ деди: „Аллахтан коркмээрым, инсандан утанмээрым.

⁵ Ама, чӱнкӱ бу дул кары бени раада бракмээр, она доорулук йапаӂам, ки, дайма гелип, кафамы дӱӱмесин“».

⁶ Сора Сааби екледи: «Ишидерсиниз ми, не деер диил доору дааваӂы?

⁷ Аӂаба Аллах йапмайаӂэк мы доорулук сечилмишлеринӓ, ким Она йалварэр геӂӓ-гӱндӱз? Чок му оннары бекледеӂек?

⁸ Сӧлеерим сизӓ, тездӓ йапаӂэк доорулук оннара. Ама Адам Оолу гелмесиндӓ, ердӓ инан булаӂэк мы?»

Харччы хем фарисей

⁹ Сӧледи таа бир ӧрнек оннара, ким кендинӓ умутланэр хем кендини доору сайэр, да башкасыны ашааландырэр.

¹⁰ «Ики киши гиттилӓр Айоз бинайа дуа етмӓӓ: бириси фарисей, ӧбӱрӱ харччы.

¹¹ Фарисей айакча дурарды да бӧлӓ дуа едӓрди кенди-кендинӓ: „Аллахым, шӱкӱр едерим сана, ани диилим калан инсан гиби: хырсыз, келепирӂи, ороспу, еки ниӂӓ бу харччы.

¹² Бӓн ики сыра хафтада оруч тутэрым, верерим онунӂу пайыны бӱтӱн гелиримдӓн“.

¹³ Ама харччы дурарды узакта, кыйышмарды баарлем гӧзлерини гӧкӓ калдырсын. О дӱӱйӓрди гӱӱсӱнӓ да дейӓрди: „Аӂы Бени, гӱнахкери, Аллахым!“

¹⁴ Доору сӧлеерим сизӓ, бу харччы Аллахын гӧзӱндӓ таа доору гитти евӓ, некадар фарисей. Зерӓ ким кендини ӱӱсеклендирер, о ашааландырылаӂэк, ким кендини ашааландырэр, о ӱӱсеклендирилеӂек».

Иисус иисӧзлеер ушаклары

¹⁵ Гетирӓрдилӓр Иисуса ушаклары, ки диисин оннара, ама ӱӱрениӂилӓр, гӧрӱп буну, азарлардылар оннары.

¹⁶ Иисус чаарды ушаклары Кендинӓ да деди: «Бракын ушаклары гелсиннӓр Бана да дургутмайын оннары, зерӓ Аллахын Падишахлыы оннарын гибилери ичин.

¹⁷ Доору сӧлеерим сизӓ: ким каблетмейеӂек Аллахын Падишахлыыны бир ушак гиби, о орайы хич гирмейеӂек».

Зенгинник хем дивеч йашамак

¹⁸ Бир ӧндерӂи сорду Иисуса: «Ии Ӱӱредиӂи, не лӓӓзым йапайым, ки дивеч йашамак еденейим?»

¹⁹ «Нечин деерсин Бана ии? Кимсей диил ии йалныз Аллахтан каарӓ, – ӂувап етти Иисус. –

²⁰ Билерсин ми сымарламаклары? Ороспулук йапмайасын, ӧлдӱрмейӓсин, чалмайасын, йаланӂы шаат олмайасын, бобаны хем ананы икрамнайасын».

²¹ «Хепси буннары таманнадым таа генчлиимдӓн», – ӂувап етти бу адам.

²² Иисус, ишидип бу лафлары, деди: «Сана салт бир иш етишмеер: сат варлыыны, пайет фукааралара, да олаӂэк хазнан гӧктӓ. Сора гел да излӓ Бени».

²³ О, ишидип бу лафлары, пек гӱӂенди, зерӓ бӱӱк варлыы варды.

²⁴ Иисус, гӧрӱп, ани пек гӱӂенди, деди: «Не зор гирсин Аллахын Падишахлыына зенгин оланнар!

²⁵ Таа илин бир девӓ ииненин кулаандан гечсин, некадар бир зенгин адам Аллахын Падишахлыына гирсин».

²⁶ Оннар, ангылары сеслӓрдилӓр, дедилӓр: «Ким аӂаба куртулабилир?»

²⁷ Иисус ӂувап етти: «Не инсана олмаз, Аллаха олур».

²⁸ Озаман Петри деди: «Бак, биз брактык хепсини да гелдик Сенин ардына».

²⁹ Иисус она деди: «Доорусуну сӧлеерим сизӓ, хепси, ким бракты евини, карысыны, кардашларыны, анасыны, бобасыны еки ушакларыны Аллахын Падишахлыы ичин,

³⁰ кабледеӂек чок таа зеедӓ бу ӧмӱрдӓ хем гелӓр ӧмӱрдӓ дивеч йашамак».

Иисус ӱчӱнӂӱ сыра хаберлеер ӧлӱмӱнӱ хем дирилмесини

³¹ Иисус, алып бир тарафа оники ӱӱрениӂисини, деди оннара: «Тӓ, биз гидериз Иерусалимӓ. Хепси, не йазылы пророклардан Адам Оолу ичин, таманнанаӂэк.

³² Зерӓ Адам Оолу верилеӂек йабанӂыларын еллеринӓ. Ону гӱлмӓӓ алаӂэклар, сӱӱйеӂеклӓр хем тӱкӱреӂеклӓр ӱзӱнӓ.

³³ Ону камчыйлан дӱӱйеӂеклӓр да ӧлдӱреӂеклӓр, ама О ӱчӱнӂӱ гӱнӱ дирилеӂек».

³⁴ Оннар аннамадылар бишей бу лафлардан, зерӓ бу лафлар оннар ичин капалыйды. Оннар аннайамадылар, не О сӧледи.

Бир кӧӧр Иерихон касабасында

³⁵ Ачан йаклашарды Иисус Иерихон касабасына, бир кӧӧр отурарды йол бойунда, диленерӓк.

³⁶ Ишидип, ани йолдан инсан гечер, сорду: «Не олэр?»

³⁷ Она сӧледилӓр: «Назаретли Иисус гечер».

³⁸ Озаман о баарды: «Иисус, Давидин Оолу, аӂы бени!»

³⁹ Оннар, ким гидӓрди ӧндӓ, азарлардылар ону, суссун, ама о таа пек баарарды: «Давидин Оолу, аӂы бени!»

⁴⁰ Иисус дургунду, сымарлады гетирсиннӓр кӧӧр адамы. Ачан о йаклашты, Иисус сорду:

⁴¹ «Не истеерсин сана йапайым?» О ӂувап етти: «Сааби! Гӧрмӓк еденейим».

⁴² Иисус деди: «Гӧр, сенин инанын сени куртарды».

⁴³ Кӧӧр адам чабук гӧрмӓӓ башлады да гитти Иисусун ардына, Аллахы метедерӓк. Хепси инсан, гӧрерӓк, не олду, метиннедилӓр Аллахы.