Luka 15 - Ени Бааланты

Кайып койун

¹ Хепси харччылар хем гӱнахкерлӓр йаклашардылар Иисусу сеслемӓӓ.

² Фарисейлӓр хем билгичлӓр маана булардылар да дейӓрдилӓр: «Бу адам кабледер гӱнахкерлери хем ийер оннарлан».

³ Иисус сӧледи оннара бу ӧрнӓӓ:

⁴ «Кимин сиздӓн вар ӱз койуну, да кайбедер бирисини, бракмээр мы доксан докузу кырда да гитмеер ми, аарасын кайып койуну, ону булунӂа?

⁵ Булдуктан сора севинмӓклӓн алэр ону сыртына,

⁶ гелип евӓ, чаарэр достларыны хем комушуларыны да деер: „Севинин бенимнӓн, зерӓ булдум кайып койунуму“.

⁷ Хеп ӧлӓ деерим сизӓ, гӧктӓ таа бӱӱк севинмӓк олэр бир гӱнахкер ичин, ким пишман олэр гӱнахларындан, некадар доксан докуз доору адам ичин, ангыларын йок зорлары пишманнык ичин.

Кайып гӱмӱш

⁸ Еки ангысы карылардан, кимдӓ вар он гӱмӱш, кайбедип оннардан бирини, тутуштурмээр шафкы хем сӱпӱрмеер ичерсини, да есап алмаклан аарамээр, ону булунӂа?

⁹ Ачан булэр ону, чаарэр достларыны хем комушуларыны да деер: „Севинин бенимнӓн, зерӓ булдум гӱмӱшӱмӱ, ани кайбеттийдим“.

¹⁰ Хеп ӧлӓ сӧлеерим сизӓ, гӧктӓ олэр бӱӱк севинмӓк Аллахын ангиллериндӓ, ачан бир йалныз гӱнахкер пишман олэр гӱнахларындан».

Кайып оол

¹¹ Сора Иисус сӧледи: «Бир адамын варды ики оолу.

¹² О таа кӱчӱк оолу деди бобасына: „Боба, вер варлыктан, не дӱшер бана“. Бобасы пайетти оннара варлыыны.

¹³ Биркач гӱндӓн сора кӱчӱк оол, топлайып хепсини, гитти бир узак девлетӓ, нередӓ гезди хайырсызлыкта, даадып хепсини, не варды онда.

¹⁴ Ачан хепсини харӂады, олду бир бӱӱк аачлык девлеттӓ, да о башлады йоклук чекмӓӓ.

¹⁵ Сора гитти, йанашты о мемлекеттӓн бир адама, ангысы ону йоллады, гӱтсӱн домузлары.

¹⁶ О кайылды баарлем домузларын имеклериннӓн дойунсун, ама кимсей ону бракмарды.

¹⁷ Гелип кендинӓ, деди: „Беним бобамын чыракларынын боллуктан вар имеелери, ама бӓн бурада ӧлерим аачлыктан!

¹⁸ Калкаӂам, гидеӂӓм бобама да дейеӂӓм: Боба! Йанылдым сенин хем гӧкӱн ӧнӱндӓ.

¹⁹ Етмеерим адланайым сенин оолун, ал бени кендинӓ бир чырак гиби“.

²⁰ Озаман калкып-гитти бобасына. Таа узактайкан, бобасы гӧрдӱ ону, ӂаны аӂыды, чыкты качарак она каршы, куӂаклады да ӧптӱ.

²¹ Оолу деди: „Боба, йанылдым гӧкӱн хем сенин ӧнӱндӓ, диилим йакышыклы адланайым сенин оолун!“

²² Ама боба деди чыракларына: „Хызлы гетирин ен ии рубайы да гиидирин ону, верин бир ӱзӱк онун пармаана хем емени айакларына.

²³ Гетирин бесленмиш данайы да кесин, ийелим хем шенненелим.

²⁴ Зерӓ бу оолум ӧлдӱйдӱ да дирилди, кайыпты да булунду“. Да башладылар шенненмӓӓ.

²⁵ Онун бӱӱк оолу кырдайды. Дӧнӱп кырдан, йаклашты евӓ, ишитти музыка хем ойун сеси.

²⁶ Чаарды чыракларын бирисини да сорду: „Не олэр?“

²⁷ Бу чырак сӧледи: „Сенин кардашын дӧндӱ геери, бобан кести бесли данайы, чӱнкӱ кардашын саа булунду“.

²⁸ О ӱфкеленди да гирсин ичери истӓмеди. Онун бобасы, чыкып дышары, йалварды, гирсин.

²⁹ О ӂувап етти кенди бобасына: „Букадар вакыт бӓн измет едерим сана да бир сыра билӓ басмадым сымарладыыны, ама сӓн бана вермедин баарлем бир олак, шенненейим беним достларымнан.

³⁰ Ама ачан гелди бу сенин оолун, ангысы даатты сенин варлыыны маскара карыларлан, онун ичин кестин ен бесли данайы“.

³¹ Бобасы ӂувап етти: „Оолум, сӓн херзаман бенимнӓнсин, хепси, не беним, оннар сенин.

³² Ама лӓӓзымды севинелим хем шенненелим, зерӓ бу сенин кардашын ӧлдӱйдӱ да дирилди, кайыпты да булунду“».