Luka 14 - Ени Бааланты

Не дӱшер ӂумертеси йапмаа?

¹ Бир ӂумертеси гӱнӱ Иисус гирди фарисей ӧндерӂилерин бирисинин евинӓ екмек имӓӓ. Фарисейлӓр йакындан Ону гӧзледӓрдилӓр.

² Она каршы отурду бир хаста адам, ангысынын гӱӱдеси су топламышты.

³ Озаман Иисус сорду закон ӱӱредиӂилеринӓ хем фарисейлерӓ: «Дӱшер ми ӂумертеси гӱнӱ хасталыктан алыштырмаа оса дӱшмеер ми?»

⁴ Оннар сустулар. Озаман Иисус тутту бу хаста адамы да алыштырды, сора, бракып,

⁵ деди: «Ким сиздӓн, дӱшӱрсейди ешӓӓ йада ӧкӱзӱ бир пынар ичинӓ, да ӂумертеси гӱнӱ хызлы чыкармасын ону?»

⁶ Бу лафлара бишей ӂувап едӓмедилӓр.

Йаваш олун

⁷ Сора Иисус есап алды, ниӂӓ буйур едилмишлӓр софрада бакардылар ӧндеки ерлери, онуштан оннара буну сӧледи:

⁸ «Еер сени буйур едӓрсейдилӓр бир дӱӱнӓ, чалышма отурмаа ӧндеки ерӓ, ки олмасын биркимсей таа ӱстӱн сендӓн буйурулмушлар ичиндӓн,

⁹ да икинизи буйур едӓн, сана йаклашып, демесин: „Ери вер бу адама“. Сӓн утанмаклан лӓӓзым олаӂэк отурасын ен гееридӓ.

¹⁰ Ачан сени буйур едерлӓр бир конуша, гит да отур ен гееридӓ, да ачан гелеӂек буйур едӓн, ки теклиф етсин сени, дейип: „Ба дост, дииш таа ӧнӱнӓ“, бу олаӂэк сана икрам хепси софрада отураннарын ӧнӱндӓ, ангылары сениннӓн барабар.

¹¹ Херкези, ким кендини ӱӱсеклендирер, о ашааланмыш олаӂэк, хем ким кендини ашааладэр, о ӱӱсекленмиш олаӂэк».

Кими лӓӓзым чааралым софрайа

¹² Сора Иисус данышты буйур еденӓ да деди: «Ачан койэрсын бир софра, чаарма кенди достларыны, кардашларыны, хысымнарыны, не дӓ сенин зенгин комушуларыны, олмасын дейни, ки сора оннар да кенди сыраларында чаарсыннар сени. Бутӱрлӱ сӓн кабледерсин ӧдек сенин иилиинӓ.

¹³ Ачан койэрсын бир софра, чаар о фукаара оланнары, сакатлары, топаллары хем кӧӧрлары.

¹⁴ Да мутлу олаӂан, зерӓ оннар йок нейлӓн чевирсиннӓр сана геери. Бунун ичин сана ӧдек олаӂэк доору оланнарын дирилмесиндӓ».

Бӱӱк конуш

¹⁵ Бириси оннардан, ангылары софрада отурардылар Онуннан барабар, ишидип бу лафлары, деди: «Не мутлу оннара, ким отураӂэк софрада Аллахын Падишахлыында!»

¹⁶ Иисус ӂувап етти: «Бир адам хазырлады бир бӱӱк конуш да буйур етти чойуну.

¹⁷ Ачан йаклашты конуш вакыды, йоллады чырааны, десин чаарылмышлара: „Буйурун гелин, хепси хазыр“.

¹⁸ Ама оннар хепси, сансын лафланмышлар, афетмӓк истемӓӓ башладылар. Илкинкиси деди: „Сатын алдым топрак да лӓӓзым гидейим бакайым ону, йалварэрым, афет“.

¹⁹ Икинӂиси деди: „Сатын алдым беш чифт ӧкӱз, гидерим, денейим оннары, йалварэрым, афет“.

²⁰ Таа башкасы деди: „Шинди евлендим, онуштан йок насыл гелейим“.

²¹ Чырак дӧндӱ геери да сӧледи хепсини буннары чорбаӂысына. Озаман евин чорбаӂысы пек гӱӂенди да деди кенди чыраана: „Чабук чык касабанын мейданнарына хем сокакларына да гетир фукааралары, сакатлары, кӧӧрлары хем топаллары“.

²² Бираздана чырак деер чорбаӂыйа: „Йаптым, ниӂӓ сымарладын, ама таа ер вар“.

²³ Озаман чорбаӂы деди чыраана: „Чык йоллара хем аул бойларына да зорла хепсини, гелсиннӓр, ки беним евим долсун.

²⁴ Зерӓ сизӓ деерим, ани теклиф едилмишлердӓн кимсей датмайаӂэк беним софрамдан, /зерӓ чок чаарылмыш, ама аз айырылмыш/“».

Иисусун ӱӱрениӂиси

²⁵ Иисусун ардына гидӓрди чок инсан. О дӧндӱ оннара да деди:

²⁶ «Еер биркимсей гелирсейди Бана, ама Бендӓн таа чок севӓрсейди бобасыны, анасыны, карысыны, ушакларыны, кардашларыны, кызкардашларыны йада кенди йашамасыны, йок насыл олсун Беним ӱӱрениӂим.

²⁷ Ким ташымээр кенди ставрозуну да гелмеер Беним ардыма, о йок насыл олсун Беним ӱӱрениӂим.

²⁸ Ким сиздӓн, ачан истеер йапсын бир кӱлӓ, отурмээр илкин йапсын есап, некадар лӓӓзым харӂасын, ки баксын, баша чыкарабилеӂек ми?

²⁹ Олмасын, ки темели койдуктан сора битирӓмесин, да хепси буну гӧреннӓр гӱлмӓӓ башласын,

³⁰ дейерӓк: „Бу адам башлады, ама баша чыкарамады“.

³¹ Йада ангы падишах, ӂенгӓ гидеӂӓӓ заман, илкин отурмээр, аннашсын адамнарыннан, вар мы насыл он бин аскерлӓн гитсин каршы башка падишаха, ангысында вар ирми бин аскер?

³² Есабы чыкмарсайды, йоллээр елчилери барышмак ичин, таа ӧбӱрӱ узактайкан.

³³ Хеп ӧлӓ сиз дӓ, ким атылмээр хепсиндӓн, нейи вар, йок насыл олсун Беним ӱӱрениӂим.

³⁴ Туз иидир, ама еер туз дадыны кайбедӓрсейди, насыл ону енидӓн тузлу йапабилирсин?

³⁵ О не топраа йарар, не дӓ фышкы гиби файдаланар. Калэр салт дышары атмаа. Кимин вар кулаа ишитмӓӓ дейни, ко ишитсин!»