Luka 13 - Ени Бааланты

Пишман олун гӱнахларыныздан

¹ Кимиси оннардан сӧледилӓр Иисуса, не олду биркач Галилейадан адамнарлан, ангыларыны Пилат, ӧлдӱрӱп, каннарыны карыштырмыш оннарын курбаннарыннан.

² «Санэрсыныз, ани бу галилейалылар таа гӱнахкердилӓр каланындан мы, да бутӱрлӱ разгелди? – сорду Иисус. –

³ Диил! Ама, Бӓн сӧлеерим, еер сиз дӓ пишман олмарсайдыныз гӱнахларыныздан, хеп ӧлӓ кайбелеӂениз.

⁴ Оса о онсекиз киши, кимин ӱстӱнӓ Силоам кӱлеси дӱштӱ да ӧлдӱрдӱ оннары, санэрсыныз, ани таа гӱнахкердилӓр ми хепси калан инсандан Иерусалимдӓн?

⁵ Бӓн сӧлеерим сизӓ: диил. Ама еер сиз дӓ пишман олмарсайдыныз гӱнахларыныздан, хеп ӧлӓ кайбелеӂениз».

Мейвасыз фидан

⁶ Иисус сӧледи бу ӧрнӓӓ: «Бир адамын варды бир инӂир фиданы, койулу кенди баасында. Гелип, фиданда аарады мейва, ама булмады.

⁷ Да деди бааӂыйа: „Ӱч йыл вар, ниӂӓ бӓн гелип аарээрым мейва бу фиданда, ама буламээрым. Кес ону, нечин бошуна ери емсин?“

⁸ „Сааби, беклӓ таа бир йыл, казаӂам ону доз-долай, койаӂам кӧкӱнӓ фышкы, – ӂувап етти бааӂы. –

⁹ Беки ондан сора гетирир мейва, ама еер гетирмӓрсейди, гелӓн йыла кесӓрсин ону“».

Ӂумертеси гӱнӱ хаста кары алыштырылды

¹⁰ Иисус ӱӱредӓрди инсаны бир ӂумертеси гӱнӱ синагогаларын бириндӓ.

¹¹ Орада булунарды бир кары, ангысында онсекиз йыл хасталык духу варды. О камбурланмышты да хич узланамарды.

¹² Ачан Иисус гӧрдӱ ону, чаарды да деди: «Кары, куртулдун дердиндӓн».

¹³ Койду еллерини онун ӱстӱнӓ. Кары чабук доорулду да башлады Аллахы метиннемӓӓ.

¹⁴ Ама синагоганын ӧндерӂиси ӱфкеленди, ани Иисус ӂумертеси гӱнӱ алыштырэр, онуштан деди инсана: «Вар алты гӱн, незаман лӓӓзым ишленилсин. Гелин о гӱннердӓ, алышмаа хасталыклардан, ама диил ӂумертеси!»

¹⁵ Сааби ӂувап етти она: «Икиӱзлӱлӓр, херкезиниз ӂумертеси гӱнӱ гӧтӱрмеерсиниз ми, чӧзӱп ахырдан ӧкӱзӱ еки ешӓӓ, сулайасыныз?

¹⁶ Бу кары, Авраамын кызы, ангысыны шейтан тутту баалы онсекиз йыл, аӂаба дӱшмӓрди ми ону ӂумертеси гӱнӱ бошандырмаа бу дерттӓн?»

¹⁷ Ачан Иисус бутӱрлӱ лафетти, хепси каршы дураннар утанмыш калдылар. Херкези севинӓрди хепси метин ишлерӓ, ани йапарды Иисус.

Хардал тоому хем хамур майасы

¹⁸ Сора Иисус деди: «Нейӓ бензӓр олур Аллахын Падишахлыы, нейлӓн бензедейим ону?

¹⁹ Бензеер бир хардал тоомуна, ани адам, алып, екер аулу ичинӓ. Тоом бӱӱйер да аач гиби олэр. Гӧк кушлары йува йапэрлар онун далларында».

²⁰ Сора енидӓн деди: «Нейӓ бензедейим Аллахын Падишахлыыны?

²¹ О бензеер бир парча хамур майасына, ани алэр бир кары да карыштырэр ӱч ӧлчӱ уннан, бӱтӱн хамуру кабартсын».

Дар капу

²² Иисус гезӓрди кӱӱдӓн кӱӱйӓ хем касабадан касабайа, ӱӱредӓрди инсаны, гидерӓк Иерусалимӓ.

²³ Биркимсей сорду Она: «Сааби, санки куртулмушлар азлык мы олаӂэклар?»

²⁴ О ӂувап етти: «Чалышын гирмӓӓ дар капудан. Зерӓ сизӓ деерим: чойу чалышаӂэк, ама гирӓмейеӂек.

²⁵ Незаман евин чорбаӂысы калкып капуйу капайаӂэк, сиз дураӂэныз дышанда, ураӂэныз капуйа да дейеӂениз: „Сааби, ач бизӓ!“ Ама О ӂувап едеӂек: „Танымээрым сизи, нередӓн гелдиниз“.

²⁶ Озаман башлайаӂэныз Она демӓӓ: „Биз идик хем ичтик Сениннӓн барабар. Бизим сокакларда Сӓн ӱӱреттин инсаны“.

²⁷ Да О ӂувап едеӂек: „Билмеерим, нередӓнсиниз, узаклашын Бендӓн хепсиниз, ани законсуз йашадыныз“.

²⁸ Орада олаӂэк ааламак хем диш гыӂырдатмасы. Гӧреӂениз Авраамы, Исаакы, Иакову хем хепси пророклары Аллахын Падишахлыында, ама кендиниз дышанда калаӂэныз.

²⁹ Гелеӂеклӓр гӱндуусундан хем гӱнбатысындан, пойраздан хем ӱӱлендӓн, Аллахын Падишахлыында софрайа отураӂэклар.

³⁰ Кимиси, ани шинди битки, орада илк олаӂэк, хем кимиси, ани шинди илк, битки олаӂэк».

Иисус аалээр Иерусалим ичин

³¹ О саат гелди биркач фарисей да дедилӓр Иисуса: «Чык да гит бурадан, зерӓ Ирод ӧлдӱрмӓӓ истеер Сени».

³² «Гидин да сӧлейин о тилкийӓ: „Тӓ, чыкарэрым фена духлары хем алыштырэрым хасталары бӱӱн хем йаарын, ӧбӱргӱнӓ битирерим“.

³³ Бана лӓӓзым бӱӱн, йаарын хем ӧбӱргӱнӓ йолда гидейим, зерӓ йок ниӂӓ пророк ӧлсӱн Иерусалимдӓн дышары.

³⁴ Иерусалим, Иерусалим, ани ӧлдӱрерсин пророклары хем ташлан дӱӱйерсин сана йолланылмышлары! Кач сыра истедим топлайым сенин ушакларыны, ниӂӓ клочка топлээр пиличлерини канатлары алтына, ама сиз истӓмединиз!

³⁵ Тӓ, евиниз сизӓ бош бракылэр. Сӧлеерим сизӓ, ани гӧрмейеӂениз Бени гелмейинӂӓ о вакыт, ачан дейеӂениз: „Иисӧзленмиш олсун, ким гелер Саабинин адына!“»