Luka 1 - Ени Бааланты

Не ишиттик дири шаатлардан

¹ Чойу башлады йазмаа аннатмак олушлар ичин, ани гечтилӓр бизим арамызда,

² ниӂӓ етиштирдилӓр бизӓ баштан о инсаннар, ани гӧрдӱлӓр хепсини хем ангылары шинди олдулар Аллахын Сӧзӱнӱн насаатчылары.

³ Бӓн дӓ есапладым, хепсини ислӓӓ аараштырдыктан сора, хатырлы Феофил, сыравардыр йазайым сана хепсини, ниӂӓ олду,

⁴ ки сӓн билӓсин о ишин аслысыны, ани ӱӱрендин.

Иоанын дуумасы ичин хабер

⁵ Иудейада, падишах Иродун вакыдында, варды бир попаз, ады Захарийа, Авийанын сырасындан. Онун карысы Аронун кызларынданды, ады Елисавета.

⁶ Икиси дӓ Аллахын ӧнӱндӓ доору инсаннардылар. Бир лекесиз билӓ таманнардылар хепси Аллахын сымарладыкларыны хем сыраларыны.

⁷ Ушак оннарда йокту, зерӓ Елисавета гебӓ калмарды, хем икиси дӓ, Захарийа хем Елисавета, йашлы инсаннарды.

⁸ Бир сыра, ачан Захарийа измет едӓрди Аллахын ӧнӱндӓ онун изметчилии сырасында,

⁹ аттылар четелӓ попазларын алышмакларына гӧрӓ, да она дӱштӱ, гӱннӱклесин Аллахын Айоз бинасы ичиндӓ.

¹⁰ Гӱннӱклемӓк вакыдында чок инсан дуа едӓрди дышарда.

¹¹ Озаман Захарийайа гӧстерилди Аллахын бир ангили. О дурарды гӱннӱк алтарын саа тарафында.

¹² Ачан Захарийа гӧрдӱ ону, ӱрктӱ. Бир бӱӱк корку басты ону.

¹³ Ангил деди она: «Захарийа, коркма, зерӓ сенин дуан сесленмиш олду. Сенин карын Елисавета дуудураӂэк сана бир оол, ангысынын адыны койаӂан Иоан.

¹⁴ О сана олаӂэк шенник хем севинмӓк. Чок инсан севинеӂек онун дуумасы ичин.

¹⁵ О Аллахын ӧнӱндӓ олаӂэк бир бӱӱк адам. Ичмейеӂек шарап хем башка серсем едӓн ичкилери. Таа дуумактан о долу олаӂэк Айоз Духлан.

¹⁶ Чойуну Израилдӓн о дӧндӱреӂек оннарын Сааби Аллахына.

¹⁷ О Аллахын ӧнӱндӓ гезеӂек Илийанын кувединнӓн хем духуннан, чевирсин дейни бобаларын ӱреклерини ушакларына хем о канырыклы неетлилери доорулаа. О хазырлайаӂэк инсаны Саабинин гелмеси ичин».

¹⁸ Захарийа деди ангилӓ: «Недӓн бӓн таныйаӂам буну? Зерӓ бӓн ихтӓрым, карым да йашлы».

¹⁹ Ангил ӂувап етти: «Бӓн, Гавриил, дурэрым Аллахын каршысында, йолланылмышым, ки лафедейим сениннӓн да гетирейим бу ии хабери сана.

²⁰ Сӓн лафедӓмейеӂӓн хем дилсиз калаӂан о гӱнӓ кадар, бу олунӂа, зерӓ инанмадын беним сӧзлерими, ани вакыт гелдийнӓн, хепси ӧлӓ олаӂэк».

²¹ Инсан, ани беклӓрди Захарийайы, шашарды, нечин чок ойаланэр Айоз бина ичиндӓ.

²² Ачан чыкты дышары, лафедӓмӓрди. Оннар аннадылар, ани Айоз бина ичиндӓ о гӧрдӱ бир гӧрӱнмӓк. Захарийа оннара нышаннан гӧстерӓрди, зерӓ лафедӓмӓрди.

²³ Ачан измет гӱннери таманнанды, Захарийа гелди евӓ.

²⁴ Бу гӱннердӓ Елисавета гебӓ калды да беш ай сакланды, зерӓ дейӓрди:

²⁵ «Сааби битки-биткийӓ есап алды да йапты, ки чыкайым инсанын аазындан хем кӧтӱ лафларындан».

Иисусун дуумасы ичин хабер

²⁶ Алтынӂы айда, ангил Гавриил йолланмыш олду Аллахтан Галилейанын бир касабасына, ады Назарет.

²⁷ Гелди бир кыза, ангысы йавклуйду Иосифлӓн, бир адамнан, Давидин сенселесиндӓн. Бу кызын ады Марийа.

²⁸ Ангил гелди она да деди: «Услулук сана, Аллахтан ииверги еденӓн кыз, Сааби сениннӓн. /Иисӧзленмишсин сӓн карыларын арасында!/»

²⁹ Марийа бу лафлардан шашты да дӱшӱнмейӓ варды. О сорарды кенди-кендинӓ, не аннамасы вар бу селӓмин?

³⁰ Ангил деди: «Коркма, Марийа, сӓн едендин ииверги Аллахтан.

³¹ Гебӓ калаӂан да дуудураӂан бир Оол, Ангысынын адыны койаӂан Иисус.

³² О олаӂэк бир бӱӱк Адам. Онун адыны койаӂэклар „Пек ӱӱсек Аллахын Оолу“. Сааби Аллах вереӂек Она Онун Бобасынын, Давидин, чорбаӂылыыны.

³³ О дивеӂинӓ падишахлык едеӂек Иаковун евиндӓ. Онун падишахлыынын сону олмайаӂэк».

³⁴ Марийа сорду ангилӓ: «Несой бу вар насыл олсун, ачан бӓн билмеерим, недир коӂа?»

³⁵ Ангил ӂувап етти: «Айоз Дух конаӂэк сана. Пек ӱӱсек Аллахын гӧлгеси сени гӧлгелейеӂек. О, Ким сендӓн дууаӂэк, адланаӂэк айоз, Аллахын Оолу.

³⁶ Сенин хысымын Елисавета артык йашлы, ама гебӓ калды. О да дуудураӂэк бир оол. Она хепси дейӓрди ушаксыз, ама артык алты ай, ниӂӓ гебӓ калды.

³⁷ Аллахын бир дӓ сӧзӱ йок насыл куветсиз калсын».

³⁸ Озаман Марийа деди: «Сааби, бӓн сенин чыраан, олсун Сенин сӧзӱнӓ гӧрӓ!» Да ангил гитти ондан.

Марийа гелер Елисаветайа

³⁹ Марийа бираздана калкты да алатлан гитти байырлардакы касабайа, ани Иуданын ерлериндейди.

⁴⁰ Гирди Захарийанын евинӓ да селӓмнеди Елисаветайы.

⁴¹ Ачан Елисавета ишитти Марийанын кутламасыны, онда бирдӓн тепинди ушак. Елисавета долду Айоз Духлан.

⁴² Елисавета баарды бӱӱк сеслӓн: «Иисӧзленмишсин сӓн карыларын арасында хем иисӧзленмиш сенин Ушаан, ангысыны сӓн ташыйэрсын!

⁴³ Насыл бӓн казандым бӧлӓ икрам, ки бана гелсин беним Саабинин анасы?

⁴⁴ Ниӂӓ ишиттим сенин сесини кутламакта, тепинди ушак севинмектӓн ичимдӓ.

⁴⁵ Не мутлуйсун сӓн, ани инандын Саабинин сӧзӱнӱ, зерӓ Сааби не адээр, ону таманнээр».

⁴⁶ Марийа деди: «Бӓн бӱтӱн ӱректӓн метиннеерим Саабийи.

⁴⁷ Севинир духум Аллахта, беним Куртарыӂымда.

⁴⁸ Зерӓ Аллах есап алды Онун чыраан ашаадан халыны. Бӱӱндӓн ӧтӓӓ хепси сенселелӓр мутлулайаӂэклар бени.

⁴⁹ Чӱнкӱ Чоккудретли йапты бӱӱк ишлӓр беним ичин, Онун ады айоздур.

⁵⁰ Онун аӂыйанныы каплээр бойдан-бойа Ондан коркан инсаны.

⁵¹ О гӧстерди куведини Кенди елиннӓн да бозду ходулларын дӱшӱнмеклерини.

⁵² Девирди о каавилери чорбаӂылык скемнелериндӓн да калдырды ашаа халдан инсаны.

⁵³ Аач оланнары О дойурду ииликлӓн, ама зенгин оланнары салверди, гитсиннӓр бош еллӓн.

⁵⁴ О Кенди изметкеринӓ, Израилӓ, йардыма гелди. О бир сыра билӓ унутмээр аӂымаа,

⁵⁵ ниӂӓ адады бизим деделеримизӓ, Авраама хем онун сенселесинӓ дивеӂинӓ».

⁵⁶ Марийа калды Елисаветайлан ӱч айын долайында, сора дӧндӱ геери евӓ.

Иоан Ваатизедиӂинин дуумасы

⁵⁷ Ачан гелди вакыды дуудурсун, Елисавета дуудурду бир оол.

⁵⁸ Комушулар хем хысымнар ишиттилӓр, ани Сааби бӱӱк хайыр баашлады Елисаветайа, онуштан хепси онуннан билӓ севиндилӓр.

⁵⁹ Секизинӂи гӱнӱ гелдилӓр ушаа кесиклик йапмаа. Истедилӓр адыны коймаа Захарийа, ниӂӓ бобасынын ады.

⁶⁰ Ама анасы оннара деди: «Олмаз, онун ады Иоан олаӂэк».

⁶¹ «Кимсейдӓ сизин хысымнардан йок бутӱрлӱ ад», – ӂувап етти оннар.

⁶² Йаптылар нышан еллериннӓн бобасына, ки аннасыннар, несой ушаан адыны койсуннар.

⁶³ Захарийа истеди бир парча тафтаӂык да йазды бӧлӓ: «Онун ады Иоан олаӂэк». Хепси шаштылар.

⁶⁴ Хемен чӧзӱлдӱ онун дили, да башлады лафетмӓӓ хем Аллахы метиннемӓӓ.

⁶⁵ О байырлы Иудейанын ерлериндӓ хепси комушулары бир корку басты. Долайда хепси инсан бунун ичин лафедӓрди.

⁶⁶ Хепси, ким дӓ ишидӓрди буну, дӱшӱнмӓӓ варып, дейӓрди: «Аӂаба, бу ушак ким олаӂэк?» Хакына, ани Аллахын ели онун ӱстӱндейди.

Захарийанын пророклуу

⁶⁷ Ушаан бобасы, Захарийа, долду Айоз Духлан да пророклук етти:

⁶⁸ «Иисӧзленмиш олсун Израилин Сааби Аллахы, Ангысы гелди йардыма Кенди инсанына да куртарды оннары.

⁶⁹ Калдырды бизӓ бир каави Куртарыӂы Кенди изметкерин, Давидин, евиндӓн,

⁷⁰ ниӂӓ хаберледийди евел вакыттан айоз пророкларыннан.

⁷¹ Адады, ани куртараӂэк бизи душманнардан хем кинӂилерин еллериндӓн.

⁷² Бутакым, Аллах гӧстерер Кенди аӂыйанныыны бизим бобаларымыз ичин, унутмээр айоз баалантысыны

⁷³ хем еминнӓн адамасыны, ани верди бизим бобамыза Авраама.

⁷⁴ О адады, ани бизи куртараӂэк душманнардан да йапаӂэк, ки измет еделим Она коркусуз,

⁷⁵ кабаатсызлыкта хем айозлукта бӱтӱн бизим йашамамызда.

⁷⁶ Ама сӓн, евлат, адланаӂан Пек ӱӱсек Аллахтан пророк, зерӓ гидеӂӓн Саабинин ӧнӱ сора, ки Онун ичин йол хазырлайасын.

⁷⁷ Сӓн инсана хаберлейеӂӓн куртулмак хем гӱнахлардан баашламак.

⁷⁸ Аллахымыз, долу севгийлӓн хем аӂыйанныклан, йукардан йоллайаӂэк бизӓ куртулмак, бензӓр дан еринин шафкына,

⁷⁹ ки айдыннатсын оннара, ким булунэр каранныкта хем ӧлӱм гӧлгесиндӓ, доорутсун бизи услулук йолуна».

⁸⁰ Ушак бӱӱйӓрди, каавиленӓрди духлан. Йашады чол ерлериндӓ о гӱнӓ кадар, ачан чыкты Израил халкынын каршысына.