İoan 9 - Ени Бааланты

Дуумактан кӧӧр олан гӧрмӓк еденер

¹ Иисус, гечӓркӓн, гӧрдӱ бир дуумактан кӧӧр адамы.

² Ӱӱрениӂилери сордулар: «Ӱӱредиӂи, ким гӱнах йапты, ани бу адам дууду кӧӧр, кендиси ми оса бобалары мы?»

³ Иисус ӂувап етти: «Гӱнах йапмады не бу адам, не да онун бобалары, ама о бӧлӓ дууду, ки онуннан гӧстерилсин Аллахын ишлери.

⁴ Лӓӓзым Онун, Ким йоллады Бени, ишини йапалым, некадар вакыт гӱндӱз. Зерӓ гелер геӂӓ, ачан кимсей йок насыл ишлесин.

⁵ Некадар вакыт булунэрым дӱннедӓ, дӱннейин айдынныы булунэрым».

⁶ Бу лафлардан сора тӱкӱрдӱ ерӓ, йапты чамур, йаалады бу кӧӧр адамын гӧзлерини чамурлан,

⁷ да деди она: «Гит, йыкан Силоам суйунда». Силоамын аннамасы «йолланмыш». Адам гитти, йыканды да, ачан дӧндӱ геери, гӧзлери гӧрӓрди.

⁸ Комушулар хем инсаннар, ани ӧнӂӓ гӧрдӱйдӱлӓр ону диленӓркӓн, сордулар: «Диил ми о, ани отурарды да диленӓрди?»

⁹ Кимиси дейӓрдилӓр: «О кенди», башкалары дейӓрдилӓр: «Диил, бензеер она», ама адам кендиси дейӓрди: «Бӓн кендимим».

¹⁰ Озаман сордулар она: «Несой ачылды сенин гӧзлерин?»

¹¹ О ӂувап етти: «О, Кимин ады Иисус, йапты чамур, йаалады гӧзлерими да сора деди: „Гит, йыкан Силоам суйунда“. Гиттим, йыкандым да гӧрмӓк едендим».

¹² «Нередӓ О?» – сорду оннар. «Билмеерим», – ӂувап етти бу адам.

Фарисейлӓр аараштырэрлар мераклы иши

¹³ Бу адамы, ангысы ӧнӂӓ кӧӧрду, гӧтӱрдӱлӓр фарисейлерӓ.

¹⁴ О гӱн, ачан Иисус йапты чамур да ачты онун гӧзлерини, ӂумертесийди.

¹⁵ Онун ичин фарисейлӓр дӓ сордулар бу адама: «Несой башладын гӧрмӓӓ?» О ӂувап етти оннара: «О чамурлады гӧзлерими, да йыканып башладым гӧрмӓӓ».

¹⁶ Озаман кимиси фарисейлердӓн дедилӓр: «Бу адам диил Аллахтан, зерӓ тутмээр ӂумертесини». Башкалары дейӓрдилӓр: «Несой вар ниӂӓ бир гӱнахкер адам йапсын бӧлӓ мераклы нышаннар?» Оннарын арасында чекетти кавга.

¹⁷ Енидӓн сордулар адама, ани кӧӧрду: «Сенин гӧзлерини О ачтыйса, не сӓн дейеӂӓн Онун ичин?» «О бир пророк», – ӂувап етти бу адам.

¹⁸ Иудейлӓр, чаармайынӂа анасыны-бобасыны онун, кимин гӧзлери ачылды, инанмадылар, ани о кӧӧрду да гӧрмӓк еденди.

¹⁹ Сордулар оннара: «Бу му сизин оолунуз, ангысы ичин деерсиниз, ани кӧӧр дууду? Несой шинди гӧрӓбилер?»

²⁰ Ӂувап етти онун бобасы хем анасы: «Билериз, ани бу бизим оолумуз, хем ани дууду кӧӧр.

²¹ Ама несой шинди гӧрер, хем ким ачты онун гӧзлерини, билмеериз. Сорун она, о етишӓр йашларда, да кенди вар ниӂӓ ӂувап етсин кендиси ичин».

²² Бобалары бӧлӓ лафеттилӓр, зерӓ коркардылар иудейлердӓн. Иудейлӓр аннаштыйдылар, ани еер биркимсей ачык дейӓрсейди, ани Иисус – Христостур, ону ууратсыннар синагогадан.

²³ Онуштан онун бобалары дедилӓр: «О етишӓр йашларда, сорун она».

²⁴ Фарисейлӓр икинӂи сыра чаардылар адамы, ани кӧӧрду, да дедилӓр она: «Аллаха емин ет да доору сӧлӓ, зерӓ биз билериз, ани бу адам гӱнахкер».

²⁵ О ӂувап етти: «Гӱнахкер ми, бӓн билмеерим. Бир иш билерим, ани кӧӧрдум да шинди гӧрерим».

²⁶ Озаман сордулар: «Не йапты О сана, несой ачты гӧзлерини?»

²⁷ «Демин сӧледим сизӓ, да сеслӓмединиз. Нечин таа бир сыра ишитмӓӓ истеерсиниз? – ӂувап етти о. – Беки сиз дӓ истеерсиниз олмаа Онун ӱӱрениӂилери?»

²⁸ Оннар ону азарладылар да дедилӓр: «Сӓн Онун ӱӱрениӂисийсин, ама биз Моисейин ӱӱрениӂилерийиз.

²⁹ Билериз, ани Аллах лафетти Моисейлӓн, ама бу Адамы билмеериз, нередӓн О».

³⁰ «Шашылаӂак иш бу! – деди адам, ани еденди гӧрмӓк. – Сиз билмеерсиниз, нередӓн О, ама О ачты беним гӧзлерими.

³¹ Билериз, ани Аллах сеслӓмеер гӱнахкерлери, ама ким коркэр Аллахтан да йапэр Онун истедиини, ону Аллах сеслеер.

³² Незамандан курулуйду дӱннӓ, ишидилмеди, ки биркимсей ачсын дуумактан кӧӧр адамын гӧзлерини.

³³ Еер олмайайды О Аллахтан, йапамайаӂэйды бишей».

³⁴ «Сӓн дуумушун бӱс-бӱтӱн гӱнахта да истеерсин ӱӱретмӓӓ бизи ми?» – ӂувап етти оннар да кооладылар ону дышары.

Кӧӧр духчасына

³⁵ Иисус ишитти, ани уураттылар ону дышары, да, ачан булушту онуннан, сорду: «Инанэрсын мы Адам Оолуна?»

³⁶ О ӂувап етти: «Сааби, Кимдир О, ки инанайым Она?»

³⁷ Иисус деди: «Сӓн Ону гӧрерсин, О, Ким сениннӓн лафедер, О Кендиси».

³⁸ «Инанэрым, Сааби!» – ӂувап етти да баш иилтти Иисуса.

³⁹ Иисус деди: «Бӓн гелдим бу дӱннейӓ даава ичин, ки оннар, ким гӧрмеерлӓр, гӧрсӱннӓр, ама гӧреннӓр кӧӧр олсуннар».

⁴⁰ Фарисейлердӓн бир бойу, ангылары Онун йанындайдылар, ачан ишиттилӓр бу лафлары, дедилӓр: «Чыкэр, ани биз дӓ кӧӧруз?»

⁴¹ «Олайдыныз кӧӧр, олмайаӂэйды гӱнахыныз, ама чӱнкӱ деерсиниз, ани гӧрерсиниз, онуштан гӱнах калэр сизин ӱстӱнӱздӓ.