İoan 7 - Ени Бааланты

Иисус Бордей йортусунда

¹ Бундан сора Иисус гезӓрди Галилейада. Истӓмӓрди гезсин Иудейада, зерӓ иудейлӓр аарардылар ӧлдӱрсӱннӓр Ону.

² Йаклашарды иудейлерин Бордей йортусу.

³ Иисусун кардашлары дедилӓр Она: «Чык бурадан да гит Иудейайа, Сенин ӱӱрениӂилерин дӓ гӧрсӱннӓр, не ишлӓр йапэрсын.

⁴ Зерӓ кимсей йаптыкларыны сакламээр, ачан истеер ачылсын инсана. Чӱнкӱ Сӓн йапэрсын бу ишлери, гӧстер Кендини дӱннейӓ».

⁵ Онун кардашлары буну дедилӓр, зерӓ инанмардылар Она.

⁶ Иисус ӂувап етти оннара: «Беним вакыдым таа гелмеди, ама сизин ичин херзаман вакыт уйгун.

⁷ Сиздӓн дӱннӓ йок насыл азетмесин, ама Бендӓн азетмеер, зерӓ Бӓн ачыклээрым, ани онун ишлери кӧтӱ.

⁸ Сиз гидин йортуйа. Бӓн таа гитмейеӂӓм бу йортуйа, зерӓ Беним вакыдым таа гелмеди».

⁹ Буннары сӧледиктӓн сора О калды Галилейада.

Иисус йортуда

¹⁰ Ачан кардашлары гиттилӓр йортуйа, сора О да ардларындан гитти, ама диил ачыкта, саклы гитти.

¹¹ Иудейлӓр аарардылар Ону йорту вакыды да сорардылар: «О нередӓ?»

¹² Инсан арасында чок тӱрлӱ Онун ичин фисирдемӓк олурду. Кимиси дейӓрди: «О бир ислӓӓ адам», башкасы дейӓрди: «Диил ислӓӓ, О инсаны алдадэр».

¹³ Ама кимсей Онун ичин лафетмӓрди ачык, зерӓ коркардылар иудейлердӓн.

¹⁴ Йортунун йарысында Иисус гирди Айоз бина ичинӓ да башлады ӱӱретмӓӓ.

¹⁵ Иудейлӓр шашардылар, дейип: «Нӓӓндан О билер, ӱӱренмедийнӓн, Айоз Йазылары?»

¹⁶ Иисус ӂувап етти: «Беним ӱӱренмишлиим диил Бендӓн, ама Ондан, Ким Бени йоллады.

¹⁷ Еер биркимсей истӓрсейди йапсын Онун истедиини, о аннайаӂэк бу ӱӱретмӓк Аллахтан мы, оса Бӓн Кендимдӓн ми сӧлеерим.

¹⁸ Ким лафедер кендиндӓн, о кендинӓ метинник бакэр, ама ким онун йоллайанын метинниини бакэр, о доору сӧлеер, онда йок йаннышлык.

¹⁹ Вермеди ми Моисей сизӓ Закону? Хеп окадар кимсей сиздӓн тутмээр Закону, озаман нечин Бени ӧлдӱрмӓӓ бакэрсыныз?»

²⁰ Инсан ӂувап етти: «Диил ми фена дух Сендӓ? Ким бакэр Сени ӧлдӱрмӓӓ?»

²¹ Иисус ӂувап етти оннара: «Бӓн бир иш йаптым, да хепсиниз шаштыныз.

²² Моисей верди сымарламак кесиклик ичин сизӓ, макар ки бу диил Моисейдӓн, ама деделердӓн, да сиз онуштан кесиклик йапэрсыныз ушаа ӂумертеси гӱнӱ.

²³ Еер ушаа кесиклик йапыларсайды ӂумертеси гӱнӱ, ки басылмасын Моисейин Закону, нечин Бана окадар ӱфкеленерсиниз, ани ӂумертеси гӱнӱ бир адамы хептӓн саа йаптым?

²⁴ Даава кесмейин дышанкы дуруша гӧрӓ, ама даава кесин доорулаа гӧрӓ».

Иисус хакына Христос му?

²⁵ Кими адамнар Иерусалимдӓн сорардылар: «Диил ми бу О, кими ӧлдӱрмӓӓ аарээрлар?

²⁶ Тӓ, О лафедер ачыклыкта, да кимсей бишей Она демеер! Аӂаба кайыл олмады мы ӧндерӂилӓр дӓ, ани О Христос?

²⁷ Биз билериз, нередӓн О, ама ачан Христос гелеӂек, кимсей билмейеӂек нередӓн».

²⁸ Иисус, Айоз бина аулунда ӱӱредерӓк инсаны, бӧлӓ баарды: «Сиз Бени таныйэрсыныз хем билерсиниз нередӓним, ама Бӓн Кенди башыма гелмедим. Бени Йоллайан – хаклы, ама сиз Ону танымээрсыныз.

²⁹ Бӓн таныйэрым Ону, зерӓ гелдим Ондан. О Бени йоллады».

³⁰ Оннар бакардылар тутсуннар Ону, ама кимсей ел койамады Она, зерӓ гелмедийди вакыды.

³¹ Чойу инсандан инандылар Она. Оннар дейӓрдилӓр: «Ачан Христос гелеӂек, не таа чок нышан йапаӂэк мы, некадар бу Адам йапэр?»

³² Фарисейлӓр ишиттилӓр инсаны бӧлӓ фысырдашарак Иисус ичин. Бӱӱк попазлар хем фарисейлӓр йолладылар бекчилери, ки тутсуннар Иисусу.

³³ Ама Иисус деди: «Бӓн бир парча вакыт таа олаӂам сизиннӓн да сора гидеӂӓм Она, Ким йоллады Бени.

³⁴ Сиз аарайаӂэныз Бени да буламайаӂэныз. Нередӓ Бӓн олаӂам, сиз орайы йок ниӂӓ гелӓсиниз».

³⁵ Иудейлӓр лафедӓрдилӓр бири-бириннӓн: «Нерейи бу адам истеер гитсин, да биз Ону буламайалым? Дӱшӱнмеер ми гитсин бизим инсана, ани даанык урум касабаларына, да урумнары ӱӱретсин?

³⁶ Башка тӱрлӱ несой аннамаа бу лафлары, ани сӧледи: „Аарайаӂэныз да буламайаӂэныз Бени“ хем „Нередӓ Бӓн олаӂам, сиз орайы гелӓмейеӂениз?“»

Иисус – йашамак суйу

³⁷ Йортунун битки бӱӱк гӱнӱндӓ Иисус калкты айакча да баарды: «Ким сусады, гелсин Бана да ичсин.

³⁸ Ким инанэр Бана, ондан бир дерӓ йашамак суйу акаӂэк, ниӂӓ йазылы Айоз Йазыда».

³⁹ Сӧлӓрди бу лафлары Айоз Дух ичин, Ангысыны лӓӓзымды каблетсиннӓр оннар, ким Она инанэр. Зерӓ Айоз Дух таа верилмедийди, хем Иисус таа диилди метинникли.

⁴⁰ Кимиси инсандан, ачан ишиттилӓр бу лафлары, дедилӓр: «Бу адам хакына бекленӓн пророк».

⁴¹ Башкасы дейӓрди: «О Христос», ама таа башкасы дейӓрди: «Олур му Христос Галилейадан гелсин?

⁴² Йок му йазылы Айоз Йазыда, ани Христос гелеӂек Давидин сенселесиндӓн, Вифлеем касабасындан, нередӓ Давид йашарды?»

⁴³ Ӧлӓ ки, олурду чекиш инсан арасында Иисус ичин.

⁴⁴ Кимиси бактылар тутсуннар Ону, ама кимсей ел койамады Она.

Иудей ӧндерӂилери инанмээрлар

⁴⁵ Бекчилӓр дӧндӱлӓр геери бӱӱк попазлара хем фарисейлерӓ. Буннар сордулар оннара: «Нечин гетирмединиз Ону?»

⁴⁶ Бекчилӓр ӂувап еттилӓр: «Кимсей бир сыра билӓ лафетмеди бу адам гиби».

⁴⁷ Фарисейлӓр дедилӓр: «Не, сиз дӓ ми алдандыныз?

⁴⁸ Инанды мы аӂаба бир ӧндерӂи еки бир фарисей Она?

⁴⁹ Бу инсан билмеер Закону, о бетвалы!»

⁵⁰ Оннардан бири, Никодим, ангысы ӧнӂӓ гелдийди Иисуса, деди оннара:

⁵¹ «Бизим Закон кабаатландырэр мы биркимсейи, таа сеслӓмедийнӓн ону хем аннамадыйнан, не йапты?»

⁵² Оннар ӂувап еттилӓр: «Беки сӓн дӓ Галилейадансын? Аараштыр ислӓӓ да бак, Галилейадан вар мы насыл чыксын пророк?»

⁵³ Сора хепси даалыштылар евлеринӓ.