İoan 4 - Ени Бааланты

Самарийалы кары

¹ Фарисейлӓр ишиттилӓр, ани Иисус таа чок ӱӱрениӂи еденер хем ваатиз едер, некадар Иоан.

² Аслысы, Кенди Иисус ваатиз етмӓрди, ама ваатиз едӓрди Онун ӱӱрениӂилери.

³ Ачан Иисус аннады буну, бракты Иудейайы да енидӓн гитти Галилейа ерлеринӓ.

⁴ Лӓӓзымды гечсин Самарийадан.

⁵ Тӓ, Иисус гелер Самарийада бир касабайа, ады Сихар, нереси йаннашык о кырлан, ани Иаков вердийди кенди оолуна Иосифӓ.

⁶ Орада булунарды Иаковун пынары. Иисус, дингин йолдан, отурду пынарын йанында ӧлӓ бир алтынӂы саатта.

⁷ Гелди бир кары Самарийадан, ки су пынардан чыкарсын. «Вер Бана, су ичейим», – деди Иисус.

⁸ Зерӓ Онун ӱӱрениӂилери гиттийдилӓр касабайа имеелик алмаа.

⁹ Самарийалы кары деди: «Сӓн иудейсин, несой бендӓн, самарийалы карыдан, су ичмӓӓ истеерсин?» Иудейлӓр бишей пайлашмээрлар самарийалыларлан.

¹⁰ Иисус ӂувап етти она: «Еер билсӓн Аллахын баашышыны хем Ону, Ким сендӓн су истеер, сӓн кендин истӓрсин Ондан су ичмӓӓ, да О йашамак суйу верир сана».

¹¹ Кары деер Она: «Сааби, сӓн йок нейлӓн чыкарасын су, пынар да дерин, несой вар колай олсун сендӓ йашамак суйу?

¹² Не сӓн таа бӱӱксӱн бизим бобадан Иаковдан мы, ангысындан бизӓ калды бу пынар, нередӓн ичти кендиси, ооллары хем хайваннары?»

¹³ Иисус ӂувап етти: «Ким ичер бу судан, о енидӓн сусар,

¹⁴ ама ким ичеӂек о судан, ани Бӓн вереӂӓм, дивеч сусуз калмайаӂэк. Ама су, ани она вереӂӓм, онда бир сызынты олаӂэк, да дивеч йашамайа гетиреӂек».

¹⁵ Кары деди Она: «Чорбаӂы, вер бу судан бана, ки сусамайым да гелмейим бурадан су чыкармаа».

¹⁶ «Гит, чаар коӂаны да гел бурайы», – деди Иисус.

¹⁷ Кары ӂувап етти: «Йок коӂам». «Доору сӧледин, ани йок коӂан, – деди Иисус, –

¹⁸ зерӓ беш коӂан олду. Бу адам, киминнӓн шинди йашээрсын, о да диил сенин коӂан. Буну доору сӧледин».

¹⁹ Кары деди: «Чорбаӂы, гӧрерим, ани Сӓн бир пророксун.

²⁰ Бизим бобалар баш иилттилӓр бу байыр ӱстӱндӓ, ама сиз деерсиниз, ани ер, нередӓ лӓӓзым баш иилтмӓӓ, булунэр Иерусалимдӓ».

²¹ Иисус ӂувап етти она: «Кары, инан Бени, гелер вакыт, ачан баш иилтмейеӂениз Бобайа не бу байыр ӱстӱндӓ, не дӓ Иерусалимдӓ.

²² Сиз баш иилдерсиниз нейӓ билмеерсиниз, биз баш иилдериз нейӓ билериз, зерӓ куртулмак – иудейлердӓн.

²³ Ама гелер вакыт, артык шиндӓн сора гелди, ачан хакына баш ураннар баш иилдеӂеклӓр Бобайа духта хем аслылыкта, зерӓ бутӱрлӱ баш иилденнери Боба аарээр.

²⁴ Аллах – дух. Ким баш иилдер Она, лӓӓзым баш урсун духта хем аслылыкта».

²⁵ Кары ӂувап едер: «Билерим, ани гелеӂек Мессийа, Ангысына денер Христос. О, гелдийнӓн, хепсини бизӓ аннадаӂэк».

²⁶ Иисус деди: «Бӓн, ани сениннӓн лафедерим, Кендим Мессийайым».

²⁷ Бу вакыт гелди Онун ӱӱрениӂилери. Оннар шаштылар, ани О лафедер бир карыйлан. Ама бириси билӓ сормады: «Не истеерсин?» еки: «Нечин лафедерсин онуннан?»

²⁸ Кары бракты су кабыны, гитти касабайа да деди инсана:

²⁹ «Гелин дӓ гӧрӱн бир адам, ангысы сӧледи хепсини, не йаптым. Аӂаба диил ми О Христос?»

³⁰ Оннар чыктылар касабадан да гелӓрдилӓр Иисуса.

³¹ Бу вакыт ӱӱрениӂилӓр йалварардылар Она, исин, дейип: «Ӱӱредиӂи, и бишей».

³² Ама О деди: «Бендӓ вар бир имӓк, ани сиз билмеерсиниз».

³³ Ӱӱрениӂилӓр бири-бириннӓн лафедӓрдилӓр: «Гетирмеди ми аӂаба Она биркимсей имӓӓ?»

³⁴ Иисус деди: «Беним имӓӓм будур: йапайым Онун истедиини, Ким Бени йоллады, хем ишини Онун таманнайым.

³⁵ Демеерсиниз ми сиз, ани вар таа дӧрт ай бичмӓк вакыдынадан? Ама Бӓн сизӓ деерим: йа гӧзлеринизи ачын да бакын екиннерӓ. Оннар шиндӓн сора сарардылар бичмӓк ичин.

³⁶ Ким бичер, хак алэр, берекет дивеч йашамак ичин топлээр. Онуштан екиӂи хем бичиӂи барабар севинеӂеклӓр.

³⁷ Онун ичин доору о сӧз, ани деер: „Бириси екер, ама башкасы бичер“.

³⁸ Бӓн йолладым сизи, бичӓсиниз, нередӓ сиз ишлӓмединиз, ама башкасы ишледи, сиз дӓ пай алэрсыныз оннарын ишлериндӓн».

³⁹ Чойу самарийалылар бу касабадан инандылар Иисуса карынын лафларындан, ангысы, шаатлык едип, деди: «О сӧледи бана хепсини, не йаптым».

⁴⁰ Онуштан, ачан гелдилӓр самарийалылар Она да йалвардылар, калсын оннарда, О калды орада ики гӱн.

⁴¹ Сора инандылар таа чоклук Кенди Иисусун лафларындан.

⁴² Оннар дедилӓр карыйа: «Шинди инанэрыз диил сенин лафларындан, ама кендимиз ишиттик хепсини да аннадык, ани хакына Одур дӱннейин Куртарыӂысы /Христос/».

Ӧндерӂинин оолу саа олду

⁴³ Ики гӱндӓн сора Иисус йолланды орадан да гитти Галилейайа.

⁴⁴ О Кендиси шаатлык етти, ани бир дӓ пророк диил хатырланмыш кенди дуума ериндӓ.

⁴⁵ Ачан гелди Галилейайа, орада Ону каблеттилӓр, зерӓ оннар да йортуйа гиттийдилӓр да гӧрдӱйдӱлӓр хепсини, не О йапты йорту вакыды Иерусалимдӓ. Оннар да йортуда орадайдылар.

⁴⁶ Иисус енидӓн дӧндӱ геери Галилейанын Кана кӱӱйӱнӓ, нередӓ суйу чевирдийди шараба. Капернаум касабасында бир падишах изметкерин оолу хастайды.

⁴⁷ Бу изметкӓр ишитти, ани Иисус дӧндӱ Иудейадан Галилейа ерлеринӓ. О гелди Иисуса да йалварды, гелсин да алыштырсын онун оолуну, ани ӧлӱм дӧшеендейди.

⁴⁸ Иисус деди: «Сиз, мераклы нышаннар хем шашмаклы ишлӓр гӧрмейинӂӓ, инанмээрсыныз!»

⁴⁹ Падишахын изметкери деди: «Сааби, гел, таа ӧлмедийнӓн беним ушаам».

⁵⁰ Иисус ӂувап етти: «Гит, сенин оолун йашайаӂэк». О инанды Иисусун сӧзӱнӱ да гитти.

⁵¹ Ачан о таа йолдайды, чыраклары чыктылар она каршы да сӧледилӓр, ани чоӂук саа.

⁵² О сорду оннара: «Не вакыт она ии олду?». Оннар ӂувап еттилӓр: «Дӱн, единӂи саатта онун йангыны дӱштӱ».

⁵³ Бобасы аннады, ани бу олду озаман, ачан Иисус деди она: «Сенин оолун йашайаӂэк». О хем онун бӱтӱн еви инандылар.

⁵⁴ Бу икинӂи нышан, ани йапты Иисус геери Иудейадан Галилейа ерлеринӓ дӧндӱктӓн сора.