İoan 20 - Ени Бааланты

Иисус дирилер

¹ Хафтанын илк гӱнӱндӓ Марийа Магдалина чин-сабаалӓн, таа каранныктан, гелди мезара да гӧрдӱ, ани таш актарылмыш мезарын аазындан.

² О качарак гитти Симон Петрийӓ хем ӧбӱр ӱӱрениӂийӓ, ангысыны севӓрди Иисус, да деди оннара: «Алмышлар Саабийи мезардан, да билмеериз, нерейи койдулар Ону».

³ Озаман чыкты Петри хем ӧбӱр ӱӱрениӂи да гиттилӓр мезара.

⁴ Икиси барабар качтылар, ама ӧбӱр ӱӱрениӂи Петридӓн таа пек качарды да етишти ондан илери мезара.

⁵ Ачан иилди, гӧрдӱ кетен безлери ердӓ, ама мезар ичинӓ гирмеди.

⁶ Онун ардына гелди Симон Петри. О гирди мезар ичинӓ, гӧрдӱ ердӓ кетен безлери

⁷ хем пешкири, ани башындайды. О диилди безлӓрлӓн бирердӓ, ама сарылы топлуйду да койулуйду башка тарафа.

⁸ Озаман гирди мезар ичинӓ ӧбӱр ӱӱрениӂи да, ангысы илери етиштийди мезара да, гӧрӱп, инанды.

⁹ Зерӓ оннар таа билмӓрдилӓр Айоз Йазыдан, ани Иисус лӓӓзымды дирилсин ӧлӱдӓн.

¹⁰ Сора ӱӱрениӂилӓр енидӓн дӧндӱлӓр геери евӓ.

¹¹ Ама Марийа дурарды дышарда, мезарын йанында, да ааларды. О ааларкан, иилди баксын мезар ичинӓ.

¹² Да орада гӧрер ики ангил, гиийимни ак-бийаз рубайлан. Бириси отурарды баш уӂунда, ӧбӱрӱ дӓ айак уӂунда, нередӓ койулуйду Иисусун гӱӱдеси.

¹³ Оннар сордулар она: «Кары, нечин аалээрсын?» О ӂувап етти: «Алмышлар беним Саабими, да билмеерим нерейи койдулар».

¹⁴ Бӧлӓ лафедӓркӓн, дӧндӱ да гӧрдӱ Иисусу, Ангысы орада айакча дурарды, ама танымады Ону.

¹⁵ Иисус деди она: «Кары! Нечин аалээрсын? Кими аарээрсын?» Марийа санды, ани О башчыванӂы, да деди: «Чорбаӂы! Еер сӓн алдысайдын Ону, сӧлӓ нерейи койдун, да бӓн алаӂам Ону».

¹⁶ Иисус деди она: «Марийа!» О чабук дӧндӱ да чыфытчасына деди: «Раввуни!», аннамасы «Ӱӱредиӂи».

¹⁷ Иисус деди она: «Тутунма Бендӓн, зерӓ Бӓн таа калкмадым Бобама, ама гит кардашларыма да сӧлӓ оннара, ани калкэрым Беним Бобама хем сизин Бобаныза, Беним Аллахыма хем сизин Аллахыныза».

¹⁸ Марийа Магдалина гелер ӱӱрениӂилерӓ да деер: «Бӓн гӧрдӱм Саабийи», сора сӧледи, не деди Иисус.

Ӱӱрениӂилӓр Иисуслан каршы гелерлӓр

¹⁹ О хафтанын илк гӱнӱндӓ, авшам ӱстӱ, ӱӱрениӂилӓр топлуйдулар бирердӓ. Капулар китлийдилӓр, зерӓ коркардылар иудейлердӓн. Озаман Иисус гелди оннарын арасына да деди оннара: «Селемет сизӓ!»

²⁰ Бундан сора гӧстерди оннара еллерини хем ийесини. Ӱӱрениӂилӓр, гӧрӱп Саабийи, севиндилӓр.

²¹ Иисус деди икинӂи сыра: «Селемет сизӓ! Ниӂӓ йоллады Бени Бобам, ӧлӓ йоллээрым Бӓн дӓ сизи».

²² Бу лафлардан сора О ӱфледи оннара да деди: «Кабледин Айоз Духу.

²³ Кимин гӱнахларыны баашлайаӂэныз, оннара баашланаӂэк, кимин баашламайаӂэныз, оннара баашланмайаӂэк».

Инансыз Фома

²⁴ Фома, оникидӓн бириси, ангысына денер «Икиз», йокту оннарлан барабар, ачан Иисус гелди.

²⁵ Ӧбӱр ӱӱрениӂилӓр дедилӓр она: «Биз гӧрдӱк Саабийи!» Ама о деди: «Гӧрмейинӂӓ Онун еллериндӓ нышаннары енсерлердӓн, коймайынӂа пармаамы нышаннара хем йокламайынӂа елимнӓн Онун ийесини, бӓн инанмайаӂам».

²⁶ Секиз гӱндӓн сора енидӓн топлуйдулар Иисусун ӱӱрениӂилери ичердӓ, Фома да оннарланды. Капулар китлийкӓн, гелди Иисус оннарын арасына да деди: «Селемет сизӓ!»

²⁷ Сора деер Фомайа: «Вер пармааны да бак Беним еллеримӓ, вер елини да йокла Беним ийеми да олма инансыз, ама ол инанӂы».

²⁸ Фома деди: «Саабим хем Аллахым!»

²⁹ Иисус деди она: «Фома, сӓн гӧрдӱн да инандын. Не мутлу оннара, ким гӧрмедийнӓн инанэр».

³⁰ Иисус чок башка нышаннар йапты ӱӱрениӂилерин ӧнӱндӓ, ангылары ичин йок йазылы бу кийатта.

³¹ Ама буннар йазылы, ки сиз инанасыныз, ани Иисус – Христос, Аллахын Оолу, да инанарак, дивеч йашаманыз Онун адыннан олсун.