İoan 19 - Ени Бааланты

Иисуса ӧлӱм даавасы кесилер

¹ Озаман Пилат алды Иисусу да изин верди, дӱӱсӱннӓр Ону.

² Аскерлӓр ӧрдӱлӓр тикенни чалыдан фенец да койдулар Иисусун башына. Гиидирдилӓр Ону ергиван рубайлан,

³ сора, йаклашып Она, дейӓрдилӓр: «Селӓм Сана, Иудейлерин Падишахы!» да шамарлардылар Онун йанакларыны.

⁴ Пилат генӓ чыкты да деди инсана: «Тӓ, бӓн чыкарэрым Ону сизӓ, ки билӓсиниз, ани бӓн булмээрым Онда бир дӓ кабаат».

⁵ Чыкты Иисус, чалыдан фенецлӓн башында хем ергиван рубайлан гиийимни. Пилат озаман деди инсана: «Будур Адам!»

⁶ Ачан гӧрдӱлӓр Ону бӱӱк попазлар хем бекчилӓр, озаман башладылар баармаа: «Гер ону! Гер ону ставроза!» Пилат деди: «Алын да герин сиз, зерӓ бӓн булмадым Онда бир дӓ кабаат».

⁷ Иудейлӓр ӂувап еттилӓр она: «Биздӓ вар Закон, да бу Закона гӧрӓ О лӓӓзым ӧлдӱрӱлсӱн, зерӓ йапты кендини Аллахын Оолу».

⁸ Пилат, ишидип бу лафлары, таа пек коркту.

⁹ Гирди енидӓн Преториума да деди Иисуса: «Нередӓнсин Сӓн?» Ама Иисус вермеди бир дӓ ӂувап.

¹⁰ Пилат деди Она: «Бана мы ӂувап етмеерсин? Билмеерсин ми, ани вар куведим колверейим Сени хем вар куведим герейим Сени ставроза!»

¹¹ «Олмайаӂэйды бир дӓ куведин Беним ӱстӱмӓ, еер верилмейейди сана гӧктӓн. Онуштан, ким верди Бени сенин елинӓ, онун гӱнахы таа бӱӱк», – ӂувап етти Иисус.

¹² Бундан сора Пилат аарарды колайлык, колверсин Ону. Ама иудейлӓр баарырдылар: «Еер колверӓрсейдин бу Адамы, диилсин дост Кесарлан. Хербир адам, ким кендини йапэр падишах, о Кесара каршы гидер».

¹³ Ачан Пилат ишитти бу лафлары, чыкарды Иисусу дышары, отурду даава скемнесинӓ о ердӓ, ани ады «Таш Дӧшемӓ», чыфытчасына «Гаввафа».

¹⁴ О гӱн хазырланмак гӱнӱйдӱ Паскеллӓ йортусуна, алтынӂы саадын долайындайды. Пилат деди иудейлерӓ: «Тӓ, бу сизин Падишахыныз!»

¹⁵ Ама оннар баардылар: «Ӧлдӱр, ӧлдӱр, гер Ону ставроза!» «Герейим сизин Падишахынызы мы?» – сорду Пилат оннара. Бӱӱк попазлар дедилӓр: «Биздӓ йок башка падишах, Кесардан каарӓ».

¹⁶ Озаман Пилат верди Иисусу оннарын еллеринӓ, ки герилсин ставроза. Аскерлӓр алдылар Иисусу да гӧтӱрдӱлӓр гермӓӓ.

Иисус ставрозда

¹⁷ Иисус Кенди гӧтӱрӓрди ставрозу омузунда да чыкты о ерӓ, ани денер «Баш кемии ери», чыфытчасына «Голгофа».

¹⁸ Орада гердилӓр ставроза Ону хем таа ики кишийи, бирисини саа тарафына, ӧбӱрӱнӱ дӓ сол тарафына, Иисусу да гердилӓр ортада.

¹⁹ Пилат сымарлады, йазсыннар да ставрозун йукарсына бӧлӓ бир йазы койсуннар: «Назаретли Иисус, Иудейлерин Падишахы».

²⁰ Иудейлердӓн чойу окудулар бу йазыйы, зерӓ нерейи гердилӓр Иисусу, йакынды касабайа. Йазылыйды чыфыт, латин хем урум диллериндӓ.

²¹ Иудейлерин бӱӱк попазлары дедилӓр Пилата: «Йазма „Иудейлерин Падишахы“, ама йаз, ани „О Кендини сайарды Иудейлерин Падишахы“».

²² «Не йаздым, о йазылмыш», – ӂувап етти Пилат.

²³ Аскерлӓр Иисусу гердиктӓн сора алдылар Онун рубаларыны да йаптылар дӧрт пай, хербир аскерӓ бирӓр пай. Сора алдылар гӧлмеени. Гӧлмеендӓ йокту бир дӓ дикиш, ӧрӱлӱйдӱ бойдан-бойа.

²⁴ Аскерлӓр дедилӓр бири-биринӓ: «Йыртмайалым гӧлмӓӓ, ама аталым четелӓ, гӧрелим, кимӓ дӱшеӂек». Бу олду таманнансын дейни Айоз Йазы, ани деер: «Пай еттилӓр рубаларымы, гиийимим ичин четелӓ аттылар». Бӧлӓ дӓ йапты аскерлӓр.

²⁵ Ставроз йанында, нередӓ герилийди Иисус, дурардылар: анасы, анасынын кызкардашы, Марийа, Клеопанын карысы, хем Марийа Магдалина.

²⁶ Ачан Иисус гӧрдӱ анасыны хем, дурарак онун йанында, ӱӱрениӂийи, ангысыны севӓрди, деди Кенди анасына: «О, кары! Тӓ, бу сенин оолун!»

²⁷ Сора деди ӱӱрениӂисинӓ: «Тӓ, бу сенин анан!» Ондан сора бу ӱӱрениӂи алды Иисусун анасыны кенди евинӓ.

Иисус ӧлер

²⁸ Бундан сора Иисус, билерӓк ани шинди хепси таманнанды, таманнансын дейни Айоз Йазы, деди: «Сусадым».

²⁹ Орада варды бир кап, долу шарап сиркесиннӓн. Аскерлӓр, бир сӱнкери бандырып сиркейӓ, иссоп сопасына тактылар да узаттылар Онун дудакларына.

³⁰ Ачан Иисус сиркейи датты, деди: «Таманнанды!» Сора иилтти башыны да салверди Духуну.

³¹ Ӂумаа гӱнӱйдӱ. Иудейлӓр истемӓрдилӓр, ки гӱӱделӓр, ставрозда герили, калсыннар ӂумертеси гӱнӱ, зерӓ о ӂумертеси бир бӱӱк гӱндӱ. Онуштан йалвардылар Пилата, ки изин версин, кырсыннар герилмиш оланнарын балдырларыны да калдырсыннар гӱӱделери.

³² Аскерлӓр гелдилӓр да кырдылар илкинкисинин балдырларыны, сора икинӂисинин, ани Иисуслан билӓ герилийдилӓр.

³³ Ама ачан йаклаштылар Иисуса, гӧрдӱлӓр ани О ӧлӱ, онун ичин оннар кырмадылар Онун балдырларыны.

³⁴ Ама аскерлердӓн бириси саплады Онун ийесини сӱнгӱйлӓн, да бирдӓн кан хем су акты.

³⁵ Буну гӧрӓн шаатлык едер, да онун шаатлыы аслы. О билер, ани доору сӧлеер. Сӧлеер, ки сиз инанасыныз.

³⁶ Бу бӧлӓ олду, ки таманнансын Айоз Йазы: «Онун кемиклериндӓн бири билӓ фаланмайаӂэк».

³⁷ Башка ердӓ Айоз Йазы деер: «Бакаӂэклар Она, Кими сапладылар».

Иисус мезара койулэр

³⁸ Бундан сора Аримафейа касабасындан Иосиф, ангысы Иисусун бир ӱӱрениӂисийди, ама буну саклы тутту, зерӓ коркарды иудейлердӓн, истеди изин Пилаттан, ки индирсин Иисусун гӱӱдесини ставроздан. Пилат кайыл олду. Иосиф гитти да алды Иисусун гӱӱдесини.

³⁹ Гелди Никодим дӓ, ангысы геӂӓ гелдийди Иисуса, гетирди йакын ӱз фунт смирна, карышык алойа йаайыннан.

⁴⁰ Оннар алдылар Иисусун гӱӱдесини да сардылар кетендӓн безлӓрлӓн, ии кокуларлан, иудейлерин гӧммӓк адетлеринӓ гӧрӓ.

⁴¹ Орада, нередӓ Иисусу гердилӓр, варды бир башчӓ. О башчӓ ичиндӓ варды бир ени мезар лаамы, нерейи таа кимсейи коймадыйдылар.

⁴² Орада койдулар Иисусу, зерӓ иудейлерин хазырланмак гӱнӱйдӱ, да бу мезар орайы йакынды.