İoan 16 - Ени Бааланты

¹ Сӧледим хепсини буннары, ки сиз сӱрчмейӓсиниз.

² Уурадаӂэклар сизи синагогалардан. Гелеӂек артык ӧлӓ бир вакыт, ачан херкез, ким сизи ӧлдӱреӂек, санаӂэк, ани бунуннан Аллаха измет едер.

³ Бӧлӓ йапаӂэклар, зерӓ танымадылар не Бобайы, не дӓ Бени.

⁴ Сӧледим буннары сизӓ, ки ачан гелеӂек о вакыт, аклыныза гетирӓсиниз, ани Бӓн сизӓ сӧледйидим буннары. Баштан буннары сизӓ сӧлӓмедим, зерӓ сизиннӓн билӓ булунурдум.

Айоз Духун иши

⁵ Шинди гидерим Она, Ким Бени йоллады, ама сиздӓн бириниз билӓ сормээр: „Нерейи гидерсин?“

⁶ Ама бу лафларын бетеринӓ, ани сӧледим сизӓ, кахыр басты сизи.

⁷ Ама Бӓн хакына сӧлеерим сизӓ, ани таа ислӓӓ олаӂэк сизин ичин, ки Бӓн гидейим, зерӓ Бӓн гитмӓрсейдим, Иилендириӂи гелмейеӂек, ама гидӓрсейдим, йоллайаӂам Ону сизӓ.

⁸ Ачан О гелеӂек, дӱннейӓ ачаӂэк, не вар гӱнах, не вар доорулук хем недир Аллахын даавасы.

⁹ Ачаӂэк оннарын гӱнахларыны, зерӓ инанмадылар Бана.

¹⁰ Ачаӂэк доорулуу, зерӓ Бӓн гидерим Бобайа, да Бени шиндӓн сора гӧрмейеӂениз.

¹¹ Ачаӂэк даавайы, зерӓ даавайа кесилди бу дӱннейин чорбаӂысы.

¹² Вар чок ишлӓр, сӧлейим сизӓ, ама шинди йок насыл оннара дайанасыныз.

¹³ Ачан гелеӂек Иилендириӂи, Аслылык Духу, О доорудаӂэк сизи бӱтӱн аслылаа, зерӓ О лафетмейеӂек Кендиндӓн, ама сӧлейеӂек, не ишидеӂек, хем билдиреӂек сизӓ гелӓр ишлери.

¹⁴ О Бени метиннейеӂек, зерӓ алаӂэк ондан, не вар Бендӓ, да сизӓ ачаӂэк.

¹⁵ Хепси, не вар Бобада, оннар Беним, онуштан дедим, ани алаӂэк ондан, не вар Бендӓ, да сизӓ ачаӂэк.

¹⁶ Бир парча вакыттан сора артык Бени гӧрмейеӂениз, ама таа бир парча вакыттан сора енидӓн гӧреӂениз, /зерӓ Бӓн Бобама гидерим/».

Кахырыныз севинмейӓ дӧнеӂек

¹⁷ Ачан ишиттилӓр бу лафлары, кимиси ӱӱрениӂилериндӓн дедилӓр бири-биринӓ: «Не истеер бизӓ демӓӓ бу лафларлан, ани бир парча вакыттан сора гӧрмейеӂениз Бени, сора бир парча вакыттан сора енидӓн гӧреӂениз, зерӓ Бӓн Бобама гидерим».

¹⁸ Ӧлӓ ки, оннар сордулар: «Недир бу „бир парча вакыт“, ани О деер? Биз аннамээрыз, не лафедер».

¹⁹ Иисус аннады, ани оннар истеерлӓр сорсуннар Она, онуштан деди: «Бунун ичин ми чекишерсиниз, ани дедим: „Бир парча вакыттан сора гӧрмейеӂениз Бени, ама таа бир парча вакыттан сора енидӓн гӧреӂениз“?

²⁰ Доору, доору сӧлеерим сизӓ, ани аалайаӂэныз хем сызлайаӂэныз, ама дӱннӓ севинеӂек. Сиз кахырланаӂэныз, ама кахырыныз севинмейӓ дӧнеӂек.

²¹ Кары, ачан гелер вакыды дуудурмаа, зеетленер, ама сора, ачан дуудурэр бир евлат, зеетлерини унудэр севинмектӓн, ани бир инсан дууду бу дӱннедӓ.

²² Хеп ӧлӓ сиз дӓ шинди кахырланэрсыныз, ама ачан енидӓн гӧреӂӓм сизи, севинеӂениз. Кимсей сизин севинменизи сиздӓн аламайаӂэк.

²³ О гӱндӓ сормайаӂэныз бишей Бана. Доору, доору сӧлеерим сизӓ, не дӓ истейеӂениз Беним адыма Бобадан, вереӂек сизӓ.

²⁴ Шиндийӓ кадар бишей истӓмединиз Беним адыма. Истейиниз, да кабледеӂениз, ки сизин севинмениз таман олсун.

Бӓн енседим дӱннейи

²⁵ Буннары аннаттым сизӓ ӧрнеклӓрлӓн, ама гелер вакыт, ачан артык ӧрнеклӓрлӓн лафетмейеӂӓм, ама ачык лафедеӂӓм сизиннӓн Боба ичин.

²⁶ О гӱндӓ истейеӂениз Беним адыма. Демеерим, ани Бӓн йалвараӂам сизин ичин Бобайа.

²⁷ Боба Кендиси сизи север, зерӓ сиз севдиниз Бени да инандыныз, ани Аллахтан чыкып, гелдим.

²⁸ Гелдим Бобадан бу дӱннейӓ, шинди бракэрым дӱннейи да дӧнерим Бобайа».

²⁹ Ӱӱрениӂилери дедилӓр: «Тӓ, шинди лафедерсин ачык да хич лафетмеерсин ӧрнеклӓн.

³⁰ Шинди аннээрыз, ани билерсин хепсини, да диил лӓӓзым, ки сорсун Сана биркимсей бишей, онуштан инанэрыз, ани Аллахтан гелдин».

³¹ Иисус ӂувап етти: «Шинди инанэрсыныз мы?

³² Тӓ, гелер вакыт, артык гелди, ачан даалышаӂэныз херкезиниз кенди еринӓ. Бени йалныз бракаӂэныз, ама Бӓн диилим йалныз, зерӓ Боба Бенимнӓн.

³³ Сӧледим буннары, ки услулуунуз олсун Бендӓ. Бу дӱннедӓ зеет гечиреӂениз, ама гиргинненин, Бӓн енседим дӱннейи!»