İoan 15 - Ени Бааланты

Баа чотуу хем чыбыклар

¹ Бӓн – хакына баа чотуу, Беним Бобам – бааӂы.

² Хербир чыбык, ани ӱзӱм йапмээр Бендӓ, ону кесер, ама хербир чыбык, ани ӱзӱм йапэр, ону паклээр, ки йапсын таа чок ӱзӱм.

³ Шинди сиз пакландыныз о сӧзлӓн, ани Бӓн сизӓ сӧледим.

⁴ Калын Бендӓ, Бӓн дӓ калаӂам сиздӓ. Ниӂӓ баа чыбыы йок насыл кендилииндӓн гетирсин ӱзӱм, еер калмарсайды чотукта, хеп ӧлӓ сиз дӓ, еер калмарсайдыныз Бендӓ.

⁵ Бӓн – баа чотууйум, сиз – чыбыкларсыныз. Ким калэр Бендӓ, хем кимдӓ калэрым Бӓн, о йапэр чок ӱзӱм. Бенсиз бишей йапамээрсыныз.

⁶ Еер биркимсей калмарсайды Бендӓ, о уурадылэр дышары да, ниӂӓ бир баа чыбыы, куруйэр. Бу чыбыклары топлээрлар да, атешӓ атып, йакэрлар.

⁷ Еер каларсайдыныз Бендӓ, Беним сӧзлерим дӓ каларсайдылар сиздӓ, озаман не истӓрсейдиниз, истейин, да верилеӂек сизӓ.

⁸ Еер йапарсайдыныз чок ӱзӱм, бунуннан Беним Бобам олаӂэк метинненмиш, да бутӱрлӱ олаӂэныз Беним ӱӱрениӂилерим.

⁹ Ниӂӓ Бени севди Бобам, ӧлӓ севдим Бӓн дӓ сизи. Калын Беним севгилиимдӓ.

¹⁰ Еер таманнарсайдыныз Беним сымарламакларымы, каларсыныз Беним севгилиимдӓ, ниӂӓ Бӓн таманнадым Бобамын сымарламакларыны да калдым Онун севгилииндӓ.

¹¹ Сӧледим буннары, ки Беним севинмелиим сиздӓ калсын да сизин севинмениз таман олсун.

¹² Будур Беним сымарламам сизӓ: севӓсиниз бири-биринизи, ниӂӓ Бӓн сизи севдим.

¹³ Йок кимсейдӓ таа бӱӱк севги, некадар о, ачан биркимсей верер ӂаныны кенди достлары ичин.

¹⁴ Еер йапарсайдыныз, не Бӓн сизӓ сымарлээрым, озаман сиз Беним достларымсыныз.

¹⁵ Артык демеерим сизӓ чырак, зерӓ чырак билмеер, не йапэр чорбаӂысы, ама деерим сизӓ дост, зерӓ сӧледим сизӓ хепсини, не Бобамдан ишиттим.

¹⁶ Сиз Бени сечмединиз, ама Бӓн сизи сечтим. Сыраладым, гидип, мейва гетирӓсиниз, да хожма олсун мейваныз, ки не дӓ истейеӂениз Бобадан Беним адыма, сизӓ версин.

¹⁷ Буну сымарлээрым сизӓ: севӓсиниз бири-биринизи.

Дӱннейин киннилии

¹⁸ Еер дӱннӓ сиздӓн азетмӓрсейди, билин, ани сиздӓн илери Бендӓн азетмеди.

¹⁹ Дӱннедӓн олайдыныз, дӱннӓ севеӂейди кендикилерини. Ама чӱнкӱ диилсиниз дӱннедӓн хем чӱнкӱ Бӓн сизи сечтим дӱннӓ ичиндӓн, онун ичин дӱннӓ сиздӓн азетмеер.

²⁰ Гетирин аклыныза сӧзӱ, ани сӧледим сизӓ: „Чырак диил таа бӱӱк, некадар чорбаӂысы“. Чӱнкӱ Бени кооладылар, сизи дӓ коолайаӂэклар, чӱнкӱ Беним сӧзӱмӱ таманнадылар, сизин сӧзлеринизи дӓ таманнайаӂэклар.

²¹ Хепсини буннары йапаӂэклар сизӓ Беним адымын бетеринӓ, зерӓ оннар танымээрлар Ону, Ким Бени йоллады.

²² Еер гелмейдим да сӧлӓмейдим оннара, гӱнахлары олмайаӂэйды, ама шинди оннара йок афетмӓк гӱнахларына.

²³ Ким азетмеер Бендӓн, азетмеер Беним Бобамдан.

²⁴ Еер йапмайайдым оннарын арасында ӧлӓ ишлӓр, ани башка кимсей йапмады, олмайаӂэйды гӱнахлары. Ама шинди хем гӧрдӱлӓр, хем азетмедилӓр Бендӓн хем Беним Бобамдан,

²⁵ таманнансын дейни, не вар йазылы оннарын законунда: „Хич бир бишейсиз карезлендилӓр Бана“.

²⁶ Ачан гелеӂек Иилендириӂи, Ангысыны Бӓн Бобамдан сизӓ йоллайаӂам, Аслылык Духу, Ангысы Бобадан гелер, О шаатлык едеӂек Беним ичин.

²⁷ Сиз дӓ шаатлык едеӂениз, нечинки сиз баштан Бенимнӓнсиниз.